پارلامەنت سەناتى قارجى جانە بيۋدجەت كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسىنىڭ ۇكىمەتى مەن يرلانديا ۇكىمەتى اراسىنداعى تابىسقا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋدان جالتارۋعا جول بەرمەۋ تۋرالى كونۆەنتسيانى جانە وعان حاتتامانى راتيفيكاتسيالاۋ تۋرالى» زاڭ جوباسى قارالدى.
2017 جىلعى 26 ساۋىردە استانادا قول قويىلعان كونۆەنتسيا قازاقستان مەن يرلانديا اراسىندا ينۆەستيتسيالار ءۇشىن قولايلى جاعدايلار جاساۋ ارقىلى ەكونوميكالىق ىنتىماقتاستىقتى نىعايتۋعا جانە كەڭەيتۋگە باعىتتالعان.
كونۆەنتسيا ەكىجاقتى حالىقارالىق شارت بولىپ تابىلادى جانە قوسارلانعان سالىق سالۋدى جويۋ ماقساتىندا جاسالدى. كونۆەنتسياعا قاتىسۋشى مەملەكەتتەردىڭ ارقايسىسى سالىق تولەۋشىگە ءبىر رەت – ۋاعدالاسۋشى مەملەكەتتىڭ بىرىندە عانا سالىق تولەۋ مۇمكىندىگىن قامتاماسىز ەتەدى. ەكىنشى مەملەكەت تولەنگەن سالىق سوماسىنا ەسەپكە جاتقىزۋدى بەرەدى نەمەسە سالىق سالىناتىن جيىنتىق تابىستان ەكىنشى مەملەكەتتە سالىق سالۋ جۇرگىزىلگەن تابىستىڭ بولىگىن الىپ تاستايدى.
كونۆەنتسيادا ولارعا سايكەس ديۆيدەندتەرگە, پايىزدارعا جانە رويالتيگە تومەندەتىلگەن مولشەرلەمەلەر بويىنشا تابىس كوزى پايدا بولاتىن مەملەكەتتە سالىق سالىنۋى مۇمكىن ەرەجەلەر كوزدەلگەن.
زاڭ جوباسى پالاتانىڭ قاراۋىنا جىبەرىلدى.
