№130 جالپى ورتا مەكتەبىنىڭ اشىلۋ سالتاناتىنا قاتىسقان وڭتۇستىك قازاقستان وبلىسىنىڭ اكىمى جانسەيىت تۇيمەباەۆ ەل تاۋەلسىزدىگى مەرەكەسى قارساڭىندا ەسىگىن ايقارا اشىپ وتىرعان مەكتەپ جاڭا باستامالارعا باي ەكەنىن اتاپ ءوتتى.
ء«بىلىمنىڭ دەڭگەيىن كوتەرۋ ءۇشىن مەكتەپتىڭ ساپاسى جاقسى بولۋى كەرەك. بۇل وسىنداي قاعيداتپەن سالىنعان ءبىلىم ۇياسى. بالالار سالاۋاتتى ءومىر سالتىن ۇستانۋ ءۇشىن بارلىق جاعداي جاسالعان. مۇندا 3 بىردەي سپورت زالى بار. سونداي-اق, مەكتەپتە تىگىن, اعاش ۇستاسى سىندى ءتۇرلى ۇيىرمەلەردىڭ جۇمىس جاساۋىنا مۇمكىندىك مول. ياعني, مۇندا ءبىلىم العان وقۋشى امبەباپ بولىپ قالىپتاسادى. مۇنىڭ بارلىعى ەلباسى ساياساتىنىڭ ناتيجەسى», - دەدى وبلىس اكىمى.
«نۇرلى جول» باعدارلاماسى اياسىندا اشىلىپ وتىرعان ءبىلىم ورداسىندا وقۋشىلارعا ارنالعان 61 وقۋ بولمەسى مەن جاڭا ۇلگىدەگى بيولوگيا, فيزيكا, حيميا, ينفورماتيكا, مۋلتيمەديالى-لينگوفوندى كابينەتتەر, كىتاپحانا, اسحانا, اكت, سپورت زالدارى مەن سپورت الاڭى, قىزدارعا جانە ۇلدارعا ارنالعان شەبەرحانالار قاراستىرىلعان.
جالپى وڭتۇستىك قازاقستان وبلىسى بويىنشا ءبىلىم بەرۋ سالاسىندا وسى جىلى 82 نىساننىڭ قۇرىلىسىنا 29,8 ملرد. تەڭگە كولەمىندە قارجى قارالىپ, قۇرىلىستارى جۇرگىزىلۋدە. ونىڭ ىشىندە وسى جىلى 32 نىسان پايدالانۋعا تاپسىرۋ جوسپارلانعان. ال بۇگىنگى كۇنگە دەيىن 28 مەكتەپ اشىلعان بولسا, جىل سوڭىنا دەيىن قالعان ءبىلىم وشاقتارى ەل يگىلىگىنە بەرىلەدى. ال قالعان 50 نىسان كەلەر جىلعا وتپەلى.
اتالعان 82 نىساننىڭ 67-ءى مەكتەپ, 10-ى قوسىمشا قۇرىلىس, 2-ءى قايتا قۇرۋ, 1-ءى كوللەدج, 2-ءى كوللەدجدىڭ قوسىمشا قۇرىلىستارى.
