جامبىل وبلىسىندا جالپى 377 ەلدى مەكەن بار. بۇگىنگى تاڭدا ونىڭ 181-ءى تاۋارلى گازبەن قامتىلىپ, كوگىلدىر وتىننىڭ يگىلىگىن كورىپ وتىر. اعىمداعى جىلى گازداندىرۋ جۇمىسىن جالعاستىرۋ ماقساتىندا 7 ميلليارد 726 ميلليون تەڭگەگە التى جوبا بويىنشا قۇرىلىس-مونتاج جۇمىستارى جۇرگىزىلگەن. اتالعان قاراجاتقا ت.رىسقۇلوۆ اۋدانىنداعى «اقىرتوبە» جاڭا گاز رەتتەگىش ستانساسىنىڭ قۇرىلىسىن جۇرگىزۋ, سول اۋدانداعى «نارتاۋەكەل-2001» جشس اۋماعىندا ورنالاسقان «اق بۇلاق» شارۋا قوجالىعىنىڭ جىلىنا 120 توننا بيە ءسۇتىن وندىرەتىن زاۋىتىن گازداندىرۋ, تاراز قالاسىنىڭ ءشولدالا تۇرعىن القابىنا گاز تارتاتىن قۇبىر سالۋ, سونىمەن قاتار مەركى اۋدانىنداعى نوۆوۆوسكرەسەنوۆكا گاز رەتتەگىش زاۋىتىن قايتا جاڭعىرتۋ, ت.رىسقۇلوۆ اۋدانىنداعى قۇلان اۋىلىنىڭ «اراي» تۇرعىن القابىن گازداندىرۋ, تالاس اۋدانىنىڭ بەس جانە سارىسۋ اۋدانىنىڭ ءتورت ەلدى مەكەنىنە گاز كەلتىرەتىن قۇبىردىڭ قۇرىلىسىن جۇرگىزۋ سياقتى جۇمىستار اتقارىلعان.
– سونىمەن قاتار بەس اۋداننىڭ 69 ەلدى مەكەنىن گازداندىرۋعا 484,3 ميلليون تەڭگەگە جوبالاۋ-سمەتالىق قۇجاتتاما دايىندالۋدا. بۇل بايزاق اۋدانىنىڭ جيىرما ءبىر اۋىلى, جامبىل اۋدانىنىڭ ون ءۇش اۋىلى, شۋ اۋدانىنىڭ ون سەگىز اۋىلى, تالاس اۋدانىنىڭ ءۇش اۋىلى جانە سارىسۋ اۋدانىنىڭ ون ءتورت اۋىلى. تاراز قالاسى تۇرعىندارىنىڭ قاۋىپسىزدىگىن قامتاماسىز ەتۋ ماقساتىندا ەكى اۆتوماتتاندىرىلعان گاز رەتتەگىش ستانسا قالانىڭ سىرتىنا شىعارىلادى, – دەيدى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى گازداندىرۋ جانە ونەركاسىپتىك قاۋىپسىزدىك ءبولىمىنىڭ باسشىسى باقتىباي قىرىقباەۆ.
باسقارمانىڭ مالىمەتىنشە, قورداي اۋدانىندا تاۋ بوكتەرىندە ورنالاسقان 29 ەلدى مەكەندى جانە جازىقتا ورنالاسقان 17 ەلدى مەكەندى كەلەسى جىلى گازبەن قامتۋ كوزدەلۋدە. الايدا بۇل ورايدا «ازيالىق گاز قۇبىرى» جشس بويىمەن وتار اۋىلىنىڭ تۇسىنا گاز رەتتەگىش ستانسا سالىنۋى ءتيىس ەكەن. سونىمەن قاتار وسى اۋدانداعى «گەورگيەۆكا» گاز رەتتەگىش ستانساسىن قايتا جاراقتاندىرۋ قاجەت. ەگەر بەرىلگەن بيۋدجەتتىك وتىنىمگە ساي وبلىس اكىمدىگىنەن ءتيىستى قاراجات بولىنسە, كەلەسى جىلى قورداي اۋدانىنىڭ 46 ەلدى مەكەنى كوگىلدىر وتىنمەن قامتىلادى.
بۇگىنگى تاڭدا وبلىستىڭ مويىنقۇم جانە سارىسۋ اۋداندارى مۇلدە گازبەن قامتىلماعان. وسى ورايدا وبلىس ورتالىعىنان 300 شاقىرىمنان استام جەردە ورنالاسقان مويىنقۇم اۋدانىنداعى 9 اۋىلعا كەلەسى جىلى گاز تارتۋ ماقساتىندا «ازيالىق گاز قۇبىرى» بويىنان گاز رەتتەگىش ستانساسىن سالۋ قاجەتتىگى تۋىنداپ تۇر. بۇل ماسەلە دە بەرىلگەن بيۋدجەتتىك وتىنىمگە بايلانىستى بولماق. سونىمەن قاتار تامدى ەلدى مەكەنىنىڭ جانىنان گاز رەتتەگىش ستانسا سالۋ قاجەتتىگى بيلىكول اۋماعىندا ورنالاسقان 9 ەلدى مەكەندى گازبەن قامتۋ ماسەلەسى دە تۋىندايدى. بۇل اۋماقتا جۋالى اۋدانىنىڭ – 4, تالاس اۋدانىنىڭ – 2 جانە جامبىل اۋدانىنىڭ 3 ەلدى مەكەنى بار.
بۇگىندە اۋليەاتا وڭىرىندەگى «امانگەلدى گاز» كاسىپورنىندا وندىرىلەتىن كوگىلدىر وتىننىڭ 80 پايىزى وبلىستىڭ ۇلەسىندە. ەگەر وبلىس اكىمدىگى تاراپىنان باسقارمانىڭ بەرگەن بيۋدجەتتىك ءوتىنىمى ماقۇلدانسا, وندا كەلەسى جىلى جامبىلدىقتاردىڭ ءبىرازى كوگىلدىر وتىننىڭ يگىلىگىن كورمەك. وبلىستىڭ 48 پايىزىن تاۋارلى گازبەن قامتىعان ءوڭىر كەلەسى جىلى دا قاپى قالماۋدىڭ ارەكەتىن جاسايدى دەگەن تۇرعىنداردىڭ سەنىمى بار.
حاميت ەسامان,
«ەگەمەن قازاقستان»
جامبىل وبلىسى
