كەلىسسوز بارىسىندا كۇن تارتىبىندەگى ەكىجاقتى ەكونوميكا ماسەلەلەرى, تسيفرلىق تەحنولوگيالاردى پايدالانۋ كەزىندەگى بىرلەسكەن جۇمىستاردىڭ پەرسپەكتيۆالارى, سونداي-اق سۋ جانە ەنەرگەتيكا سالاسىنداعى ىنتىماقتاستىق ماسەلەلەرى قاراستىرىلدى.
قازاقستان پرەزيدەنتى ەكى ەل ۇكىمەتتەرى قول قويعان جول كارتاسىنىڭ ورىندالۋ ناتيجەلەرىنە كوڭىلى تولاتىنىن ايتىپ, بۇل جۇمىستاردى جالعاستىرۋدىڭ ماڭىزدىلىعىن اتاپ ءوتتى.
– جول كارتاسى ناقتى ۋاقىت پەن كۇش-جىگەردى تالاپ ەتەتىن شارالاردى قامتيدى. وسىعان بايلانىستى, ەلدەرىمىزدىڭ ۇكىمەتتەرىنە وسى ماڭىزدى قۇجاتتىڭ ءار تارماعىنىڭ ساپالى ءارى دايەكتى تۇردە ىسكە اسىرىلۋىن قامتاماسىز ەتۋ تاپسىرىلدى, – دەدى مەملەكەت باسشىسى.
نۇرسۇلتان نازارباەۆ ەكىجاقتى ساۋدا-ساتتىقتى كەڭەيتۋ ماسەلەلەرىنە ەرەكشە توقتالىپ, 2020 جىلعا قاراي ءوزارا تاۋار اينالىمىن 1 ميلليارد دوللارعا دەيىن ارتتىرۋ قاجەت ەكەنىن ايتتى.
سونىمەن قاتار, مەملەكەت باسشىسى قازاقستان قىرعىز ەكونوميكاسىنىڭ باستى ينۆەستورلارىنىڭ ءبىرى ەكەنىن ايتىپ, ينۆەستيتسيا ءۇشىن قولايلى جاعداي جاساۋدىڭ ماڭىزدىلىعىن اتاپ ءوتتى.
– ءبىز ينۆەستيتسيالىق ىنتىماقتاستىقتى جاقسارتۋ جانە ساۋدا-ەكونوميكالىق قارىم-قاتىناستى جانداندىرۋ ماقساتىمەن قازاقستان مەن قىرعىزستاننىڭ ىسكەرلىك كەڭەسىن قۇرۋ مۇمكىندىگىن تالقىلادىق. ول ەلدەرىمىزدىڭ شارۋاشىلىق سۋبەكتىلەرى اراسىنداعى تىكەلەي بايلانىستاردى نىعايتۋعا سەپتىگىن تيگىزەدى, – دەدى قازاقستان پرەزيدەنتى.
تاراپتار سۋ-ەنەرگەتيكالىق ىنتىماقتاستىق تاقىرىبىنا دا نازار اۋداردى. اتاپ ايتقاندا, ترانسشەكارالىق وزەندەردەگى سۋ رەسۋرستارى وڭىردەگى بارلىق ەلدەر ءۇشىن ورتاق بولىپ سانالاتىنىن تاعى دا ماقۇلدادى.
بۇدان بولەك, نۇرسۇلتان نازارباەۆ وڭىرلىك قاۋىپسىزدىكتى قامتاماسىز ەتۋ جانە حالىقارالىق ۇيىمدار اياسىندا ءوزارا ءىس-قيمىل جاساۋدىڭ ماڭىزدىلىعىن اتاپ ءوتتى.
سوورونباي جەەنبەكوۆ نۇرسۇلتان نازارباەۆقا العىس ءبىلدىرىپ, قىرعىز رەسپۋبليكاسىنا رەسمي ساپارمەن كەلۋگە شاقىرىپ, قازاقستان مەن قىرعىزستاننىڭ جوعارعى مەملەكەتارالىق كەڭەسىنىڭ كەزەكتى وتىرىسىن وتكىزۋ جوسپارلاناتىنىن ايتتى.
– قازاقستان قىرعىزستاننىڭ نەگىزگى ساۋدا سەرىكتەستەرىنىڭ ءبىرى بولىپ سانالادى. وسىعان وراي, ءبىز ەكىجاقتى ەكونوميكالىق ىنتىماقتاستىق, سونداي-اق شەكارا, كولىك, فيتوسانيتاريا, ۆەتەرينارلىق باقىلاۋ, كەدەن جانە سالىق اكىمشىلىگى سالاسىنداعى ءوزارا ءىس-قيمىل ماسەلەلەرى جونىندەگى جول كارتاسىنىڭ ىسكە اسىرىلۋىنا زور ءمان بەرەمىز, – دەدى قىرعىزستان پرەزيدەنتى.
سونىمەن بىرگە, سوورونباي جەەنبەكوۆ قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋىمەن قۇتتىقتاپ, بۇل ماڭىزدى حالىقارالىق ورگانعا الداعى ۋاقىتتا توراعالىق ەتۋىمىزگە وراي تابىس تىلەدى.
ساپار اياسىندا ەكىجاقتى كوپتاراپتى ىنتىماقتاستىقتى جاڭا ساپالى دەڭگەيگە كوتەرۋگە جانە مەملەكەتتىك شەكارانىڭ حالىقارالىق-قۇقىقتىق رەسىمدەلۋىن اياقتاۋعا باعىتتالعان بىرقاتار ەكىجاقتى قۇجاتتارعا قول قويىلدى:
– قازاقستان رەسپۋبليكاسى پرەزيدەنتى مەن قىرعىز رەسپۋبليكاسى پرەزيدەنتىنىڭ بىرلەسكەن مالىمدەمەسى;
– مەملەكەتتىك شەكارانى بەلگىلەۋ تۋرالى شارت;
– مەملەكەتتىك شەكارا رەجىمى تۋرالى كەلىسىم.
جۋرناليستەر الدىندا ءسوز سويلەگەن تاراپتار وتكەن كەلىسسوزدەردىڭ قورىتىندىلارىنا قاناعاتتاناتىنىن ايتىپ, بۇل ساپار ەلدەرىمىز اراسىنداعى جان-جاقتى ءوزارا ءىس-قيمىل ءۇشىن جاڭا جول اشاتىنىنا سەنىم ءبىلدىردى.
