جىل سايىنعى قالىپتاسقان داستۇرگە سايكەس بيىلعى كەشتىڭ قادىرلى قوناعى قازاقستاننىڭ ەڭبەك سىڭىرگەن قايراتكەرى, اقىن ءجۇرسىن ەرمان بولدى. ودان وزگە رۋحانيات جاناشىرى رىمبالا وماربەكوۆا باستاعان ەل اعالارى بايگەتوبەنىڭ ءسانىن كىرگىزىپ وتىردى. رىمبالا كەنجەبالاقىزى تەك قانا كورەرمەندەر قاتارىندا وتىرماي, جاس قالامگەرلەردى ىنتالاندىرۋ ماقساتىندا دايارلاعان سىي-سىياپاتىن قوسا اكەلىپتى. وسىناۋ يگىلىكتى ءىس-شارانىڭ وتكىزىلۋىنە بەلگىلى ايتىسكەر اقىن ايتباي جۇماعۇلوۆ مۇرىندىق بولدى. ءبىر ايتا كەتەرلىگى, اتالمىش جىر ءمۇشايراسىنىڭ جەڭىمپازىن سايىسقا قاتىسۋشى اقىنداردىڭ وزدەرى ءبىر-بىرىنە داۋىس بەرۋ ارقىلى انىقتادى. وسى رەتتە ءبىز التى جىل بويى ارقا اقىندارىن ارداقتاپ, جۇمابەكتەي اسىل ەردىڭ اتىن اسقاقتاتىپ جۇرگەن جانى جومارت كاسىپكەر, شارۋا دەمەۋشىسى ساپار يپكەەۆ مىرزانى ايتا كەتكەنىمىز ءجون. كاسىپكەر ءمۇشايرا قورىتىندىسىنا سايكەس, جىر بايگەسىندە جەڭىسكە جەتكەن ايزادانىڭ جاقىن ۋاقىتتا جىر كىتابىن جارىققا شىعارىپ بەرەتىن بولادى. سونداي-اق «سىرشىل اقىن» اتالىمىنا قارمۋ-دىڭ ستۋدەنتى, جاس اقىن ەرىك نارىن يە بولدى. ال «جىلدىڭ ۇزدىك جازۋشىسى» اتالىمىنا بەكزات التىنبەك ەسىمدى جاس جازۋشى لايىق دەپ تانىلدى. «جىلدىڭ ۇزدىك قايراتكەرى» اتالىمىن جۋرناليست, وبلىستىق «ورتالىق قازاقستان» گازەتى باس رەداكتورىنىڭ ءبىرىنشى ورىنباسارى ەرسىن مۇسابەك ەنشىلەدى. ال «جىلدىڭ ۇزدىك ايتىسكەر اقىنى» نۇرمۇحامەد بايسۇگىروۆ بولدى.
«بۇعان دەيىن دە ءوزىمنىڭ جىلى ءسوزىمدى جەتكىزدىم. وعان وزدەرىڭىز دە كۋاسىزدەر. جاساندى دۇنيە ەمەس, شىن كوڭىلىمنەن ايتتىم ونى. پوەزيادا بۇرىلىس جاساۋ دەگەن بولاشاعىنان زور ءۇمىت كۇتتىرەتىن اقىننىڭ عانا قولىنان كەلەدى. سونداي بۇرىلىستى مەن ايزادانىڭ جىرىنان كوردىم. قاناتىڭ تالماسىن, اينالايىن», دەپ تىلەگىن ءبىلدىردى ءجۇرسىن ەرمان.
ميراس اسان,
«ەگەمەن قازاقستان»
قاراعاندى وبلىسى
