ماتۆەي ماتۆەەۆ
(«وقجەتپەس», 2 ويىن)
«وقجەتپەس» كومانداسى ماۋسىمنىڭ ەكىنشى جارتىسىندا جاڭا ويىنشىلار الا باستادى. قورعانىستى كۇشەيتۋ ماقساتىندا رەسەيدەن ماتۆەي ماتۆەەۆ دەگەن فۋتبولشى شاقىرتىلدى. ءيا, «وقجەتپەس» ءبىرىنشى اينالىمدا ءوز قاقپاسىنا كوپ گول جىبەردى. الايدا رەسەيلىك لەگيونەر نەگە ەكەنى بەلگىسىز, ماۋسىم اياقتالعانشا 2 ماتچتا عانا الاڭعا شىقتى. ساۋال: سوندا مۇنداي لەگيونەردى كومانداعا الدىرتۋدىڭ ماقساتى نە؟
الەكساندر ەرماچەنكو
(«اقتوبە», 5 ويىن)
جاڭا ماۋسىم باستالعان ساتتە «اقتوبە» كومانداسى 8 لەگيونەردى ءبىر-اق الدى. ولاردىڭ ىشىندە الەكساندر ەرماچەنكونىڭ اتى ەرەكشە اتالدى. ۋكراينانىڭ بىرنەشە كلۋبىندا دوپ تەپكەن فۋتبولشى «اقتوبەنى» العا سۇيرەيدى دەپ توپشىلاعاندار دا از بولعان جوق. كلۋب باسشىلارى وسىلاي جار سالىپ, كوماندا كۇشەيىپ جاتىر دەگەنگە توقتالدى. الايدا وسى فۋتبولشى چەمپيوناتتىڭ العاشقى اينالىمىنان كەيىن ءوز
وتانىنا قايتا ورالدى. قازاقستان فۋتبولى ۋكراينالىقتى جاتسىندى ما, الدە اياقدوپشىنىڭ ءوزى ءبىزدىڭ ەلدى جەرسىنبەدى مە, ايتەۋىر بەرگەن قاراجاتتى الدى دا تايىپ تۇردى. وسىنداي لەگيونەرلەردىڭ سانى «اقتوبەدە» جەتكىلىكتى. ءبىرىنشى اينالىمنان كەيىن كوماندادان ۆيتور جۋنيور (6 ويىن), چاكو توررەس (7 ويىن), پاپا گۋيە (9 ويىن), دياس كاسيانو (12 ويىن) سەكىلدى فۋتبولشىلار الاستاتىلدى. بۇل, ارينە كومانداعا جاڭا فۋتبولشىلار ىرىكتەۋ بارىسىنداعى قاتەلىكتى كورسەتەدى. كوماندانىڭ فۋتبولشىلار سۇرىپتاۋ جونىندەگى سالعىرتتىعى كوزگە انىق ۇرىپ تۇر.
ۆۋكاشين توميچ
(«اتىراۋ», 3 ويىن)
«اتىراۋ» كومانداسى دا ءجيى باپكەر اۋىستىرىپ, بەرەكەسى قاشىپ جۇرەتىن ۇجىمنىڭ ءبىرى. باپكەر اۋىسقان سايىن كوماندادان فۋتبولشىلار دا كەتە باستايدى. ءار باپكەر كومانداعا كەلگەندە وزىمەن بىرگە بىرنەشە فۋتبولشى الا كەلەتىن ادەتى بار ەمەس پە؟ سول سەكىلدى زوران ۆۋليچ كومانداعا باپكەر بولىپ تاعايىندالىسىمەن جاڭا لەگيونەرلەردى تارتتى. ولاردىڭ قاتارىندا كەزىندە «تاراز» ساپىندا ويناي الماي, قازاقستان چەمپيوناتىنان كوڭىلى قالعان ۆۋكاشين توميچ بار ەدى. سەربيالىق لەگيونەر العاشقى اينالىمدا 3 ويىن وتكىزىپ, ۆۋليچ قىزمەتىنەن بوساعاننان كەيىن
وتانىنا ورالدى. حورۆاتيالىق باپكەر سونداي-اق ءوز وتانداسى يۆان ءروديچتى دە الا كەلگەن بولاتىن. بۇل ويىنشى دا 5 ماتچ وتكىزىپ, العان قارجىسىن تولىقتاي اقتاپ كەتە المادى.
