مەملەكەت باسشىسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» ماقالاسىندا كورسەتىلگەن باسىمدىقتار بويىنشا وبلىس اكىمى جانسەيىت تۇيمەباەۆتىڭ يدەياسىمەن «قاجىمۇقان», «وتىراردى قورعاۋ», «كيەلى قازىعۇرت» اتتى ءۇش انيماتسيالىق فيلم مەن «كونە جەتىگەننىڭ سىرى» اتتى 10 سەريالى تەلەحيكايا ءتۇسىرىلدى.
ءفيلمنىڭ كورسەتىلىمىنە «قازاقفيلم» كينوستۋدياسىنىڭ جانە «قازاقستان انيماتورلار» قاۋىمداستىعىنىڭ وكىلى, وبلىستاعى زيالى قاۋىم وكىلدەرى مەن باق وكىلدەرى جانە شىعارماشىلىق توپ قاتىستى.
وبلىستىڭ تۋريزم سالاسىن دامىتۋعا, اسەم تابيعاتى مەن كيەلى جەرلەرىن جانە دوستىق پەن تاتۋلىقتى ناسيحاتتايتىن تەلەسەريالدىڭ پرەزەنتاتسياسىنا قاتىسقان وبلىس اكىمى جانسەيىت تۇيمەباەۆ ۇلتتىق قۇندىلىعىمىزدى دارىپتەيتىن تۋىندىلاردى ءاردايىم قولدايتىنىن اتاپ ءوتتى.
«ەلباسىمىز نۇرسۇلتان ءابىش ۇلى نازارباەۆ «بولاشاققا باعدار: رۋحاني جاڭعىرۋ» ماقالاسىندا اتاپ كورسەتكەن, تۋعان ەلگە دەگەن سۇيىسپەنشىلىكتى, ەلىمىزدىڭ اسەم تابيعاتى مەن كيەلى جەرلەرىن ناسيحاتتاۋ, ۇلتتىق رۋحىمىزدى بويىمىزعا ءسىڭىرۋ ماقساتىندا تۇسىرىلگەن انيماتسيالىق ءفيلمنىڭ باستى يدەياسى: جاستارعا ونەگە, ۇلگى بولاتىن تۇلعالاردىڭ ءومىرىن ناسيحاتتاۋ, قازاق حالقىنىڭ ماقتانىشىنا اينالعان بالۋان بابامىزدىڭ ەرلىكتەرىن پاش ەتۋ. وسكەلەڭ ۇرپاقتىڭ جۇرەگىندە ماقتانىش سەزىمىن وياتىپ, پاتريوتتىققا تاربيەلەۋ. جالپى, ءبىز ءوز مادەنيەتىمىزدى, ۇلتىق ەرەكشەلىگىمىز بەن تەرەڭ تاريحىمىزدى كەلەر ۇرپاققا ءسىڭىرۋ ءۇشىن وسىنداي فيلمدەردى كوپتەپ شىعارۋىمىز قاجەت! وڭتۇستىك قازاقستان ءوڭىرىنىڭ بۇل باعىتتا تىڭ قادامدار جاساپ جاتقانى, ەلباسىمىزدىڭ ايتىپ جۇرگەن ۇلتتىق سانامىزدىڭ قالىپتاسۋىنا, ۇلتتىق كودىمىزدىڭ ساقتالۋىنا ۇلكەن ۇلەسىن قوسارى انىق. بۇگىنگى كينو كورەرمەندەردىڭ جۇرەگىنە جول تاباتىنىنا سەنىمىم مول!»,-دەدى اكىم.
وسى رەتتە, كينونىڭ رەجيسسەرى نۋريددين پاتتەەۆ «ساق» كينوستۋدياسى اتىنان جانە بۇكىل قازاقستان كينوگەرلەرىنىڭ اتىنان شىن ريزاشىلىعىن ءبىلدىرىپ, ەستەلىككە كينوداعى وقيعانى وربىتكەن - كونە جەتىگەندى تابىس ەتتى.
