جيىن بارىسىندا ەلباسى الماتىدا وتكەن 2017 جىلعى دۇنيەجۇزىلىك قىسقى ۋنيۆەرسيادا مەن «ەكسپو-2017» كورمەسى كەزىندە اۋقىمدى شارالارعا جۇمسالعان شىعىندار تۋرالى جانە سالعان ينۆەستيتسيانىڭ قانشالىقتى اقتالعاندىعى تۋرالى قويىلعان ءجۋرناليستىڭ ساۋالىنا جاۋاپ بەردى.
«وزدەرىڭىز بىلەسىزدەر حالىقارالىق كورمەنىڭ وتۋىنە 115 مەملەكەت ات سالىستى. كەلگەن قوناقتاردىڭ سانى ءبىز كۇتكەننەن ەكى ەسەگە اسىپ ءتۇستى. بارلىق قوناق ۇيلەر تولدى, شاعىن جانە ورتا بيزنەس جاندانا ءتۇستى. مەنىڭ ويىمشا تۇتاس ءبىر تاماشا جاڭا اۋدان تۇرعىزدىق. مۇنىڭ بارلىعى ەل تۇرعىندارى ءۇشىن قىزمەت ەتە بەرەتىن بولادى. «نۇر-الەم» سفەراسى مۋزەي رەتىندە قالا بەرەدى. ال بۇگىندە قالاشىققا كۇنىنە 600 ادام, سەنبى-جەكسەنبى كۇندەرى 1200-گە جۋىق ادام كەلەدى. الىپ مۇز ايدىنىندا قىس بويى سىرعاناۋعا بولادى», دەگەن پرەزيدەنت ن.نازارباەۆ كورمەدەن كەيىنگە قالاشىقتىڭ ودان ءارى قارقىندى جۇمىس ىستەي بەرەتىندىگىن اتادى.
«مۇندا حالىقارالىق قارجى ورتالىعى قۇرىلادى. قازاقستاندىقتار ازىرگە بيرجامەن, اكتسيامەن جۇمىس ىستەۋدى بىلمەيدى. امەريكالىقتاردىڭ 70 پايىزى اكتسيانىڭ ارقاسىندا قوسىمشا تابىس تاۋىپ وتىر. قازاقستاندىقتاردى اكتسياعا اقشا سالۋدى, وسى ارقىلى بايۋدى ۇيرەتەمىز. سونىمەن بىرگە جاسىل تەحنولوگيالار ورتالىعى, ستارت-اپ ءوندىرىسى ورتالىعى مەن IT كومپانيالار كەلەسى جىلدان باستاپ جۇمىس ىستەيتىن بولادى», دەدى ەلباسى.
