عاسىرلار قويناۋىنان جەتكەن قوبىزدىڭ قوڭىر ءۇنى, قاسيەتتى دومبىرانىڭ كۇمىس كۇمبىرى, ۇلت رۋحىن قالىپتاستىرۋدا وراسان ماڭىزعا يە اۋىز ادەبيەتى مەن حالىق اندەرى, جالپى ونەردىڭ ۇلى كوشى قازاقتىڭ كيەلى قازىناسى. بۇگىنگى تاڭدا ۇلى ونەردى ۇرپاققا جالعاپ جۇرگەن ونەرپازدار دا ەل يگىلىگى ءۇشىن ەڭبەك ەتىپ كەلەدى.
ەلباسى ماقالاسىن حالىققا ناسيحاتتاۋ ماقساتىندا «مۋزارت» توبى سارىسۋ اۋدانى, جاڭاتاس قالاسىنا كەلىپ, اۋدان حالقىمەن جانە قاراتاۋ, شولاقتاۋ تاۋ-كەن كەشەنىنىڭ, سونداي-اق تەمىرجول كولىك سالاسىنىڭ ۇجىمدارىمەن كەزدەستى. كەزدەسۋ كەزىندە انشىلەر «تۋعان ەلگە ارناۋ», «جايلاۋكول كەشتەرى», «راحمەت ساعان, تۋعان ەل!» اتتى اندەرىن ناقىشىنا كەلتىرە ورىنداپ, حالىقتىڭ قوشەمەتىنە بولەندى. اۋداندىق مادەنيەت ۇيىنە حالىق كوپتەپ جينالىپ, ونەرپازدارعا قۇرمەت كورسەتتى. اۋدانعا «قاراتاۋ» تاۋ-كەن وڭدەۋ كەشەنىنىڭ ديرەكتورى, وبلىستىق ءماسليحاتتىڭ دەپۋتاتى مۇراتقالي سارسەنوۆتىڭ شاقىرۋىمەن كەلگەن ونەرپازدار جەرگىلىكتى حالىقتىڭ جۇرەك پەرنەسىن تەربەيتىن اندەرىن شىرقاپ, ەلباسىنىڭ رۋحاني جاڭعىرۋ يدەياسى مەن تاۋەلسىزدىك تۋرالى ويلارىمەن دە ءبولىستى. قازاقستاننىڭ ەڭبەك سىڭىرگەن قايراتكەرى مەيرامبەك بەسپاەۆ ءوز سوزىندە تاۋەلسىزدىك ۇعىمى مەن ەلباسىنىڭ رۋحاني جاڭعىرۋ يدەياسىن ەگىز ۇعىم دەپ ەسەپتەيتىنىن ايتسا, ساكەن مايعازيەۆ اتالعان كەشتى ەلباسى ماقالاسىنىڭ اياسىندا ءوتىپ جاتقان كەڭ اۋقىمدى شارا ەكەنىن جەتكىزدى.
«مۋزارت» توبىنىڭ ورىنداۋىنداعى ءىليا جاقانوۆتىڭ اتاقتى «جايلاۋكول كەشتەرى» ءانى وسى سارىسۋ اۋدانىنىڭ جايلاۋكول اۋىلىنا بايلانىستى تۋعان. بۇل كۇنى قاسيەتتى قارا دومبىرانىڭ كۇمبىرى مەن حالىق اندەرىنىڭ رۋحى تىڭدارماندى تەربەپ, كوپشىلىكتى جايلاۋكول كەشىندەگىدەي اسەردە قالدىردى.
حاميت ەسامان,
«ەگەمەن قازاقستان»
جامبىل وبلىسى
