قر ءبىلىم جانە عىلىم مينيسترلىگىنىڭ جوعارى جانە جوعارى وقۋ ورنىنان كەيىنگى ءبىلىم بەرۋدىڭ رەسپۋبليكالىق وقۋ-ادىستەمەلىك كەڭەسىنىڭ وقۋ-ادىستەمەلىك بىرلەستىگىنىڭ ارنايى باعدارلاماسىنا سايكەس ۇيىمداستىرىلعان ءماجىلىستىڭ وتۋىنە قىزدار ۋنيۆەرسيتەتىنىڭ پەداگوگيكا جانە پسيحولوگيا فاكۋلتەتى مۇرىندىق بولدى.
شاراعا وتاندىق جوعارى وقۋ ورىندارىنىڭ پروفەسسور-وقىتۋشىلارى, «ورلەۋ» بىلىكتىلىكتى ارتتىرۋ ۇلتتىق ورتالىعىنىڭ قىزمەتكەرلەرى مەن بالاباقشا, مەكتەپ جانە كوللەدج مۇعالىمدەرى قاتىستى.
جيىندى پەداگوگيكالىق ۋنيۆەرسيتەتتىڭ وقۋ جانە تاربيە ىستەرى جونىندەگى پرورەكتورى اباي قۇرمانقۇلوۆ اشىپ, قىزدار ۋنيۆەرسيتەتىندە «مەكتەپكە دەيىنگى وقىتۋ جانە تاربيەلەۋ» ماماندىعى بويىنشا بىرقاتار جۇمىستار اتقارىلىپ جاتقاندىعىن تىلگە تيەك ەتتى. بۇدان وزگە سالا ماماندارى جاڭارتىلعان ءبىلىم بەرۋ باعدارلاماسىنا ساي بولاشاق مامانداردى دايىنداۋ ماسەلەسى, مەكتەپالدى دايىندىقتان جاڭا «الىپپەنىڭ» ەنگىزىلۋ جايى, اتالعان وزگەرىستەرگە سايكەس ماماندىقتىڭ ءبىلىم بەرۋ باعدارلاماسىنداعى وزگەرىستەر جايى ءسوز بولدى.
مەكتەپالدى دايىندىق سىنىپتارىنا ارنالعان «الىپپە» وقۋلىعىنىڭ اۆتورىنىڭ ءبىرى, قازمەمقىزپۋ-دىڭ پەداگوگيكا-پسيحولوگيا فاكۋلتەتىنىڭ دەكانى سايراش جيەنباەۆا اتالعان وقۋ قۇرالىنىڭ قۇرىلىمىنىڭ تەوريالىق-ادىسنامالىق نەگىزدەرىنە كەڭىنەن توقتالىپ, ونداعى بالالاردىڭ جاس ەرەكشەلىگىنە قاراي ءتۇرلى ويىندار مەن قولدارىنىڭ موتوريكاسىن دامىتۋعا باعىتتالعان ادىستەمەلەردى اڭگىمەلەدى. سونىمەن قاتار, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ پەداگوگيكا جانە پسيحولوگيا فاكۋلتەتىنىڭ دوتسەنتى, پەداگوگيكا عىلىمدارىنىڭ كانديداتى, «بۋكۆار» وقۋلىعىنىڭ اۆتورى لاريسا لەبەدەۆا الداعى ۋاقىتتا مامان دايارلاۋدا ساۋات اشۋ نەگىزدەرىن وقىتۋ ادىستەمەسى ءپانىنىڭ ەنگىزىلۋ قاجەتتىگىن العا تارتتى. ال, «ورلەۋ» بىلىكتىلىكتى ارتتىرۋ ۇلتتىق ورتالىعىنىڭ مەكتەپكە دەيىنگى باستاۋىش ءبىلىم كافەدراسىنىڭ مەڭگەرۋشىسى, PhD دوكتورى ا. تۇرالباەۆا جاڭارتىلعان مەكتەپكە دەيىنگى ءبىلىم بەرۋ باعدارلاماسىنا وراي قىزدار ۋنيۆەرسيتەتىنىڭ وقىتۋشىلارىمەن بىرگە پەداگوگ-تاربيەشىلەرگە ارنالعان كۋرستاردىڭ جۇرگىزىلىپ جاتقاندىعىن باياندادى. سونداي-اق, ول ەلىمىزدە بىرنەشە باسپا ۇيلەرى وزدەرىنىڭ باعدارلاماسى نەگىزىندە «الىپپە» وقۋ-ادىستەمەلىك كەشەنىن دايىنداعانىن, اتالعان جوبا بۇگىندە اپروباتسيادان ءوتىپ جاتقانىن ايتتى.
ءماجىلىس سوڭىندا مەكتەپالدى دايىندىق سىنىپتارىنا ارنالعان «الىپپەنىڭ» ەنگىزىلۋىنە بايلانىستى «مەكتەپكە دەيىنگى وقىتۋ جانە تاربيەلەۋ» ماماندىعى بويىنشا ءبىلىم بەرۋ باعدارلاماسىنا ەلەكتيۆتى ءپان رەتىندە ەنگىزۋ قاجەتتىلىگى تۋرالى ارنايى شەشىم قابىلداندى.
