جىلۋ بەرۋ ماۋسىمى تۋرالى ەنەرگەتيكا ءمينيسترى قانات بوزىمباەۆ پەن ينۆەستيتسيالار جانە دامۋ ءمينيسترى جەڭىس قاسىمبەك باياندادى. ەنەرگەتيكا ءمينيسترىنىڭ ايتۋىنشا, قازاقستاندىق تۇتىنۋشىلار ەلەكتر جانە جىلۋ قۋاتىمەن تولىق كولەمدە قامتاماسىز ەتىلگەن. ورتالىق جانە جەرگىلىكتى اتقارۋشى ورگاندار 5 قازاندا وتكەن ۇكىمەت وتىرىسىندا ايتىلعان كەمشىلىكتەردى جويۋ بويىنشا ءتيىستى شارالار جۇرگىزگەن.
«ەلەكتر ستانسالارىندا بيىلعى جىلعا جوسپارلانعان جوندەۋ جۇمىستارى اياقتالدى. 8 ەنەرگەتيكالىق بلوك, 57 قازاندىق, 35 تۋربينا, سونداي-اق 24 مىڭ شاقىرىم ەلەكتر جەلىسى جوندەلدى», دەدى ق.بوزىمباەۆ. جالپى العاندا, وتاندىق ەلەكتر ستانسالارىنىڭ وتىن قويمالارىندا 4,3 ملن توننادان استام كومىر جانە 111 مىڭ توننا مازۋت جينالعان, بۇل بەكىتىلگەن نورمالارعا سايكەس كەلەدى. ورتالىق جىلۋمەن قامتۋ اۋماقتارىنىڭ قازاندىقتارىندا كومىر قورى 792,4 مىڭ توننانى, مازۋت – 108 مىڭ توننانى قۇرايدى.
ءوز كەزەگىندە ينۆەستيتسيالار جانە دامۋ ءمينيسترى ج.قاسىمبەك كومىر تاسىمالداۋدىڭ جايىن مالىمدەدى. بۇگىنگى تاڭدا قازاقستاندا كومىر تاسىمالداۋعا ارنالعان اشىق ۆاگون پاركى 50 مىڭنان استام بىرلىكتى قۇرايتىنىن, جىلىتۋ ماۋسىمىنا دايىندىق باستالعاننان بەرى 43,5 ملن توننادان استام كومىر تاسىمالدانعانىن, بۇل جوسپاردىڭ 98 پايىزىن قۇرايتىنىن اتاپ ءوتتى.
«تاسىمالداۋدى تولىق قامتاماسىز ەتۋ ءۇشىن جۇك جونەلتۋشىلەر, جۇك الۋشىلار مەن تاسىمالداۋشى اراسىندا ىشكى رەسپۋبليكالىق تاسىمالدا جۇك جونەلتۋ بويىنشا تىكەلەي ۇزاق مەرزىمدى كەلىسىمشارتتار جاسالدى. جازعى ۋاقىتتا كومىر تاسىمالداۋ كولەمىنىڭ تەڭ ءبولىنۋى قامتاماسىز ەتىلدى», دەدى مينيستر.
جىلىتۋ ماۋسىمى وڭىرلەردە دە شتاتتىق رەجيمدە ءجۇرىپ جاتىر. قازىرگى جاعداي تۋرالى وبلىس اكىمدەرى مەن الماتى, استانا قالالارىنىڭ اكىمدەرى قوسىمشا باياندادى. ماسەلەنى قاراۋ قورىتىندىسى بويىنشا پرەمەر-مينيستر ءتيىستى مينيسترلىكتەر مەن جەرگىلىكتى اتقارۋشى ورگاندارعا جىلۋ بەرۋ ماۋسىمىنىڭ ءوتۋ بارىسىن تۇراقتى باقىلاۋدا ۇستاۋدى تاپسىردى.
«ەكسپو-2017» كورمەسىندە كورسەتىلگەن تەحنولوگيالاردى ەنگىزۋ بويىنشا جۇرگىزىلىپ جاتقان جۇمىستار تۋرالى ەنەرگەتيكا ءمينيسترى ق.بوزىمباەۆ پەن ءبىلىم جانە عىلىم ءمينيسترى ەرلان ساعاديەۆ باياندادى.
ق.بوزىمباەۆ ايتىپ وتكەندەي, ەنەرگەتيكا مينيسترلىگىنىڭ ساراپتامالىق جۇمىس توبى ءتورت باعىت بويىنشا «ەكسپو» كورمەسىنىڭ شەتەلدىك پاۆيلوندارىندا كورسەتىلگەن 105 شەتەلدىك جانە 28 وتاندىق تەحنولوگيانى ىرىكتەدى.
بۇل ءتىزىم ۇلتتىق جانە جەكەمەنشىك كومپانيالارعا, سونداي-اق اكىمدىكتەرگە تەحنولوگيالاردى قاراستىرۋ جانە ىرىكتەۋ ءۇشىن جىبەرىلدى. بۇدان وزگە, بارىنشا اقپاراتتاندىرۋ ماقساتىندا تەحنولوگيالار ءتىزىمى بايلانىس اقپاراتتارىمەن قوسا ەنەرگەتيكا مينيسترلىگىنىڭ سايتىندا جاريالاندى.
«اكىمدىكتەر قازىرگى ۋاقىتتا ەنگىزۋ ءۇشىن 40 تەحنولوگيانى ىرىكتەپ الدى, ونىڭ تورتەۋى 2018 جىلى ەنگىزىلەدى. ۇلتتىق كومپانيالار ەنگىزۋ ماقساتىندا 15 تەحنولوگيانى ىرىكتەپ الدى, ونىڭ ەكەۋى 2018 جىلى ەنگىزىلەدى», دەپ اتاپ ءوتتى مينيستر. ەنەرگەتيكا ءمينيسترىنىڭ ايتۋىنشا, تەحنولوگيالار ءتىزىمى ءالى ناقتىلانادى.
