قوڭىر كەشتە «داريعا-اي» جاستار تەاترى اقىننىڭ ايتۋلى ولەڭدەرىنەن 3 ءبولىمدى پوەزيالىق كومپوزيتسيا قويدى. ايگىلى اقىن تىنىشتىقبەك ابدىكاكىم ۇلى مەن ابايدىڭ «جيدەباي-ءبورىلى» مەملەكەتتىك قورىق-مۋزەيىنىڭ ديرەكتورى بولات جۇنىسبەكوۆ «دۇلدۇلدەر ءدۇبىرى» كىتابىنىڭ تۇساۋىن كەسىپ, كەش اۆتورىنىڭ كەۋدەسىنە «اباي» مەدالىن تاقتى. امىرە قاشاۋباەۆ اتىنداعى وبلىستىق فيلارمونيا انشىلەرى مەن «كەربەز» فولكلورلىق ءانسامبلى ارنايى ونەر كورسەتتى. قازاقتىڭ ايگىلى ءانشىسى بايان ساعىنباەۆا مەن بەرىك وماروۆ باستاعان ەركەبۇلان مۇساەۆ, زينۋرا ابدولدينا سىندى ونەر يەلەرى اقىن سوزىنە جازىلعان اندەردى شىرقادى. جەرگىلىكتى كومپوزيتور مالىك ەڭسەباەۆ جەتەكشىلىك ەتەتىن اسكەري وركەستر ونەرپازدارى ءۇش داۋىستا اۋەلەتكەن اندەر دە ادەمى شىقتى. قازاقتىڭ مايتالمان گيتاريسى, ءانشى, اكتەر قادىرعالي كوبەنتاەۆتىڭ قوڭىر داۋىسى ورتانى تىپتەن اجارلاندىرا ءتۇستى.
مادەنيەت جانە سپورت مينيسترلىگىنىڭ باعدارلاماسى بويىنشا 5000 دانامەن جارىق كورگەن كىتاپتىڭ رەسپۋبليكا اۋماعىنا تارايتىندىعى اتقۇمار اقىندى ارقالاندىرا تۇسكەن. سول قۋانىشىن جىرسۇيەر قاۋىممەن بولىسۋگە اسىق بولعان قايرات زەكەن ۇلىنىڭ ءباسپاسوز سالاسىنا ۇزاق جىل ەڭبەك ەتكەنىن ايتا كەتكەن ابزال.
مۇراتبەك كەنەمولدين
سەمەي
