وزدەرىڭىزگە ءمالىم, تابيعي ۋران ءوندىرۋ نارىعىندا كوش باستاعان قازاقستان الەمدىك سۇرانىستىڭ 40 پايىزىن قامتاماسىز ەتەدى. ال سونىڭ تەڭ جارتىسى قازاتومونەركاسىپتىڭ ەنشىسىندە. ءبىزدىڭ ءونىمدى دۇنيە ءجۇزىنىڭ ءىرى ەنەرگەتيكالىق كومپانيالارى پايدالانادى. ۋراندى رەسەي, فرانتسيا, قىتاي جانە جاپونيانىڭ ترانسۇلتتىق كومپانيالارىمەن سەرىكتەستىكتە قۇرىلعان ەنشىلەس جانە بىرلەسكەن كاسىپورىندار وندىرەدى. قازاقستانداعى ۋران ءوندىرۋ ءادىسىن ماگاتە ەكولوگيالىق ەڭ تازا ءارى قاۋىپسىز دەپ تانىعان. وكىنىشكە قاراي, ءبىر فۋنت ۋراننىڭ باعاسى سوڭعى ون جىلدا 136 دوللاردان 18 دوللارعا دەيىن تومەندەپ كەتتى. ۋران ءوندىرىسىنىڭ ۇزاق مەرزىمدى تۇراقتىلىعىن قامتاماسىز ەتۋ ءۇشىن ءبىز ءوندىرىس اۋقىمىن سۇرانىسقا يكەمدەپ قىسقارتۋ جونىندە ستراتەگيالىق شەشىمدى قابىلدادىق. ايتا كەتەيىك, 2018 جىلدىڭ قاڭتار ايىنان باستاپ 3 جىلعا جەر قويناۋىن پايدالانۋ كەلىسىمشارتتارى بويىنشا جوسپارلانعان ءوندىرىس اۋقىمىن 20 پايىزعا قىسقارتۋ كوزدەلىپ وتىر. بۇل شارا كومپانيالاردىڭ تۇتىنۋشىلار الدىنداعى مىندەتتەرىنە اسەر ەتپەيدى.
سونىمەن قاتار ول سەرىكتەستەرمەن قارىم-قاتىناس بەلسەندى جۇرگىزىلىپ جاتقانىن تىلگە تيەك ەتىپ, قىتايلىق «CGNPC» كومپانياسىمەن بىرگە ءۇلبى مەتاللۋرگيا زاۋىتىنىڭ بازاسىندا جىلۋ بولگىش قۇرامالار شىعاراتىن زاۋىت سالىنىپ جاتقانىن, ونىڭ قۋاتتىلىعى جىلىنا 200 توننانى قۇرايتىنىن جەتكىزدى.
عالىمجان ءپىرماتوۆ مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىنداعى تاپسىرمالارىن ورىنداۋ ماقساتىندا اۆتوماتتاندىرۋ, تسيفرلاندىرۋ جانە روبوتتاندىرۋ بويىنشا بىرقاتار جوبالار ىسكە اسىرىلعانىن دا باياندادى.
راۋان قايدار,
«ەگەمەن قازاقستان»
