قوستانايداعى گەولوگيالىق مۋزەيدە حح عاسىر گەولوگتارىنىڭ ءححى عاسىرداعى ارىپتەستەرىنە جازعان حاتى سالىنعان قۇتى-كاپسۋلانى اشۋ ءراسىمى ءوتتى. ولار 1967 جىلى 7 جەلتوقساندا كەن جىنىسىندا كەزدەسەتىن كالتسيفير, رودينگيت, پورفيريت سياقتى تاستاردان كريستالل مولەكۋلاسى پىشىنىندە ساندىقشا جاساپ, ونى ءمارمار تاستىڭ ۇستىنە ورناتىپ, سىرتىنا «گەولوگتاردىڭ بولاشاق ۇرپاقتارىنا. 2017 جىلى اشىلسىن» دەپ جازعان ەكەن. قۇتى ىشىنە ۇندەۋ-حات پەن ءوڭىردىڭ پايدالى قازبالار كارتاسى سالىنىپتى. سالا ارداگەرلەرى مەن جاس گەولوگتار الدىندا «سەۆكازنەدرا» ايماقارالىق دەپارتامەنتى جەتەكشىسىنىڭ ورىنباسارى تالعات يساسەيىتوۆ كاپسۋلانى اشىپ, ۇندەۋ-حاتتى وقىپ بەردى. حات اعا ۇرپاقتىڭ سالەمىن, وتكەن عاسىردىڭ ورتاسىندا جەتكەن جەتىستىكتەرىن, بولاشاق ۇرپاققا, ماماندارعا سەنىمىن بايانداعان ءۇش بولىمنەن تۇرادى.
– پايدالى قازبالار كەنىشتەرىنىڭ ارقاسىندا وڭىردە رۋدنىي, ليساكوۆ, ارقالىق, جىتىقارا قالالارى بوي كوتەردى. تاعى دا كوپتەگەن كەنىشتەر اشىلدى. سول جەتىستىكتەردىڭ بارلىعىنا وسى حات يەلەرىنىڭ سىڭىرگەن ەڭبەگى زور بولاتىن, – دەيدى گەولوگيا ارداگەرى, گەولوگيا مۋزەيىنىڭ ديرەكتورى ۆەرا ەدىگەنوۆا.
– وتكەن جىلدار گەولوگيانىڭ «التىن عاسىرى» ەدى. ءبىز ساپاسى وتە جوعارى مينەرال شيكىزاتىن وتە كوپ كولەمدە اشىپ, ءوندىرىپ وتىردىق. ۆاسيلكوۆ كەنىشىنىڭ وزىنەن 350 توننا تازا التىن ءوندىرىلدى. كەڭەس وداعى كەزىندە گەولوگيا ىسىنە جۇمسالعان 1 رۋبل 50 رۋبل پايدا اكەلدى. گەولوگيالىق جۇمىستاردىڭ تيىمدىلىگى دەگەن وسى, – دەپ اتاپ ءوتتى مينەرالدى رەسۋرستار اكادەمياسى سولتۇستىك قازاقستان بولىمشەسىنىڭ توراعاسى ۆيكتور دەينەكا.
حاتتا «تورعاي دالاسى ءححى عاسىردا ءوندىرىسى, اۋىل شارۋاشىلىعى دامىعان, قالالار مەن اۋىلدارى كوركەيگەن, گۇلدەنگەن ءوڭىر بولاتىنىنا سەنەمىز» دەپ جازىپتى حح عاسىردىڭ گەولوگتارى. ءححى عاسىر ەندى باستالدى, مۇمكىن اعا ۇرپاق وكىلدەرىنىڭ بولجامى مەن سەنىمى شىندىققا اينالار ۋاقىت تا جەتەر.
– گەولوگيا ۇرپاقتان ۇرپاققا جالعاسىپ وتىرۋى ءتيىس. ءبىزدىڭ الدىمىزداعى گەولوگيا سالاسى ماماندارىنىڭ قاجىرلى ءىسى بولماعاندا ءبىزدىڭ جەتىستىكتەرگە جەتۋىمىز ەكىتالاي ەدى. گەولوگيا ىسىنە قاي زاماندا دا ەرەكشە كوڭىل ءبولىنۋى ءتيىس, – دەدى گەولوگيا عىلىمدارىنىڭ دوكتورى نيزامي جافاروۆ.
ءداستۇر جالعاسىن تاپتى. قازاقستاننىڭ سولتۇستىك ءوڭىرى گەولوگتارى اتىنان كەلەشەك ۇرپاققا تاعى دا حات جازىلىپ, الگى كاپسۋلاعا قايتا سالىندى. ول ەندى 50 جىلدان كەيىن, 2067 جىلى اشىلاتىن بولادى.
ءنازيرا جارىمبەت,
«ەگەمەن قازاقستان»
قوستاناي
