مىسالى, قادىرجان ماقانعاليدىڭ ءوزى جاس عالىم. ول تاياۋ ۋاقىتتا وبلىس ورتالىعىنان شالعايدا جاتقان قامىستى اۋدانىندا حالىقارالىق دارەجەدە اتالىپ وتكەن يننوۆاتسيالىق تەحنولوگيامەن وڭدەلەتىن شۇجىق تسەحىن اشۋدى جوسپارلاپ وتىر. ال دميتري روماششەنكو مەملەكەتتىك ءتىلدى تازا مەڭگەرىپ الۋىمەن قاتار, فەدوروۆ اۋدانىنداعى №1 ورتا مەكتەپتە قازاق تىلىنەن وزىق ادىستەمەمەن ساباق بەرەدى. بيىل «التىن كىتاپقا» ەسىمدەرى جازىلعان 11 جاستىڭ – توعىزقۇمالاقشى قىمبات نوسەروۆانىڭ, اكتەر تولەندى القوجيننىڭ, مۇعالىم ءامىرجان جۇمابەكوۆتىڭ, جۋرناليست ديلارا ارونوۆانىڭ, كاسىپكەر ميراس ادامباەۆتىڭ, جاستار كوشباسشىلارى سەرىك ماناسباەۆتىڭ, باكىر مارعۇلاننىڭ, دارىگەرلەر الەكساندر كولەسنيچەنكو مەن ەلۆيرا اسادوۆانىڭ ارقايسىسى ءوزىنىڭ وسىنداي ۇزدىك ىسىمەن, دارىنىمەن قىزىقتى داستان سەكىلدى.
– بالا جاسىمنان مەملەكەتتىك تىلگە قىزىعۋشىلىعىم بولاتىن. بىراق ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ قازاق فيلولوگياسى ماماندىعىنا تۇسكەنىمدە ءتىلىم قازاقشاعا ونشا كەلمەيتىن جانە كوپ سوزدەردى تۇسىنبەيتىنمىن. قينالعان كۇندەردىڭ ءبارى ارتتا قالدى, ءتورتىنشى كۋرستا ەركىن سويلەپ كەتتىم. مەندە مەملەكەتتىك ءتىلدى ءبىلۋىم كەرەك دەگەن ماقسات بولدى. قازاق ءتىلى مەن ءۇشىن اشىلعان تەرەڭ تەڭىز سەكىلدى. ال اۋىلدا مەملەكەتتىك تىلدە ساباق بەرۋدى ومىرلىك ماقساتىم دەپ ءبىلدىم, – دەيدى ديما اعىنان جارىلىپ.
قازىر ونىڭ قازاق ءتىلىن مەڭگەرۋ جانە ۇيرەتۋ جونىندەگى ىزدەنىستەرى ءتىل ماماندارىنىڭ نازارىن اۋدارىپ ءجۇر.
جىلدا ءداستۇرلى تۇردە وتەتىن «قوستاناي وبلىسى جاستارىنىڭ التىن كىتابى» بال-كەشىنە بيىل دا وبلىس اكىمى ارحيمەد مۇحامبەتوۆ قاتىستى.
– ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىنداعى ايتىلعان ماسەلەلەردىڭ بارلىعى دا جاستارعا ارنالادى, سوندىقتان ونى جۇزەگە اسىراتىن دا سىزدەر بولاسىزدار. ەڭبەكسىز, ماقساتسىز ەشكىم دە مەملەكەتكە, وتباسىنا پايدالى ءىس ىستەي المايدى. ءبىزدىڭ بۇل شارا جىل سايىن ەل بولاشاعىنىڭ كوكجيەگىندەي ارمان قۋعان تالانتتى, دارىندى جاستاردىڭ ءوسىپ كەلە جاتقانىنا كەپىل بولادى. بۇگىنگى ماراپات, قۇرمەت سىزدەردىڭ ەڭبەكتەرىڭىزدى مويىنداۋ عانا ەمەس, قوعامنىڭ سىزدەرگە كورسەتكەن ۇلكەن سەنىمى. وزگە جاستار سىزدەرگە تەڭەلگىسى كەلەدى, – دەدى وبلىس باسشىسى.
قوستانايدا 12 جىلدىڭ ىشىندە 184 جاستىڭ ەسىمى «قوستاناي وبلىسى جاستارىنىڭ التىن كىتابىنا» التىن ارىپپەن جازىلدى. ولاردىڭ اراسىندا بۇگىنگى پارلامەنت ءماجىلىسىنىڭ دەپۋتاتى ءاليا ساپاروۆا, عالىم ينديرا بەيىشەۆا, ەكى دۇركىن وليمپيادا جۇلدەگەرى, بۇگىندە كاسىپقوي بوكستا جۇرگەن يۆان دىچكو, كونكيمەن سىرعاناۋدان الەم چەمپيونى, اتى «قازاقستاننىڭ 100 جاڭا ەسىمى» تىزىمىنە كىرگەن دەنيس كۋزين, اربادا وتىرىپ بيلەۋدەن الەم چەمپيوناتىنىڭ 2 رەت قولا جۇلدەگەرى ماليكە مۇحتاروۆا, قازاقستان فۋتبولىنىڭ چەمپيونى, ۇلتتىق قۇراما كاپيتانى نۇربول جۇماسقاليەۆ, تاعى باسقالار بار.
قوستاناي وبلىسىندا مەملەكەتتىك جاستار ساياساتىن قارجىلىق قولداۋ دا جىل سايىن ءوسىپ كەلەدى. بيىل بيۋدجەتتەن وسى ماقساتقا 190 ميلليون تەڭگە ءبولىندى.
ءنازيرا جارىمبەت,
«ەگەمەن قازاقستان»
قوستاناي