ءبىلىم جانە عىلىم ءمينيسترى ەرلان ساعاديەۆ ءوز كەزەگىندە «ەكسپو-2017» حالىقارالىق كورمەسى قازاقستاندىق عىلىمدا, تەحنولوگيالار ترانسفەرتى مەن ءبىلىم بەرۋدى دامىتۋدا جاڭا يدەيالاردىڭ تۋىنداۋىنا قۋاتتى سەرپىن بەرگەنىن اتاپ ءوتتى.
ماسەلەنى قاراۋ قورىتىندىسى بويىنشا پرەمەر-مينيستر باقىتجان ساعىنتاەۆ وبلىستاردىڭ اكىمدىكتەرىنە جاڭا تەحنولوگيالاردى ەنگىزۋ كەزەڭىنە كوشۋ بويىنشا جۇمىستى جالعاستىرۋدى تاپسىردى.
ۇكىمەت وتىرىسىندا اقپارات جانە كوممۋنيكاتسيالار ءمينيسترى داۋرەن اباەۆ قازاقستاندا «اقىلدى قالالار» جوبالارىن ىسكە اسىرۋ بويىنشا قابىلدانىپ جاتقان شارالار تۋرالى باياندادى. اتاپ وتكەندەي, Smart City تۇجىرىمداماسى بارلىق قالالىق قىزمەتتەردىڭ تيىمدىلىگىن ارتتىرۋعا باعىتتالعان.
«تسيفرلى قازاقستان» مەملەكەتتىك باعدارلاماسىنىڭ نەگىزگى كورسەتكىشتەرىنىڭ ءبىرى – ەلىمىزدىڭ بەس ءىرى قالاسىندا – Smart Astana, Smart Karagandy, Smart Ontystuk, Smart Almaty, Smart Aktobe سەكىلدى Smart City-ءدى دامىتۋ», دەدى د.اباەۆ. اتالعان جوبالاردىڭ باستى ورىنداۋشىلارى – وڭىرلەر اكىمدىكتەرى.
مينيستر مەملەكەتتىك باعدارلاما اياسىندا «اقىلدى قالالاردىڭ» تيپتىك تۇجىرىمداماسى ازىرلەنگەنىن اتاپ ءوتتى. وندا ينتەرنەت زاتتار, جاساندى زەردە جانە ت. ب. سەكىلدى الدىڭعى قاتارلى تەحنولوگيالاردى قولداناتىن جوبالاردىڭ ءتىزىمى كەلتىرىلگەن. سونداي-اق, قۇجات Smart City تەحنولوگيالارىن ەنگىزۋدىڭ نەگىزگى قاعيدالارىن, تاسىلدەرىن, ماقساتتارىن, باسىمدىقتارى مەن مىندەتتەرىن انىقتايدى.
«جوبالار مەملەكەت-جەكەمەنشىك ارىپتەستىك, اقپاراتتاندىرۋدىڭ سەرۆيستىك مودەلى, بيۋدجەتتىك قارجىلاندىرۋ جانە جەكە ينۆەستيتسيالار شەڭبەرىندە جۇزەگە اسىرىلاتىن بولادى. سونىمەن قاتار جوبالاردى بەنچماركينگتى پايدالانۋ, ياعني ۇزدىك الەمدىك جانە وتاندىق تاجىريبەگە باعدارلاۋ ارقىلى جۇزەگە اسىرۋ جوسپارلانعان», دەدى د.اباەۆ.
جيىندا بۇدان ارى استانا قالاسىنىڭ اكىمى اسەت يسەكەشەۆ, الماتى اكىمى باۋىرجان بايبەك جانە قاراعاندى وبلىسىنىڭ اكىمى ەرلان قوشانوۆ Smart City جوبالارىن ەنگىزۋدىڭ ايماقتىق تاجىريبەسى مەن ىسكە اسىرىلۋ بارىسى تۋرالى ايتىپ بەردى.
ال وتىرىستىڭ كۇن تارتىبىندەگى كەلەسى ماسەلە – زاڭ جوبالاۋ جۇمىستارىنىڭ 2017 جىلعا ارنالعان جوسپارىنىڭ ورىندالۋ بارىسى جانە 2018 جىلعا ارنالعان جوسپارىنىڭ جوباسى تۋرالى ادىلەت ءمينيسترى مارات بەكەتاەۆ باياندادى. مينيستر ۇكىمەتتىڭ زاڭ جوبالاۋ جۇمىستارىنىڭ 2017 جىلعا ارنالعان جوسپارىمەن 28 زاڭ جوباسىن ازىرلەۋ كوزدەلگەنىن, جىل بويى ەنگىزىلگەن تۇزەتۋلەردى ەسكەرە وتىرىپ, 22 زاڭ جوباسىن ازىرلەۋ جوسپارلانعانىن جەتكىزدى. ماسەلەنى قاراۋ قورىتىندىسى بويىنشا زاڭ جوبالاۋ جۇمىستارىنىڭ 2018 جىلعا ارنالعان جوسپارى ءبىراۋىزدان بەكىتىلدى. سونداي-اق ۇلتتىق بانك توراعاسى دانيار اقىشەۆ ۆاليۋتانى رەتتەۋ جانە ۆاليۋتانى باقىلاۋ ماسەلەلەرى جونىندەگى زاڭ جوباسىن تانىستىردى. ناتيجەسىندە ۇسىنىلعان زاڭ جوباسى قابىلداندى, ەندى پارلامەنت قاراۋىنا جىبەرىلەدى.
دينارا بىتىك,
«ەگەمەن قازاقستان»
