سەنات توراعاسى مەملەكەت باسشىسىنىڭ ءىىى سەسسيانىڭ اشىلۋىندا ايتقان تاپسىرمالارىن دەپۋتاتتاردىڭ ورىنداعانىن جانە ءبىزدىڭ ەلىمىز ءۇشىن اسا ماڭىزدى كودەكستەر مەن زاڭدار قابىلدانعانىن ايتتى. ولاردىڭ قاتارىندا سالىق, كەدەن جانە جەر قويناۋى كودەكستەرى, ءۇش جىلدىق بيۋدجەت, قۇقىق قورعاۋ قىزمەتىنىڭ پروتسەستىك نەگىزدەرىن جاڭعىرتۋ, اقپارات جانە كوممۋنيكاتسيالار تۋرالى زاڭدار بار. اكىمشىلىك قۇقىق بۇزۋشىلىق تۋرالى كودەكسكە تۇزەتۋلەردىڭ توپتاماسى ەنگىزىلدى.
ق.توقاەۆ سەناتورلاردى قابىلدانعان زاڭنامالىق اكتىلەردىڭ مازمۇنى تۋرالى جۇرتشىلىقتى حاباردار ەتۋ ءۇشىن 2018 جىلعى قاڭتاردىڭ باسىنا بەلگىلەنگەن ەل ايماقتارىنداعى ءتۇسىندىرۋ جۇمىستارىن بەلسەندى جۇرگىزۋگە شاقىردى.
بيۋرودا سەناتتىڭ 2018 جىلعا ارنالعان نەگىزگى شارالار جوسپارى بەكىتىلدى. دەپۋتاتتار الداعى جىلى پرەزيدەنت ن.نازارباەۆتىڭ جىل سايىنعى قازاقستان حالقىنا جولداۋىن ىسكە اسىرۋدى زاڭنامالىق تۇرعىدان قامتاماسىز ەتۋ جۇمىستارىن جالعاستىراتىن بولادى. سەناتتا «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىن ىسكە اسىرۋ بارىسىنا, قازاقستان ەكونوميكاسىن دامىتۋداعى بانك سەكتورىنىڭ رولىنە, «تسيفرلى قازاقستان» مەملەكەتتىك باعدارلاماسىنىڭ ورىندالۋىنا, سونداي-اق قۇقىق قورعاۋ قىزمەتىنىڭ پروتسەستىك نەگىزدەرىن جاڭعىرتۋ تاقىرىبىنا ارنالعان پارلامەنتتىك تىڭداۋلار ۇيىمداستىرىلادى.
پالاتادا زاڭ شىعارۋ پروتسەسىن جەتىلدىرۋ ماسەلەلەرى تۋرالى, 2017 جىلعى 22 قىركۇيەكتە وتكەن ورتا ءبىلىم بەرۋ جۇيەسىنىڭ پروبلەمالارىنا ارنالعان پارلامەنتتىك تىڭداۋلار ۇسىنىمدارىن ىسكە اسىرۋ ناتيجەلەرى بويىنشا, ەلىمىزدىڭ «جاسىل ەكونوميكاعا» كوشۋ تۇجىرىمداماسىنىڭ ورىندالۋى تۋرالى ۇكىمەتتىك ساعات وتىرىستارىن وتكىزۋ جوسپارلاندى.
2018 جىلى سەنات كوميتەتتەرى ەلىمىزدىڭ ءار ايماعىندا 15 كوشپەلى وتىرىس وتكىزەتىن بولدى. ودان باسقا, زاڭنامانى جەتىلدىرۋ, مەملەكەتتىك جانە جەكەلەگەن سالالاردى دامىتۋ باعدارلامالارىن ىسكە اسىرۋ ماسەلەلەرى بويىنشا دەپۋتاتتاردىڭ مەملەكەتتىك ورگاندار مەن باسقا دا ۇيىمداردىڭ باسشىلارىمەن 15 كەزدەسۋى جانە 13 دوڭگەلەك ۇستەل وتكىزۋ جوسپارعا ەنىپ وتىر.
پارلامەنتارالىق ىنتىماقتاستىقتى نىعايتۋ سەنات قىزمەتىنىڭ ماڭىزدى باعىتى بولىپ تابىلادى. دەپۋتاتتار حالىقارالىق پارلامەنتارالىق قۇرى-
لىمداردىڭ جانە شەت مەملەكەتتەردىڭ زاڭ شىعارۋ ورگاندارىمەن ءوزارا ءىس-قيمىل جونىندەگى جۇمىس توپتارىنداعى جۇمىستارعا قاتىسادى.
پالاتانىڭ حالىقارالىق قىزمەتى سەناتورلاردىڭ 2018 جىلعى قازان ايىندا وتەتىن الەمدىك جانە ءداستۇرلى دىندەر كوشباسشىلارىنىڭ VI سەزىنە قاتىسۋىمەن كورىنىس تابادى.
سەنات بيۋروسى 2017 جىلعى 28 جەلتوقسانعا بەلگىلەنگەن پالاتا وتىرىسىنىڭ كۇن تارتىبىنە تۇرىكمەنستانمەن ستراتەگيالىق ارىپتەستىك تۋرالى شارتتى, قازاقستان-تۇرىكمەنستان مەملەكەتتىك شەكاراسىن شەگەندەۋ تۋرالى كەلىسىمدى, قازاقستان مەن يرلانديا اراسىنداعى تابىسقا سالىناتىن سالىقتارعا قاتىستى قوسارلانعان سالىق سالۋدى بولدىرماۋ تۋرالى ۇكىمەتارالىق كونۆەنتسيانى راتيفيكاتسيالاۋ تۋرالى زاڭ جوبالارىن ەنگىزۋ ۇسىنىلدى. وتىرىستا, سونداي-اق «قازاقستان رەسپۋبليكاسىنداعى باعالاۋ قىزمەتى تۋرالى», «جابىرلەنۋشىلەرگە وتەماقى قورى تۋرالى» زاڭ جوبالارى مەن بىرقاتار زاڭدارعا ىلەسپە تۇزەتۋلەر, سونداي-اق «مەملەكەتتىك اۋديت جانە قارجىلىق باقىلاۋ تۋرالى» زاڭعا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قاراۋ كوزدەلىپ وتىر.
بيۋرودا ماجىلىستەن تۇسكەن زاڭ جوبالارى سەناتتىڭ تۇراقتى كوميتەتتەرىنە ءبولىنىپ بەرىلدى. ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتى ازەربايجانمەن حالىقارالىق اۆتوموبيل قاتىناستارى تۋرالى كەلىسىمدى راتيفيكاتسيالاۋ تۋرالى زاڭ جوباسى بويىنشا باس كوميتەت بولىپ بەلگىلەندى. يرلانديامەن جانە ۇندىستانمەن تابىسقا سالىناتىن سالىقتارعا قاتىستى قوسارلانعان سالىق سالۋدى بولدىرماۋ تۋرالى ەكىجاقتى كەلىسىمدەردى راتيفيكاتسيالاۋ تۋرالى زاڭ جوبالارى قارجى جانە بيۋدجەت كوميتەتىنە تاپسىرىلدى.
نۇرلىبەك دوسىباي,
«ەگەمەن قازاقستان»
