اكتسيا تاۋارلاردى ساتىپ العانى, جۇمىستاردى ورىنداعانى جانە قىزمەتتەردى كورسەتكەنى ءۇشىن اقشالاي ەسەپ-ايىرىسۋلار كەزىندە كاسىپكەرلەردىڭ تۇبىرتەكتەردى بەرۋىنە قاتىستى باقىلاۋ-كاسسالىق ءتارتىپتى قامتاماسىز ەتۋگە باعىتتالعان. وسىلايشا, مەملەكەتتىك كىرىستەر كوميتەتى ازاماتتارعا سالىقتىق زاڭنامانى ساقتاۋ بويىنشا قوعامدىق باقىلاۋعا قاتىسۋىنا, ونىڭ ۇستىنە باعالى جۇلدەلەر ۇتىپ الۋعا مۇمكىندىك بەردى.
شاراعا قاتىسۋ «Wipon» ءموبيلدى قوسىمشاسى ارقىلى جۇزەگە اسىرىلدى. ونى «Apple App» store» مەن «Google Play market» ءموبيلدى دۇكەندەرىنەن تەگىن جۇكتەپ الۋعا بولادى.
«1 مامىردان 30 قاراشاعا دەيىنگى مەرزىمدە وتكەن اكتسيا ەلىمىزدەگى بارلىق وبلىستاردى, استانا مەن الماتى قالالارىن قامتىدى. اي سايىن قورىتىندى جاساپ, ۇتىس جۇلدەلەرىن ۋاقىتىلى تاپسىرىپ وتىردىق. جەتى اي ىشىندە رەسپۋبليكا بويىنشا 336 جەڭىمپاز انىقتالىپ, تۇرمىستىق جانە كەڭسە تەحنيكالارىن تابىس ەتتىك», دەگەن مەملەكەتتىك كىرىستەر كوميتەتىنىڭ توراعاسى ارداق تەڭگەباەۆ ۇمىتكەرلەردەن 2,4 ميلليونعا جۋىق چەك قابىلدانعانىن ايتتى.
ۇيىمداستىرۋشىلاردىڭ ايتۋىنشا, 13 جەلتوقسان كۇنى اكتسيانىڭ باس جۇلدەسى – اۆتوكولىكتىڭ يەسى انىقتالدى. ول – پاۆلودارلىق اسەت امىرقۇلوۆ. «وسىنداي قوماقتى جۇلدەنى ۇتىپ العانىما, شىنىمدى ايتسام, باستاپقىدا سەنەر-سەنبەسىمدى بىلمەدىم. مۇنداي ناۋقان ەل ازاماتتارىنىڭ سالىق مادەنيەتىن قالىپتاستىرۋعا ىقپال ەتىپ, قارجىسىن ىقتياتتى جۇمساۋعا ۇيرەتەدى. سونىمەن قاتار بيۋدجەت قازىناسىن ەسەلەۋگە دە مۇمكىندىك تۋعىزادى. بارشا قازاقستاندىقتاردى وسى شاراعا قاتىسۋعا شاقىرامىن», دەدى جەڭىمپاز «تەمىر تۇلپار» كىلتىن سالتاناتتى تۇردە تاپسىرۋ راسىمىندە.
اسحات رايقۇل
«ەگەمەن قازاقستان»
