اسا مارتەبەلى, نۇرسۇلتان ءابىش ۇلى!
زاماناۋي قازاقستان قوعامى مازمۇنى جاعىنان رۋحاني قايتا تۇلەپ, جاڭعىرۋدا. شيرەك عاسىر ىشىندە ەل مۇددەسى شەڭبەرىندە قول جەتكىزىلگەن جەتىستىكتەر ۇلان-عايىر. ۇلى دالانىڭ توسىندە جۇرەگىڭىزدەن شىققان ۇلاعاتتارىڭىز قازاقستان حالقىنىڭ ويىنداعىسىن تاپ باسىپ, ۇنەمى قولداۋعا يە.
قادىرلى نۇرسۇلتان ءابىش ۇلى! بابالارىمىز ايتىپ كەتكەندەي, «العىس – ەل سىيى». ءبىز, قازاقستان رەسپۋبليكاسىنىڭ زيالى قاۋىمى, ءبىلىم, عىلىم جانە مادەنيەت سالاسىنىڭ قايراتكەرلەرى, ءسىزدىڭ جاھاندىق سىن-قاتەرلەر اياسىندا قانشاما باتىل باستاما كوتەرگەنىڭىزگە كۋاگەرمىز. جالپى ىشكى الەۋمەتتىك-ەكونوميكالىق دامۋ نەمەسە سىرتقى ەلدەرمەن ىنتىماقتاستىق قارىم-قاتىناستا بولسىن, وڭاي بولماعانى بەلگىلى.
ءسىزدىڭ ەل يگىلىگى ءۇشىن جۇرگىزگەن ساليقالى ساياساتىڭىز, ۇلتتىق قۇندىلىقتاردى جالپىادامزاتتىق قۇندىلىقتارمەن ۇشتاستىرۋ شەبەرلىگىڭىزدى جوعارى باعالايمىز جانە ريزاشىلىعىمىزدى بىلدىرەمىز.
تاۋەلسىزدىكتىڭ العاشقى قادامى ۇلت بولىپ ۇيىسىپ, ەل بولىپ قالىپتاسۋ قاعيداسىمەن ۇشتاستى. بويىڭىزداعى كورەگەندىلىك قاسيەتىڭىز, قازاقستاننىڭ ەۋرازيا كەڭىستىگىندەگى ورنى مەن باسىمدىقتارىن باعالاۋعا جول سىلتەدى. رۋحاني-مادەني مۇرانى جاڭعىرتۋ كوزى رەتىندە تاريحي, ۇلتتىق-مادەني تامىرلارعا اسا زور ءمان بەردىڭىز. دۇنيەجۇزىلىك تاجىريبەلەردى سارالاي كەلە, تۇبىندە قازاقستاندىقتاردىڭ الەمنىڭ الپاۋىت ەلدەرىمەن قاتارلاسا الاتىنىنا سەنىم ۇيالاتتىڭىز.
قازاقستان رەسپۋبليكاسىنىڭ باسەكەگە قابىلەتتى كەلەشەگى – ستراتەگيالىق باعىت-باعداردىڭ باستاماشىسى بولدىڭىز. ەلباسىنا لايىقتى دانالىق كورسەتە الدىڭىز. قوعامدىق ساناعا قوزعاۋ سالىپ, جىگەرىنە جىگەر قوستىڭىز. بۇگىنگى كۇنى «مادەني مۇرا», «عىلىمي قازىنا», «حالىق تاريح تولقىنىندا» جانە باسقا دا مەملەكەتتىك باعدارلامالار مەن سالاارالىق عىلىمي, مادەني زەرتتەۋلەر جالعاسىن تاۋىپ, سانانى جاڭعىرتۋعا جانە جەتىلدىرۋگە زور ىقپالىن تيگىزۋدە. «بولاشاققا باعدار: رۋحاني جاڭعىرۋ» ماقالاڭىز اياسىندا «تۋعان جەر» باعدارلاماسىنىڭ ۇسىنىلۋى قازاقستاندىقتارعا ەرەكشە سەرپىلىس بەرگەنىن اتاپ وتكەن ءجون.
قۇرمەتتى ەلباسى! بيىل قاسىرەتكە تولى, زوبالاڭ دا زۇلمات – XX عاسىر زيالىلارىنىڭ رۋحى ۇلىقتالىپ, رۋحاني جاڭعىرۋ: الاش جانە ازاتتىق يدەياسىنىڭ ساباقتاستىعى اياسىندا الاش قوزعالىسىنىڭ 100 جىلدىعى ەل كولەمىندە عانا ەمەس, شەتەلدەردە دە اتالىپ ءوتتى.