امەر بەكيچ
(«توبىل», 4 ويىن)
جازعى ترانسفەر اشىلعان كەزدە «توبىل» بىرنەشە فۋتبولشى الىپ, كوماندانى كۇشەيتپەكشى بولدى. الايدا بۇل ماقساتتارى جۇزەگە اسپادى. العان لەگيونەرلەرى نەگىزگى قۇرامعا ىلىنە الماي, قوسالقى قۇرامدا وتىردى. مىسالى, بوسنيالىق شابۋىلشى امەر بەكيچ نەبارى 4 ويىنعا عانا قاتىسىپ, قارسىلاس كوماندانىڭ قاقپاسىنا گول سوقپاعان. 4 ايدا 4 ويىنعا قاتىسىپ قوماقتى جالاقى العان امەر جول تۇسسە قازاقستانعا تاعى دا كەلۋدى جوسپارلايتىنى انىق. ال وسىنداي شابۋىلشىنى قوستانايدىڭ «توبىلى» قانداي ماقساتپەن كومانداعا العانى تاعى بەلگىسىز.
زوران رەندۋليچ
(«ورداباسى», 4 ويىن)
شىمكەنتتىڭ «ورداباسى» كومانداسى جەرگىلىكتى جاستارعا كوبىرەك سەنىم ارتادى. بىرىنشىلىك باستالار تۇستا تاڭات نوسەرباەۆ, ازات نۇرعاليەۆ سەكىلدى جەرگىلىكتى ويىنشىلارىن دا ءوز ساپىنا جينادى. ودان بولەك لەگيونەرلەرگە دە سەنىم ارتتى. سولاردىڭ ءبىرى بوسنيالىق قورعاۋشى – زوران رەندۋليچ. قازاقستان بىرىنشىلىگىندە 4 ويىن وتكىزگەن زوران زورىقتى ما, شىمكەنتتىڭ ىستىق كۇنىنە شىدامادى ما, ايتەۋىر ۇجىمعا العاشقى اينالىمنان كەيىن كەرەك بولماي قالدى. مۇنداي قاتەلىكتى باقتيار بايسەيىتوۆتىڭ كومانداسى ەندى قايتالاماسا ەكەن دەيمىز-داعى.
«قايرات» پەن «استانا» سەكىلدى جۇلدەگە تالاسىپ جۇرگەن كوماندالاردا مۇنداي جاعداي جوقتىڭ قاسى. قوس ۇجىمداعى لەگيونەرلەر ارتىلعان سەنىمدى اقتاپ, ويىننىڭ نەگىزگى تىرەكتەرىنە اينالادى. ويناعان ويىندارى مەن كورسەتكەن ناتيجەلەرى دە كوڭىلدەن شىعادى. ال جوعارىدا اتالعان كلۋبتاردىڭ باپكەرلەرى مەن باسشىلارى وسىنداي لەگيونەرلەردى جىل سايىن جيناپ الىپ, كەلىسىم اياقتالماي جاتىپ ەلدەرىنە قايتارادى. جىل سايىنعى بۇل ادەتتىڭ دە وزىندىك جۇيەسى بار سەكىلدى كورىنەدى. كەيبىر ويىنشىلاردىڭ ترانسفەرى مەن جالاقىسىنا بولىنگەن قارجى جەلگە ۇشقانىن ەستىگەندە جاعاڭىزدى ۇستايسىز. فۋتبولداعى جەمقورلىقتىڭ دا ءبىر شەتى وسى تۇستا كورىنىپ قالاتىنداي. سىرتتان كەلگەن فۋتبولشىلار جەرگىلىكتى جاستاردان ءبىر باس جوعارى تۇرادى, سوندىقتان دا ولار قازاقستاندىق فۋتبولشىلارعا قاراعاندا, كوبىرەك جالاقى الادى دەپ تۇسىندىرەتىن كلۋب باسشىلارى وسى ماقالاعا قالاي جاۋاپ قايتارار ەكەن؟
ەرمۇحامەد ماۋلەن,
«ەگەمەن قازاقستان»
