قانات بوزىمباەۆ ايتىپ وتكەندەي, ەنەرگەتيكا مينيسترلىگىنىڭ ساراپتامالىق جۇمىس توبى ءتورت باعىت بويىنشا «ەكسپو» كورمەسىنىڭ شەتەلدىك پاۆيلوندارىندا كورسەتىلگەن 105 شەتەلدىك جانە 28 وتاندىق تەحنولوگيانى ىرىكتەدى:
● مۇناي جانە گاز — 27 تەحنولوگيا,
● كومىر ونەركاسىبى — 7 تەحنولوگيا,
● ەلەكتر ەنەرگەتيكاسى, ەنەرگيانى ۇنەمدەۋ جانە جەك — 63 تەحنولوگيا,
● ەكولوگيا (قالدىقتاردى باسقارۋ, سۋ تازالاۋ, اۋا ساپاسىن باقىلاۋ) — 36 تەحنولوگيا.
بۇل ءتىزىم ۇلتتىق جانە جەكەمەنشىك كومپانيالارعا, سونداي-اق اكىمدىكتەرگە تەحنولوگيالاردى قاراستىرۋ جانە ىرىكتەۋ ءۇشىن جىبەرىلدى. بۇدان وزگە, بارىنشا اقپاراتتاندىرۋ ماقساتىندا تەحنولوگيالار ءتىزىمى بايلانىس اقپاراتتارىمەن قوسا ەنەرگەتيكا مينيسترلىگىنىڭ سايتىندا جاريالاندى.
«اكىمدىكتەر قازىرگى ۋاقىتتا ەنگىزۋ ءۇشىن 40 تەحنولوگيانى ىرىكتەپ الدى, ونىڭ تورتەۋى 2018 جىلى ەنگىزىلەدى. ۇلتتىق كومپانيالار ەنگىزۋ ماقساتىندا 15 تەحنولوگيانى ىرىكتەپ الدى, ونىڭ ەكەۋى 2018 جىلى ەنگىزىلەدى», — دەپ اتاپ ءوتتى قانات بوزىمباەۆ.
ەنەرگيانى ۇنەمدەۋ, سۋدى تازارتۋ, «اقىلدى جەلىلەر» جانە كاسىپورىنداردا جەك پايدالانۋ بويىنشا تەحنولوگيالار تاڭدالعان.
مۇناي جانە گاز سالاسىندا رەسەي, اقش, قىتاي جانە فينليانديادان 7 تەحنولوگيا انىقتالدى. مىسالعا, قوستاناي وبلىسى اكىمدىگى «سگك-510 گاز تالداۋ قوندىرعىسى» نەمىس تەحنولوگياسىن 2018 جىلى ەنگىزۋدى جوسپارلاۋدا. وسى تەحنولوگيانى ەنگىزۋ ارقىلى گازدى تۇتىنۋ ازايادى, بۇل جىلىنا 40 ملن تەڭگەگە جۋىق ۇنەمدەۋگە مۇمكىندىك بەرەدى.
«ەلەكتر ەنەرگەتيكاسى» باعىتى بويىنشا 35 تەحنولوگيا انىقتالدى, ونىڭ ىشىندە اكىمدىكتەر 26 تەحنولوگيانى تاڭدادى. سولاردىڭ ءبىرى — «ۇيالى تەلەفوندارعا ارنالعان تەگىن قۋاتتاۋدىڭ اۆتونومدىق ستانتسيالارى» قىتايلىق تەحنولوگياسى, ول 2018 جىلى سولتۇستىك قازاقستان وبلىسىندا ەنگىزىلەدى. بۇل تەحنولوگيا تۇتىنىلعان ەلەكتر ەنەرگياسىنا جۇمسالاتىن شىعىنداردى جانە قورشاعان ورتاعا جۇكتەمەنى ازايتۋعا مۇمكىندىك بەرەدى. قازىرگى ۋاقىتتا اكىمدىك قىتايلىق Shenzhen كومپانياسىمەن جابدىقتاردى جەتكىزۋ تۋرالى كەلىسىمگە كەلدى.
«ەكولوگيا» باعىتى بويىنشا اكىمدىكتەر تۇرمىستىق جانە ونەركاسىپتىك سارقىندى سۋلاردى تازارتۋ, اۋا ساپاسىن باقىلاۋ جانە قالدىقتاردى باسقارۋ سالاسىندا 10 تەحنولوگيانى تاڭدادى.
ەنەرگەتيكا ءمينيسترىنىڭ ايتۋىنشا, تەحنولوگيالار ءتىزىمى ءالى ناقتىلانادى.
ءبىلىم ءمينيسترى ەرلان ساعاديەۆ ءوز كەزەگىندە «ەكسپو-2017» حالىقارالىق كورمەسى قازاقستاندىق عىلىمدا, تەحنولوگيالار ترانسفەرتى مەن ءبىلىم بەرۋدى دامىتۋدا جاڭا يدەيالاردىڭ تۋىنداۋىنا قۋاتتى سەرپىن بەرگەنىن اتاپ ءوتتى.
«كورمەنى 55 ۋنيۆەرسيتەت جانە مينيسترلىكتىڭ عزي وكىلدەرى ارالادى. قاتىسۋشى ەلدەردىڭ وكىلدەرىمەن 100-دەن استام كەزدەسۋ مەن كەلىسسوزدەر جۇرگىزىلدى. ىنتىماقتاستىق ورناتۋ تۋرالى 9 مەموراندۋمعا قول قويىلدى. ۋنيۆەرسيتەتتەر ەكىجاقتى ىنتىماقتاستىق تۋرالى 20-دان استام كەلىسىمگە قول جەتكىزدى», — دەپ باياندادى ەرلان ساعاديەۆ.
عزي مەن ۋنيۆەرسيتەتتەر عالىمدارىنىڭ شەتەلدىك ارىپتەستەرمەن, ۋنيۆەرسيتەتتەر جانە كومپانيالارمەن حالىقارالىق بايلانىسى ەداۋىر جانداندى. جوو-لار مەن ۆەدومستۆوعا قاراستى عزي 25 عىلىمي-زەرتتەۋ جوبالارى مەن باعدارلامالارىن دايارلاۋ مەن ىسكە اسىرۋدى جۇرگىزىپ جاتىر.
«12 ءىرى عىلىمي جوبا مەن باعدارلامالاردا جانە 89 گرانتتىق جوبالاردا عىلىمي-تەحنيكالىق باعدارلامالاردى ىسكە اسىرۋ كەزىندە نەگىزگى تاقىرىپ كوزى “ەكسپو-2017” يدەيالارى بولىپ تابىلادى», — دەدى ەرلان ساعاديەۆ.
ماسەلەنى قاراۋ قورىتىندىسى بويىنشا پرەمەر-مينيستر باقىتجان ساعىنتاەۆ وبلىستاردىڭ اكىمدىكتەرىنە جاڭا تەحنولوگيالاردى ەنگىزۋ كەزەڭىنە كوشۋ بويىنشا جۇمىستى جالعاستىرۋدى تاپسىردى.
