ۇلتتىق بانك توراعاسى دانيار اقىشەۆتىڭ ايتۋىنشا, جاڭا زاڭ جوباسىنىڭ ماقساتى — قازاقستاننىڭ دۇنيەجۇزىلىك ساۋدا ۇيىمىنا كىرۋى, «قورعاس» شەكارا ماڭى ىنتىماقتاستىعى حالىقارالىق ورتالىعىنىڭ جانە «استانا» حالىقارالىق قارجى ورتالىعىن قۇرۋ جاعدايىندا ۆاليۋتالىق زاڭنامانىڭ جوسپارلى وزگەرۋى.
«زاڭ جوباسىنىڭ باستى مىندەتى – ۆاليۋتالىق وپەراتسيالاردىڭ ستاتيستيكالىق مونيتورينگىن قامتۋدى كەڭەيتۋ جانە قازاقستان اۋماعىندا شەتەل ۆاليۋتاسىن پايدالانۋدى قىسقارتۋ. اتالعان نورمالاردى ىسكە اسىرۋ ۆاليۋتالىق وپەراتسيالار تۋرالى اقپاراتتى تاراتۋدى ۇلعايتادى, ۆاليۋتالىق باقىلاۋدىڭ تيىمدىلىگىن ارتتىرادى, ونىڭ ىشىندە ەلدەن اقشا قاراجاتىن شىعارۋعا قارسى ارەكەتتەردىڭ تيىمدىلىگىن ارتتىرۋعا جول اشادى», — دەدى دانيار اقىشەۆ.
قر ۇلتتىق بانكىنىڭ توراعاسى نەگىزگى وزگەرىستەر رەتىندە مىنالاردى اتاپ ءوتتى: شەتەلدىك ۇيىمداردىڭ بولىمشەلەرىن رەزيدەنت رەتىندە تانۋ; ترانسشەكارالىق سيپاتتاعى ۆاليۋتالىق وپەراتسيالاردىڭ اۋقىمىن كەڭەيتۋ; كاپيتالدى شىعارۋعا باعىتتالعان وپەراتسيالار بويىنشا ۆاليۋتانى باقىلاۋدى كۇشەيتۋ, سونداي-اق قازاقستان اۋماعىندا ۆاليۋتالىق قۇندىلىقتاردىڭ اينالىمىن ءتۇسىندىرۋ جانە رەزيدەنتتەر اراسىندا رۇقسات ەتىلگەن ۆاليۋتالىق وپەراتسيالاردىڭ تىزبەسىن انىقتاۋ. سونىمەن قاتار دانيار اقىشەۆ زاڭ جوباسىندا ليبەرالدىق ۆاليۋتالىق رەجيمنىڭ قاعيدالارىن ساقتاۋ قاراستىرىلعانىن اتاپ ءوتتى.
«ەشقانداي قاتالداندىرۋ جوق, بۇل شارتتاردى قاتالداندىرۋمەن ەشقانداي بايلانىسى جوق جوسپارلى زاڭ جوباسى», — دەپ ءتۇسىندىردى ۇكىمەت وتىرىسىنىڭ قورىتىندىسى بويىنشا جۋرناليستەردىڭ سۇراقتارىنا جاۋاپ بەرگەن قر ۇلتتىق بانكى توراعاسى.
دانيار اقىشەۆتىڭ ايتۋىنشا, قازاقستاننىڭ دسۇ-عا كىرۋىنەن كەيىن بولىمشەلەر مەن وكىلدىكتەر سانىنىڭ ۇلعايۋى كۇتىلەدى, بۇل ەل ىشىندە شەتەل ۆاليۋتاسىنداعى تولەمدەردىڭ ۇلعايۋىنا اكەلەدى, ول ۇلتتىق مۇددەلەرگە سايكەس كەلمەيدى. وسىعان بايلانىستى قازاقستاندىق كونتراگەنتپەن شەتەلدىك ۇيىمدار بولىمشەلەرىنىڭ ەسەپتەرىن تەڭگەگە اۋدارۋ ۇسىنىلادى. سونىمەن بىرگە وسى زاڭنىڭ ەنگىزىلۋىنە دەيىن قول قويىلعان شارتتارعا قاتىستى جاعدايدىڭ ناشارلاۋىنا ەش سەبەپ جوق.
«زاڭ جوباسىنىڭ ەنگىزىلۋ مەرزىمى – 2019 جىلعى 1 شىلدە», — دەدى قورىتىندىلاي كەلە دانيار اقىشەۆ.
قاراۋ ناتيجەسى بويىنشا ۇسىنىلعان زاڭ جوباسى ءبىراۋىزدان قابىلداندى جانە قر پارلامەنتىنە جىبەرىلەدى.