تاريحتىڭ باستى تاعىلىمى – ۇلتتىق بىرەگەيلىك, رۋحانيات, ءداستۇرلى مادەنيەتىمىزدى ساقتاۋ بولىپ قالا بەرمەك. وعان قوسا, «رۋحاني جاڭعىرۋ» ۇلتتىڭ وتكەن جولىن عىلىمي نەگىزدە قورىتۋدىڭ جاڭا فيلوسوفياسى مەن مۇمكىندىگىن ايقىنداپ بەردى. «وتان – ەلدىڭ اناسى, ەل – ەردىڭ اناسى» بولعاندىقتان دا, حالىق قامى ءۇشىن ايتىلاتىن ءسىزدىڭ ءاربىر پايىمىڭىزدى قاستەرلەيمىز. تاريحي-مادەني مۇرامىزدى ۇرپاقتان-ۇرپاققا اماناتتاۋ – پارىزىمىز! ءتىپتى ەكونوميكالىق جانە ءتۇرلى عىلىمي ءىس-شارالاردا شەتەلدىك ساراپشىلاردىڭ تۇشىمدى پىكىرىن ەستىگەندە مارتەبەمىز ءوسىپ قالاتىنىن دا جاسىرا المايمىز. مىسالى, 2017 جىلدىڭ 10 قاراشاسى كۇنى وتكىزىلگەن حالىقارالىق عىلىمي-تاجىريبەلىك ءىس-شاراعا كاتىسقان تۇركيا, ازەربايجان, وزبەكستان, قىرعىزستان, رەسەي جانە دە باسقا ەلدەردەن كەلگەن عالىم-ساراپشىلار تاراپىنان «رۋحاني جاڭعىرۋدىڭ» تاريح جانە سالت-داستۇرلەر ساباقتاستىعىنداعى رۋحاني-مادەني نەگىزدەرى جوعارى باعالاندى. «نامىستى مىڭدى جىعادى» دەمەكشى, ءسىزدىڭ قامشىلاۋىڭىزبەن حالىقارالىق ەكسپو-2017 كورمەسىنىڭ ءساتتى ءوتۋى ەل ابىرويىن ارتتىرا ءتۇستى.
قازاقستاندىقتاردىڭ پاتريوتتىق رۋحى ارتىپ, كەلەشەككە دەگەن سەنىمى نىعايا ءتۇستى. راسىندا, بۇل – اقيقات دۇنيە.
نۇرسۇلتان ءابىش ۇلى! سان سالالى قيىنشىلىقتار مەن كەدەرگىلەرگە قاراماستان, وسىنشاما ايتۋلى تاريحي وقيعالار مەن جەتىستىكتەردى كورە تۇرا ءسىزدىڭ كوشباسشىلىق قادىر-قاسيەتىڭىزدى تىلگە تيەك ەتپەۋ, بۇگىنگى زيالى قاۋىمعا سىن بولار ەدى. «جاقسىنىڭ جاقسىلىعىن ايت, نۇرى تاسىسىن!» دەمەكشى. قازاقستاننىڭ زيالى قاۋىم وكىلدەرى اتىنان سىزگە بويىڭىزعا قۋات, قارىمدى قادام, ۇزاق عۇمىر تىلەيتىنىمىزدى جەتكىزگىمىز كەلەدى.
قازىرگى كەزەڭدە قازاقستاندا ادام ءومىرىنىڭ ءمانى – ەل تىنىشتىعى, وتباسى اماندىعى, جەكە باستىڭ رۋحاني دامۋىنا مۇمكىندىك جاسالىپ قانا قويماي, جاڭا رۋحاني جاڭعىرۋ بەلەسىنە قادام باسىپ وتىرمىز. ءسىزدىڭ ءاربىر باستاماڭىز بەن كوزقاراستارىڭىزدى قولداۋ, كەلەشەك ءۇشىن ايانباي ەڭبەك ەتۋ جانە سۇبەلى ۇلەس قوسۋ – ءبىزدىڭ مىندەتىمىز!
ىزگى نيەتپەن,
قازاقستان رەسپۋبليكاسىنىڭ زيالى قاۋىم وكىلدەرى اتىنان:
ق.سارتقوجا ۇلى, ن.ايت ۇلى, ز.ساماشەۆ, ج.بەيسەنباي ۇلى, ق.احمەتجانوۆ, ق.سامات ۇلى, ت.جۇرتباي, ە.نۇرپەيىسوۆ, ر.ءيمانجۇسىپ, ا.قاشقىمباەۆ, ۆ.سالاحوۆ, ع.ەسىم, س.قاسىموۆ
