ەلىمىزدىڭ ۆارشاۆاداعى ەلشىلىگى ۇيىمداستىرعان سالتاناتتى قابىلداۋعا پارلامەنت دەپۋتاتتارى, پرەزيدەنت اكىمشىلىگىنىڭ وكىلدەرى مەن كاسىپكەرلەر جينالدى. پولشاداعى قازاقستان ەلشىسى مارعۇلان بايمۇحان ءوز سوزىندە ەلىمىزدىڭ شيرەك عاسىرداعى جەتىستىگىن جىپكە ءتىزىپ بايانداپ بەردى. ءوز كەزەگىندە پولشالىق ساياساتكەرلەر قازاقستاننىڭ حالىقارالىق ارەناداعى ورنىن ايشىقتاپ, ەكىجاقتى سەرىكتەستىكتىڭ جوعارى دەڭگەيگە جەتكەنىن اتاپ ءوتتى. وسى جىلى پرەزيدەنت اندرەي دۋدا مەملەكەتتىك ساپارمەن قازاقستانعا كەلسە, ءبىر جىل بۇرىن ەلباسى نۇرسۇلتان نازارباەۆ پولشاعا بارعان ەدى. ەۋروپالىق مەملەكەتتەردىڭ حالىقارالىق EXPO كورمەسىنە دە بەلسەندى قاتىسقانىن بىلەمىز. وسىلايشا سالتاناتتى قابىلداۋدىڭ قوناقتارى قازاق حالقىنا تىلەكتەرىن ارنادى.
– مەن قازاقستاندى تاۋەلسىزدىك كۇنىمەن قۇتتىقتاپ, جىلى لەبىز بىلدىرگىم كەلەدى. سونداي-اق ءوزارا سەرىكتەستىگىمىز كەزەڭىمەن دامىپ كەلە جاتقانىن ايتا كەتەيىن. ەكونوميكالىق سەرىكتەستىكتە سەرپىلىس بار. ەكى جاققا دا ءتيىمدى جوعارى دەڭگەيدەگى ءىسساپارلار دا بولدى, – دەدى پولشا پرەمەر-ءمينيسترى كەڭسەسىنىڭ جاۋاپتى حاتشىسى اننا ماريا اندەرس.
– وسى جىلى ەكى ەل اراسىنداعى تاۋار اينالىمى ميلليارد ەۋرودان اسىپ تۇسكەلى تۇر. ەڭ قىزىعى, قازاقستاندىق ەكسپورت 70 پايىزعا, پولشا ەكسپورتى 60 پايىزعا ارتقان. مۇنى ساياسي, ەكونوميكالىق سەرىكتەستىكتىڭ جەتىستىگى دەۋگە بولادى. سونداي-اق تىكەلەي رەيستەردىڭ اشىلۋى, ءبىزدىڭ تاراپىمىزدان ۆيزالاردى جويۋ پولشا ازاماتتارىنىڭ قازاقستانعا, استاناعا تۋريستىك اعىنىن ۇلعايتۋعا جول اشادى, – دەدى قازاقستاننىڭ پولشاداعى توتەنشە جانە وكىلەتتى ەلشىسى مارعۇلان بايمۇحان.
