سەنات توراعاسى قاسىم-جومارت توقاەۆ مەملەكەت باسشىسى ن.ءا. نازارباەۆتىڭ ءبىزدىڭ ەڭ باستى بايلىعىمىز – تاۋەلسىزدىك ەكەنىن ايتقان ءسوزىن ەسكە سالدى.
پارلامەنت جوعارعى پالاتاسىنىڭ باسشىسى: «قازاقستان رەسپۋبليكاسى پرەزيدەنتىنىڭ كورەگەن ساياساتىنىڭ ارقاسىندا ەلىمىز تاۋەلسىزدىك جىلدارى نەبىر سىن-قاتەرلەردەن سۇرىنبەي ءوتىپ, تالاي بەلەستەر مەن بيىكتەردى ەڭسەردى. بىرلىگى جاراسقان, الەم تانىعان ەلگە اينالدىق. ماڭگىلىك ەل بولۋدى باعدار ەتكەن قۋاتتى مەملەكەتتى قالىپتاستىردىق», - دەپ اتاپ ءوتتى.
توراعا سوزىندە ەكونوميكانى ءارتاراپتاندىرۋ, تۇراقتى ءوسىم, حالىقارالىق ساياساتتا دوستىق پەن ءوزارا ىنتىماقتاستىقتى باسشىلىققا الۋ, ىشكى ساياساتتا ازاماتتىق قۇندىلىقتى جوعارى قويۋ دامۋدىڭ نەگىزگى فورمۋلاسىنا اينالعانى ايتىلدى.
«ەكونوميكالىق دامۋمەن قاتار قوعامدا رۋحاني جاڭعىرۋدىڭ قاجەتتىلىگى ايقىن كورىنۋدە. رۋحى بيىك ەلدىڭ قاشاندا ەڭسەسى بيىك بولاتىنى انىق», - دەدى ق.توقاەۆ.
سەنات باسشىسى دەپۋتاتتار مەن پالاتا اپپاراتىنىڭ قىزمەتكەرلەرىن ەلباسىنىڭ كەشەندى باعدارلامالارىن, ەل ەگەمەندىگى مەن مەملەكەتىمىزدىڭ قارقىندى دامۋىن زاڭنامالىق تۇرعىدا قامتاماسىز ەتكەنى ءۇشىن العىسىن ءبىلدىردى.
جوعارعى پالاتا توراعاسى سەناتورلارعا مەملەكەتتىك جانە قوعامدىق قىزمەتتە سىڭىرگەن ەڭبەگى, الەۋمەتتىك-ەكونوميكالىق جانە مادەني دامۋىنا قوسقان ۇلەسى, حالىقتار اراسىنداعى دوستىق جانە ىنتىماقتاستىقتى نىعايتقانى ءۇشىن ناگرادالار تابىس ەتتى.
سەناتور سەرىك بەكتۇرعانوۆ, بەكمىرزا ەلامانوۆ, سەرگەي پلوتنيكوۆ «پاراسات» وردەنىمەن; مۇراتباي جولداسباەۆ II دارەجەلى «دوستىق» وردەنىمەن; نۇرلان قىلىشباەۆ «قۇرمەت» وردەنىمەن ماراپاتتالدى.
سەناتور داريعا نازارباەۆا تمد پارلامەنتارالىق اسسامبلەياسىنىڭ شەشىمىمەن «سودرۋجەستۆو» وردەنىمەن, راشيت اكىموۆ, مۇرات باقتيار ۇلى, بەكمىرزا ەلامانوۆ, دۋلات قۇسداۋلەتوۆ, ولگا پەرەپەچينا, مارات تاعىموۆ تمد پارلامەنتارالىق اسسامبلەياسىنىڭ «پارلامەنتارالىق ىنتىماقتاستىقتى نىعايتقانى ءۇشىن» مەدالىمەن ماراپاتتالدى.
قاجىرلى قىزمەتى ءۇشىن دەپۋتاتتار ءالي بەكتاەۆ, سەرىك بەكتۇرعانوۆ, مۇراتباي جولداسباەۆ, دارحان كالەتاەۆ, گەورگي كيم, نۇرلان قىلىشباەۆقا تمد پارلامەنتارالىق اسسامبلەياسىنىڭ قۇرمەت گراموتاسى تابىس ەتىلدى.
پارلامەنت سەناتى اپپاراتىنىڭ بىرقاتار قىزمەتكەرلەرىنە دە ماراپاتتار تابىس ەتىلدى.
