مەملەكەت باسشىسىنىڭ ماراپاتى مۇناي-گاز سالاسىنداعى بارلىق قىزمەتكەرلەرگە دەگەن قۇرمەتى دەپ بىلەمىن.
تاۋەلسىزدىكتىڭ العاشقى جىلدارىندا ىرگەسى قالانعان «تەڭىزشەۆرويل» جشس بۇگىنگە دەيىن ءبىراز جەتىستىكتەرگە جەتتى. مۇناي ءوندىرۋ جىلىنا 27,5 ملن تونناعا دەيىن ءوستى. كومپانيا قازاقستاندىق قامتۋ ماسەلەسىنە ايرىقشا كوڭىل ءبولىپ كەلەدى. تشو 1993 جىلدان بەرى وتاندىق كومپانيالاردىڭ 22,9 ملرد اقش دوللارىنا تەڭ تاۋارلارى مەن قىزمەتتەرىن پايدالاندى. قازىر ءىرى كاسىپورىندا 20 مىڭنان استام قازاقستاندىق مامان جۇمىس ىستەيدى. العاشقى جىلدارى مامانداردىڭ كوپشىلىگى شەتەلدىكتەر بولدى, ءتىپتى قاراپايىم جۇمىسشىلار دا مۇحيت اسىپ قازاق جەرىنە ناپاقا ىزدەپ كەلگەن ەدى. قازىر قاتارداعى قىزمەتكەرلەر عانا ەمەس, باسشىلىق لاۋازىمداعى ازاماتتار دا وتاندىق ماماندارمەن الماستىرىلدى. بۇل ىستە مەملەكەت تاراپىنان قاداعالاۋ مەن قولداۋ بولعانى ءبىزدىڭ جىگەرىمىزدى جانىدى. قازاق جىگىتتەرى مەن قىزدارىنىڭ دا مۇناي-گاز سالاسىن يگەرۋگە دەگەن ىنتاسى وياندى. قازىر كومپانياداعى باسشىلىق قىزمەتتەگى ازاماتتاردىڭ 70 پايىزى قازاقستاندىقتار. ەندى ءبىر بەس جىلدا بۇل كورسەتكىش ءتىپتى كوبەيەرى انىق. مەن ەلىمىزدىڭ مۇنايدى ءوندىرىپ قانا قويماي, وڭدەۋشى رەتىندە دە نارىققا شىققانىن ارماندايمىن. جاستار وسى ماقساتتا ءبىلىم السا, ەڭبەك ەتسە, الىنبايتىن قامال جوق.
مىنە, تاعى ءبىر جىل ەسىگىمىزدەن ەنگەلى تۇر. 2017 جىل ەلىمىز ءۇشىن جاقسى جاڭالىقتارعا, جاسامپاز جەتىستىكتەرگە تولى بولدى. ەلباسى قولىنان جوعارى ماراپات الۋىم دا عۇمىرىما ساۋلەلى ءسات سىيلادى. كەلەر جىلدان ءۇمىت كوپ. باستىسى, ەلىمىز تىنىش, ەلباسىمىز امان بولسىن. جاڭا جىلدان دا جاقسىلىقتار كۇتەمىز.
رۋسلان قۋاتوۆ,
«قازاقستاننىڭ ەڭبەك ەرى»,
«تەڭىزشەۆرويل» جشس مەنەدجەرى
