ولاردىڭ قاتارىنا بيوينجەنەر, قايتا جاڭعىرتىلاتىن قۋات كوزدەرىنىڭ ينجەنەرى, نەيروپسيحولوگ, بيوينفورماتيك, باعدارلاما ازىرلەۋشى, ينجەنەر-جوبالاۋشى, 3D باسپا ينجەنەرى, گەندىك ينجەنەريا مامانى, ۆيرتۋالدى شىندىق ديزاينەرى, ۆيرتۋالدى شىندىق ساۋلەتشىسى, بيوفارماكولوگ سەكىلدى ماماندىقتار ەنگىزىلىپتى.
«Antal Kazakhstan» رەكرۋتينگتىك كومپانياسى بۇل زەرتتەۋدىڭ قازاقستان ءۇشىن دە ماڭىزدى ەكەندىگىن ايتادى.
«قازىرگى تەحنولوگيالاردىڭ دامۋى بارلىق ەلدەردە جاڭا ۇقساس ماماندىقتاردىڭ پايدا بولۋىنا الىپ كەلەدى. دەگەنمەن, اتالعان بولاشاق كاسىپ تۇرلەرىنىڭ بارلىعى بىردەي ون جىل وتە سالىسىمەن بىردەن پايدا بولا كەتپەۋى دە مۇمكىن. ماسەلەن, ۆيرتۋالدى شىندىق ديزاينەرى ەرتەرەك پايدا بولۋى, ال باسقالارى ءسال كەيىنىرەك تۋىنداۋى مۇمكىن», دەيدى «Antal Kazakhstan» باسشىسى اننا كوۆينسكايا.
ونىڭ ايتۋىنشا, بيزنەس-تالداۋشى, قارجىگەر ماماندىقتارىنا ون جىل وتكەننەن كەيىن دە ەڭبەك نارىعىنداعى سۇرانىس بۇرىنعىسىنشا ساقتالىنىپ قالا بەرۋى ءتيىس. ويتكەنى كومپانيالار وزدەرىنىڭ قارجىسىن قايدا سالعاندارى دۇرىس ەكەندىگىن جانە بۇل قارجىنىڭ ولارعا قانشالىقتى تابىس اكەلەتىندىكتەرىن بىلۋگە وسى ماماندىقتار ارقىلى قول جەتكىزەدى. فريلانسەرلەر, جوبا مەنەدجەرلەرى نەعۇرلىم كوبىرەك قاجەت ەتىلەتىن بولادى. قازىرگى ءىت-ماماندار دا جۇمىسسىز قالمايتىندىعى انىق.
«HeadHunter» كازاحستان كومپانياسى ماماندارىنىڭ ايتۋىنشا, قازىرگى بۇقارالىق سيپات العان ساتۋ مەنەدجەرى, اكىمشىلىك قىزمەتكەر, بۋحگالتەر جانە اقپاراتتىق تەحنولوگيالار ماماندارى سەكىلدى ماماندىقتار دا بولاشاقتا ماڭىزىن جويماق ەمەس. بىراق سونىمەن بىرگە وسىلاردىڭ ورتاسىنان مۇلدەم جاڭا ماماندىق تۇرلەرى دە پايدا بولۋى ابدەن مۇمكىن.
«اقپاراتتىق تەحنولوگيالار بارعان سايىن قارقىن الىپ, ادام ءومىرى مەن قىزمەتىنىڭ بارلىق سالالارىنا تەرەڭدەي ەنۋدە. مىنە, وسى ۇدەرىستىڭ ەكپىنىمەن ءوندىرىس پەن قىزمەتتىڭ ءارتۇرلى سالالارىنىڭ ۇشتاسقان جەرىندە جاڭا ماماندىقتار مەن كاسىپ تۇرلەرى پايدا بولاتىندىعى انىق. ماسەلەن, ءىت-دارىگەر, «اقىلدى» جولدار قۇرىلىسشىلارى, مەديتسينالىق روبوتتاردى جوبالاۋشىلار, تسيفرلى ءتىلشى ماماندار, گەنەتيكالىق كەڭەس بەرۋشىلەر, ويىن تاجىريبەشىلەرى سەكىلدى ماماندىقتار كوپ وتپەي-اق ومىرگە كەلۋى مۇمكىن», دەيدى اتالعان كومپانيانىڭ بولاشاق ماماندىقتاردى زەرتتەۋ ىسىنە قاتىسىپ جۇرگەن ماماندارى.
ءيا, ءومىر قازىرگى تەحنولوگيالىق جاڭالىقتاردىڭ ىقپالىمەن جىلدان-جىلعا قارىشتاپ العا باسىپ بارادى. وسىدان 20-30 جىل بۇرىنعى ءومىر مەن قازىرگى ءومىردىڭ اراسىندا ايىرماشىلىق كوپ. مۇنى سەزىنەتىن, باستان كەشىرەتىن شاققا دا جەتىپ وتىرمىز. ماسەلەن, العاشقى ينتەرنەتتىك تەحنولوگيالاردىڭ ءبىرىن ومىرگە اكەلگەن مايكروسوفت كومپانياسىنىڭ نەگىزىن قالاۋشى بيلل گەيتس وسىدان 15 جىلداي ۋاقىت بۇرىن «ينتەرنەتتىڭ سىرتىندا قالعان ادامدار بولاشاقتا ءومىردىڭ دە سىرتىندا قالادى» دەگەن بولاتىن. قازىر وسى ءسوز راسقا اينالىپ وتىر. سول ينتەرنەتتىڭ ارقاسىندا ءبىز ۆيرتۋالدى ومىرمەن بەتپە-بەت كەلدىك. ۆيرتۋالدى ءومىردىڭ ارقاسىندا ءبىر- بىرىنە جاقىن, ءتىپتى كورشى تۇراتىن ادامداردىڭ اراسى الشاقتادى دا, ءبىر-بىرىنەن الىس, ءتىپتى ەكى مەملەكەتتە ءومىر ءسۇرىپ جاتقان ادامداردىڭ اراسى جاقىندادى. ادامدار ۆيرتۋالدى ءومىردىڭ مۇمكىندىكتەرى ارقاسىندا قاشىقتا وتىرىپ-اق جۇمىس ىستەي بەرەتىن بولدى.
ماسەلەن, فريلانسەر قىزمەتىنىڭ ءمانىن الايىق. ول بەلگىلى ءبىر ۇجىمنىڭ تۇراقتى شتاتىندا تۇرمايتىن ەركىن قىزمەتكەر. سوعان سايكەس ءوز جۇمىس ءتارتىبىن ءوزى بەلگىلەيدى. فريلانسەر ءتىپتى باسقا ەلدە جۇمىس ىستەيتىن كومپانيالاردىڭ دا تاپسىرىستارىن ورىنداي بەرەدى. تەك قىزمەتىنە سۇرانىس بولسىن دەڭىز.
«تengrinews.kz» تاراتقان حابارعا قاراعاندا, قازاقستاندا مۇنداي قىزمەتكەرلەر سانى ارتىپ, 2016 جىلى 215 مىڭعا جەتكەن. ال وسىنداي كاسىپ ءتۇرى وسىدان 10-15 جىل بۇرىن بىزدە مۇلدە تىركەلمەگەن ەدى.
وسىعان قاراعاندا بۇگىنگى بولجام – ەرتەڭگى اقيقات. الداعى ۋاقىتتا جاڭا ماماندىقتار مەن كاسىپ تۇرلەرىنىڭ ارتا بەرەتىندىگىنە داۋ بولماسا كەرەك.
سۇڭعات ءالىپباي,
«ەگەمەن قازاقستان»
