فورۋم بارىسىندا «اتوم سالاسىنىڭ قوعامداعى تيىمدىلىگىن قالىپتاستىرۋداعى ايەل ادامداردىڭ الاتىن ورنى: حالىقارالىق جانە رەسەيلىك تاجىريبە» اتتى دوڭگەلەك ۇستەل ۇيىمداستىرىلدى. دوڭگەلەك ۇستەلدى ماگاتە-ءنىڭ اتوم ەنەرگياسى بويىنشا دەپارتامەنت باسشىسى, باس ديرەكتوردىڭ ورىنباسارى ميحايل چۋداكوۆ پەن «اتوم سالاسىنداعى ايەلدەر» (Women in Nuclear Russia) حالىقارالىق ۇيىمىنىڭ رەسەيدەگى ءبولىمىنىڭ جەتەكشىسى الەنا ياكوۆلەۆالار اشىپ, ۇيلەستىرۋشىلەر رەتىندە جۇرگىزىپ وتىردى.
ايتۋلى شراعا ەلىمىزدىڭ اتىنان قاتىسقان قازاقستاننىڭ يادرولىق قوعامىنىڭ ديرەكتورى ناتاليا جدانوۆا «اتوم ەنەرگەتيكاسىنىڭ قوعامدىق تيىمدىلىگى جانە ايەل-ماماندار» تاقىرىبىندا عىلىمي بايانداما جاسادى. ناتاليا جدانوۆانىڭ ايتۋىنشا, قازاقستانداعى يادرولىق سالانىڭ ءوسىپ-وركەندەۋى, بەيبىت اتومنىڭ دامۋى تىكەلەي ەلباسى نۇرسۇلتان نازارباەۆتىڭ تاپسىرماسىمەن جۇزەگە اسىپ جاتىر. وسى سالادا ەڭبەك ەتەتىن, عىلىمي زەرتتەۋ جاسايتىن مامانداردىڭ قاتارىندا ەر ادامدارمەن بىرگە ايەلدەردىڭ دە قاتارى كوبەيىپ كەلەدى. نازىك جاندى حانىمدارىمىزدىڭ عىلىمي جەتىستىگى جوعارى, اتوم سالاسىنداعى دالدىك پەن ناقتىلىقتى تەرەڭ يگەرگەن.
-ايەل ادامداردىڭ بۇگىنگى قوعامدا الاتىن ورنى زور,-دەدى قازاقستاننىڭ يادرولىق قوعامىنىڭ لديرەكتورى ناتاليا جدانوۆا,-ءبىزدىڭ ەلىمىزدىڭ يادرولىق عىلىم سالاسىندا ەڭبەك ەتىپ جۇرگەن قىز-كەلىنشەكتەر كوپ. اسىرەسە جاستارىمىزدى الىپ قارايىق, بۇگىندە قىز-جىگىتتەردىڭ ارا سالماعى بىردەي, 50 پايىز ەر ازاماتتار بولسا, 50 پايىزىن قۇرايتىن قىز بالالارىمىز جاقسى كورسەتكىشكە جەتىپ وتىر. ايەل ادامدار وتباسى, وشاق قاسىنىڭ ۇيىتقىسى بولىپ ءجۇرىپ تە, اتوم سالاسىنىڭ بىلىكتى مامانى اتانۋدا. سەبەبى ايەلدەر تۋمىسىنان پەداگوگ بولاتىندىقتان كۇردەلى تەحنيكالىق, تەحنولوگيالىق ساتتەردى قوعامعا ەركىن ءارى جەڭىل ءتۇسىندىرىپ بەرە الادى.
ناتاليا جدانوۆانىڭ ايتۋىنشا, ءوزى قازاقستان اتىنان بارعان اتوم سالاسىندا ەڭبەك ەتۋشى بىردەن-ءبىر ايەل ادام رەتىندە ەلباسىمىزدىڭ باستاماسىمەن قولعا الىنىپ جاتقان جۇمىستار لەگى جايلى ايتىپ, حالىقارالىق جيىنعا قاتىسۋشىلاردى كەڭىنەن اقپاراتتاندىرعان ەكەن. سەمەي يادرولىق سىناق پوليگونى جابىلعاننان كەيىن, زارداپ شەككەن ەل مەن جەردى ساۋىقتىرۋدا كۋرچاتوۆتاعى ۇلتتىق يادرولىق ورتالىقتىڭ اتقارىپ جاتقان كوپتەگەن ماڭىزدى شارالارىنا دا توقتالىپتى. استانادا, الماتىدا, كۋرچاتوۆ قالالارىندا حالىقتى اقپاراتتاندىرۋ, اعارتۋشىلىق سالاسىندا عىلىمي كونفەرەنتسيالار وتكىزىلۋدە. اتوم سالاسىنىڭ ءتيىمدى تۇستارىن حالىققا تۇسىندىرۋدە قازاقستاننىڭ يادرولىق قوعامىنىڭ اتقارىپ وتىرعان جۇمىستارى زور.
راۋشان نۇعمانبەكوۆا
