ەنەرگەتيكا ءمينيسترىنىڭ ايتۋىنشا, قازاقستاندىق تۇتىنۋشىلار ەلەكتر جانە جىلۋ قۋاتىمەن تولىق كولەمدە قامتاماسىز ەتىلگەن. ورتالىق جانە جەرگىلىكتى اتقارۋشى ورگاندار 05.09.2017 كۇنى وتكەن ۇكىمەت وتىرىسى بارىسىندا انىقتالعان كەمشىلىكتەردى جويۋ بويىنشا ءتيىستى جۇمىستاردى جۇرگىزدى.
«ەلەكتر ستانسالارىندا بيىلعى جىلعا جوسپارلانعان جوندەۋ جۇمىستارى اياقتالدى. 8 ەنەرگەتيكالىق بلوك, 57 قازاندىق, 35 تۋربينا, سونداي-اق 24 مىڭ شاقىرىم ەلەكتر جەلىسى جوندەلدى», — دەدى قانات بوزىمباەۆ.
جالپى العاندا, وتاندىق ەلەكتر ستانسالارىنىڭ وتىن قويمالارىندا 4,3 ملن توننادان استام كومىر جانە 111 مىڭ توننا مازۋت جينالعان, بۇل بەكىتىلگەن نورمالارعا سايكەس كەلەدى. ورتالىق جىلۋمەن قامتۋ اۋماقتارىنىڭ قازاندىقتارىندا كومىر قورى 792,4 مىڭ توننانى (نورماتيۆ – 442,7 مىڭ توننا), مازۋت – 108 مىڭ توننانى (نورماتيۆ – 83,6 مىڭ توننا) قۇرايدى.
«2017-2018 جج. كۇزگى-قىسقى كەزەڭ باستالعاننان بەرى بىرىڭعاي ەلەكتر ەنەرگەتيكالىق جۇيە ەلەۋلى تەحنولوگيالىق بۇزۋشىلىقتارسىز جۇمىس ىستەپ تۇر», — دەدى قانات بوزىمباەۆ.
ءوز كەزەگىندە ينۆەستيتسيالار جانە دامۋ ءمينيسترى جەڭىس قاسىمبەك كومىر تاسىمالداۋ جاعدايى تۋرالى مالىمدەدى. بۇگىنگى تاڭدا قازاقستاندا كومىر تاسىمالداۋعا ارنالعان اشىق ۆاگون پاركى 50 مىڭنان استام بىرلىكتى قۇرايدى. جىلىتۋ ماۋسىمىنا دايىندىق باستالعاننان بەرى 43,5 ملن توننادان استام كومىر تاسىمالداندى, بۇل جوسپاردىڭ 98 پايىزىن قۇرايدى.
«تاسىمالداۋدى تولىق قامتاماسىز ەتۋ ءۇشىن جۇك جونەلتۋشىلەر, جۇك الۋشىلار مەن تاسىمالداۋشى اراسىندا ىشكى رەسپۋبليكالىق تاسىمالدا جۇك جونەلتۋ بويىنشا تىكەلەي ۇزاق مەرزىمدى كەلىسىمشارتتار جاسالدى. جازعى ۋاقىتتا كومىر تاسىمالداۋ كولەمىنىڭ تەڭ ءبولىنۋى قامتاماسىز ەتىلدى», — دەدى جەڭىس قاسىمبەك.
جىلىتۋ ماۋسىمى وڭىرلەردە دە شتاتتىق رەجيمدە ءجۇرىپ جاتىر. قازىرگى جاعداي تۋرالى وبلىس اكىمدەرى مەن الماتى, استانا قالالارىنىڭ اكىمدەرى باياندادى.
پرەمەر-مينيستر باقىتجان ساعىنتاەۆ ماسەلەنى قاراۋ قورىتىندىسى بويىنشا ءتيىستى مينيسترلىكتەر مەن جەرگىلىكتى اتقارۋشى ورگاندارعا جىلۋ بەرۋ ماۋسىمىنىڭ ءوتۋ بارىسىن تۇراقتى باقىلاۋدا ۇستاۋدى تاپسىردى.