بۇل جوبالار وڭتۇستىك ءوڭىرىنىڭ عانا ەمەس, ەلىمىزدىڭ كينو جانە انيماتسيا سالاسى بويىنشا ايتۋلى تۋىندىلار قاتارىنا كىرەرى ءسوزسىز.وڭتۇستىك قازاقستان وبلىسىنىڭ ءيميدجىن كوتەرىپ, تاريحىن جاڭعىرتىپ, ءتۋريزمىن دامىتۋعا باعىتتالعان «كونە جەتىگىننىڭ سىرى» اتتى 10 سەريالى كينوجوباسى رەسپۋبليكالىق ارنالاردان كورسەتىلەتىن بولادى.
ءفيلمنىڭ باستى ماقساتى وڭىردەگى تۇركىستان, ارىستان باب, وتىرار, ساۋران, سايرام سەكىلدى كونە جەرلەر مەن اقسۋ-جاباعىلى قورىعى, قازىعۇرت تاۋى, وگەم تابيعي قورىعى سەكىلدى تابيعاتى اسەم جەرلەردى كورسەتىپ, رۋحىمىزدى جاڭعىرتۋ, تاريحتى ۇعىندىرۋ ارقىلى ەلجاندىلىققا تاربيەلەۋ جانە ءوڭىردىڭ تۋريزم سالاسىن دامىتۋ بولىپ تابىلادى.
فيلم وڭتۇستىك قازاقستان وبلىسىندا جول جوندەۋ جۇمىسىمەن اينالىسىپ جاتقان ەكسكوۆاتورشىلاردىڭ كەزدەيسوق كونە جەتىگەن اسپابىن تاۋىپ الۋ ساتىنەن باستاۋ الادى. ىشەكتەرى مەن اسىقتارى جوق بۇل اسپاپتىڭ سىرتقى بەتىنەن ەسكى كونە تۇركى ارىپتەرىمەن جازىلعان جازۋدىڭ ىزدەرى كورىنەدى. ءفيلمنىڭ باستى كەيىپكەرى ونەر اكادەمياسىنىڭ ستۋدەنتى – سامال بۇل حاباردى ەستىپ, جەتىگەنمەن تەرەڭىرەك تانىسۋ ءۇشىن ارناي شىمكەنتكە كەلەدى. جەتىگەندى تابۋعا ونىڭ جىگىتى نۇرجان كومەكتەسەدى. ال, ايداردىڭ دوسى – ارحەولوگ جاندوس سول جەتىگەندەگى كونە جازۋلاردى وقىپ, قۇپياسىن اشادى. سول ساتتەن باستاپ, ولاردىڭ ومىرىندە شىم-شىتىرىق, حيكاياعا تولى وقيعالار باستالىپ كەتەدى. ويتكەنى, جەتىگەندى وزگە دە تەرىس پيعىلدى جاندار ىزدەپ كەلگەن بولاتىن.
ەسكە سالا كەتەيىك, «ەكسپو-2017» حالىقارالىق مامانداندىرىلعان كورمەسى كەزىندە وتكەن وڭتۇستىك قازاقستان وبلىسىنىڭ استانا قالاسىنداعى كۇندەرى اياسىندا قازاقتىڭ نامىسىن, رۋحىن جانە قارا كۇشىن بۇكىل الەمگە تانىتقان قاجىمۇقان اتامىزدىڭ ومىرىنە ارنالعان «كۇش اتاسى – قاجىمۇقان» انيماتسيالىق ءفيلمىنىڭ تۇساۋى كەسىلگەن بولاتىن. ال, «وتىراردى قورعاۋ» انيماتسيالىق ءفيلمىنىڭ پرەزەنتاتسياسى كەلەر جىلدىڭ باسىندا وتەدى دەپجوسپارلانۋدا.
