شىن مانىندەگى مەملەكەتتىلىگىمىزدى بەكىتكەن ءداۋىر, بۇل – تاۋەلسىزدىك ءداۋىرى. تاۋەلسىزدىكتىڭ قالاي كەلگەنى, الماعايىپ الاساپىراننىڭ اراسىندا ءجۇرىپ, تۇساۋىنىڭ قالاي كەسىلگەنى بۇگىنگى كوزىقاراقتى ادام ءۇشىن كوپ دالەلدى كەرەك ەتە بەرمەيتىن داۋسىز-تالاسسىز شىندىق. سول ءداۋىردىڭ باستى قاھارمانى دا, وسى ءداۋىردىڭ اۋىر جۇگىن يىعىنا سالىپ كوتەرگەن نار تۇلعاسى دا, تاريحي تاعدىرلى كەزەڭنەن حالقىمىزدى امان-ەسەن الىپ شىعىپ, ەل ەگەمەندىگىن قامتاماسىز ەتكەن دە ەلباسىمىز نۇرسۇلتان نازارباەۆ. سوندىقتان بۇگىن ارتتا قالعانىمەن, اۋىر جۇكتىڭ تابى ءالى كۇنگە دەيىن ارقاسىندا قالعان سول كەزەڭ تۋرالى قالاي تولعاسا دا, ايتۋعا تولىق مورالدىق حاقى بار ءبىر ادام بولسا, ول ءبىزدىڭ پرەزيدەنتىمىز. ءداۋىر تۋرالى تولعاقتى ءسوزدى, تياناقتى تۇجىرىمدى ايتۋ تەك ءداۋىردىڭ جۇگىن يىعىنا سالىپ كوتەرگەن تۇلعالارعا عانا جاراسادى. قازاق ەلىن الەمدىك كەڭىستىككە الىپ شىققان داۋىرلىك تۇلعا – تاۋەلسىزدىكتىڭ اۆتورى دەگەن ءسوز. تاۋەلسىزدىك تۋىن تىككەن باس قاھارمان رەتىندە بۇكىل جاۋاپكەرشىلىكتى موينىنا الىپ, سىن ساعاتىندا سەنىم ارتقان جۇرتىن العا قاراي جەتەلەي وتىرىپ, تىعىرىقتان جول ىزدەگەن جىلدارداعى ءتۇيىندى, تولعامدى ويىن ەل يگىلىگىنە اينالدىرىپ وتىرعان كىتاپتا نۇرسۇلتان ءابىش ۇلى جەرىنە جەتكىزىپ ايتقان. بۇل كىتاپتى ساياسي ساراپشىلاردىڭ ءوزى «ەل تاۋەلسىزدىگىنىڭ ەنتسيكلوپەدياسى», دەپ باعالاپ جاتىر. بەكەر ەمەس.
العاشقى تاۋەلسىزدىكتىڭ ءدامى قانداي ەدى, حالىق قالاي قابىلدادى, قيىندىق قالاي ەڭسەرىلدى, كىمدەرمەن قانداي تاريحي بايلانىس ورناتتى, مەملەكەت قالاي قالىپتاستى – كوپتىڭ كوز الدىندا ءوتىپ جاتقان بۋىرقانىسقا تولى وقيعالار كىتاپ بەتتەرىنەن اينا-قاتەسىز تىزبەگىن تاۋىپتى. سول سەبەپتى بولار, پرەزيدەنتىمىز باسپا بەتىن جاڭا كورىپ وتىرعان كىتابىنىڭ العاشقى بەتتەرىن ەلەڭ-الاڭ ۋاقىتتا وزىنە تىرەۋ بولعان, ارقا سۇيەگەن حالقىنا راحمەت ايتۋدان باستاپتى. كىشىپەيىلدىلىكپەن ايتىلعان جىلى ءسوز ءىشىڭنىڭ ەڭ قالتارىس-قاراڭعى بۇرىشىنا دا جارىعىن تۇسىرەدى.
26 جىل ىشىندەگى رەسپۋبليكانىڭ جاڭا تاريحى تۋرالى باياندالاتىن كىتاپ پۋبليتسيستيكا جانرىندا جازىلعانىمەن, پرەزيدەنت جاڭا تاريحتى, ەل بولاشاعىن ءوز كوزقاراسىمەن كوركەم پايىمدايدى. بۇگىنگى ۇرپاقتى, اسىرەسە مەنىڭ جاسىمداعى بۋىندى سول كەزەڭدەگى ءار وقيعا, ءار ءسات جاڭعىرتىپ وتىرادى. ال 26 جاستاعى جىگىتتەر مەن قىزدار ءۇشىن كينولەنتادان ءوتىپ جاتقان عاجايىپ ەرتەگى ەلەسى سەكىلدى قابىلدانۋى مۇمكىن. بىراق قازاقستان حالقى ۇلكەن تاريحي سىناقتان ءوتتى. ۇرپاق وسىنى ءبىلۋى كەرەك. ەگەمەندىككە قول جەتكىزگەن العاشقى جىلدارداعى ءار ەرەكشە وقيعانى ەسكەرۋى, جەتىستىك سىرىن سەزىنۋى ماڭىزدى. كىتاپ بۇگىنگى ۇرپاققا ارنالىپ جازىلىپ وتىر. تاۋەلسىزدىگىمىزدى دامىتاتىن, ونى ءارى قاراي ورىستەتەتىن, مەملەكەتتىلىك سيپاتىمىزدى بەدەرلەي تۇسەتىن كەيىنگى بۋىن بالالاردىڭ قولىنا بەرىلگەن رۋحاني كۇشتى قۇرال. سوندىقتان پرەزيدەنتىمىزدىڭ بۇل ەڭبەگىنىڭ رۋحاني كەڭىستىگىمىزدەگى ورنى الابوتەن ەرەكشە قۇندىلىق رەتىندە قابىلدانىپ جاتۋى زاڭدى. «تاۋەلسىزدىك ءداۋىرى» – ءبىر ءداۋىردىڭ ءۇنى, كۇرەتامىرىندا بۇلكىلدەپ سوعىپ جاتقان دەربەستىك ءداۋىرىنىڭ تىنىسى. ءبىزدىڭ ۇلتتىق مەملەكەتىمىزدىڭ بولمىسىن ايعاقتايتىن, شىن ماعىناسىنداعى تاريحتى تانۋعا كومەكتەسەتىن جانە بولاشاق ۇرپاققا سونى قامتاماسىز ەتۋگە جۇمىلدىراتىن ىرگەلى ەڭبەك ەكەنى اقيقات. رۋحاني اينالىمعا ەندىرە وتىرىپ, كىتاپتىڭ ناسيحاتى ارقىلى تاريحتى باعالاۋ, وتانسۇيگىشتىك پەن ۇلتجاندىلىق ۇعىمىن كەڭەيتە ءتۇسۋ كوزدەلگەنى دۇرىس. كىتاپتىڭ سوڭىندا « ۇلى تاريح ۇلى بولاشاقتى تۋدىرادى» دەگەن سويلەمدەر بار. ۇلى بولاشاقتىڭ تاعدىرى ۇلتىن سۇيەتىن جاستارعا بايلاۋلى, ال جاستارىمىزدىڭ جەڭىس پەن جەتىستىكتى كوزدەگەن تاۋەلسىزدىكتىڭ كەشەگى, بۇگىنگى تاريحىنان تاعىلىم العانى دۇرىس دەپ ويلايمىن.
نۇرلان ورازالين,
اقىن-دراماتۋرگ, قازاقستان جازۋشىلار وداعىنىڭ توراعاسى
