سۋرەتشى حامزا قيقىموۆ 200-دەن اسا سۋرەتتىڭ اۆتورى. ول ن.ۆ.گوگول اتىنداعى الماتى كوركەمونەر ۋچيليششەسى مەن اباي اتىنداعى قازاق پەداگوگيكالىق ينستيتۋتىن بىتىرگەن. رەسپۋبليكالىق جانە حالىقارالىق كورمەلەردىڭ بەلسەندى قاتىسۋشىسى بولا ءجۇرىپ, كوپتەگەن جۇلدەلەردىڭ يەگەرى اتانعان. ونىڭ ەڭبەكتەرى قازاقستان, اۋستريا, گەرمانيا, اقش جانە تاعى باسقا ەلدەردىڭ مۋزەيلەرى مەن جەكە كوللەكتسيا جيناقتايتىنداردىڭ قولىندا ساقتالعان.
كورمەنىڭ اشىلۋىندا قازاقستان رەسپۋبليكاسىنىڭ پرەزيدەنتى ءارحيۆىنىڭ ديرەكتورى بوريس جاپاروۆ وتكەن اپتادا استانا قالاسىندا پرەزيدەنت نۇرسۇلتان نازارباەۆتىڭ تۋعان ولكەسىنە ارنالعان «ۇشقوڭىر» كىتابىنىڭ تۇساۋكەسەرى بولعانىن اتاپ ءوتتى. ەڭبەكتە ەلباسىنىڭ قاناتتى سوزدەرىمەن كومكەرىلگەن بەلگىلى سۋرەتشىلەردىڭ تۋىندىلارى باسىلعان. سۋرەتشى شىعارماشىلىعىنا ارنالعان كورمەگە كەلگەندەردىڭ الدىندا ءسوز العان ارحيۆ ديرەكتورى بوريس جاپاروۆ: «وسى كىتاپقا حامزا قيقىموۆتىڭ «ۇشقوڭىر», «وتباسى» جانە تاعى باسقا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ تۋعان ولكەسىنە قاتىستى 12 سۋرەتى ەنگەن. بۇگىنگى كورمەگە سول سۋرەتتەردىڭ تورتەۋى قويىلدى. بۇگىنگى كۇنى ەلىمىزدە ورىن العان تۇبەگەيلى وزگەرىستەر, مەملەكەتتى دامىتۋعا باعىتتالعان تۇجىرىمدى قادامدار جاسامپاز ارەكەتتەرگە جەتەلەپ وتىر. ءوز كەزەگىمىزدە «ماڭگىلىك ەل» قايراتكەرلەرىنە» ارنالعان شارالارىمىزدىڭ بولاشاعى ايقىن, ىرگەسى بەرىك ەلدىڭ نەگىزىن قالاۋدا وسكەلەڭ ۇرپاق بويىنا ۇلتجاندىلىق پەن وتانسۇيگىشتىك قاسيەتتەر قالىپتاستىرۋدا ماڭىزى زور بولارىنا سەنەمىز», دەدى.
ح.قيقىموۆ – الماتى وبلىسىنىڭ گەربى مەن تۋىنىڭ, «الماتى وبلىسىنىڭ قۇرمەتتى ازاماتى» توسبەلگىسىنىڭ, تالدىقورعان قالاسى گەربىنىڭ اۆتورى. «الماتى وبلىسىنىڭ قۇرمەت گراموتاسى» ەسكيزى دە ح.قيقىموۆتىڭ ەڭبەگى.
ونەرتانۋشى ي.يۋفەروۆا بولسا, حامزا قيقىموۆتى «تەرەڭ ويلى, ىزدەنىمپاز سۋرەتشى» دەپ اتادى جانە ونى تابيعاتتىڭ اسەمدىگى مەن ۇلىلىعىن اشىپ كورسەتەتىن تابيعات ىرعاعى مەن سىزبالارى, جارىعى مەن بوياۋلارى قىزىقتىرادى, دەيدى. يرينا يۋفەروۆا كورمەگە سۋرەتشىنىڭ بۇرىنعى سۋرەتتەرىمەن قاتار سوڭعى كەزدەردەگى تۋىندىلارىنىڭ دا قويىلعانىنا نازار اۋداردى. سۋرەتشىنىڭ قازىرگى ەڭبەكتەرىنىڭ ەرەكشەلىگىن, ونىڭ سوڭعى كەزدەگى تۋىندىلارىنىڭ سەرپىندى جانە جىگەرلى, اسەم ءارى ابستراكتىلى شىعىپ جۇرگەنىنە توقتالىپ ءوتتى.
ال ح.قيقىموۆتىڭ شىعارماشىلىعىنا ارنالعان كوركەمونەر كورمەسى جەلتوقسان ايىنىڭ سوڭىنا دەيىن جۇرتشىلىق نازارىنا ۇسىنىلادى.
ايگۇل احانبايقىزى,
«ەگەمەن قازاقستان»
الماتى
