شىندىعىندا دا قازاقستاننىڭ تاۋەلسىز مەملەكەت بولىپ قالىپتاسۋىندا ەلباسىنىڭ سىڭىرگەن ەڭبەگى ولشەۋسىز. تۇڭعىش پرەزيدەنت كۇنىنىڭ 1 جەلتوقسانعا بەلگىلەنۋى دە تەگىننەن-تەگىن ەمەس. 1991 جىلى ءدال وسى كۇنى ەلىمىزدە العاش رەت جالپىحالىقتىق پرەزيدەنت سايلاۋى وتكىزىلدى. بۇل سودان كەيىنگى بارلىق جاقسىلىقتاردىڭ, اسىرەسە قازاقستان تاۋەلسىزدىگىنىڭ حابارشىسى ىسپەتتەس بولدى.
شيرەك عاسىرعا جۋىق ۋاقىت بويى ەلىمىزدە باسقا سالالارمەن بىرگە ىشكى اسكەرلەر دە دامىپ كەلەدى. 1992 جىلعى 10 قاڭتاردا مەملەكەت باسشىسى العاشقىلاردىڭ قاتارىندا ىشكى اسكەرلەر قۇرۋ تۋرالى جارلىققا قول قويدى. ال سول جىلى 23 ماۋسىمدا «قازاقستان رەسپۋبليكاسىنداعى ىشكى اسكەرلەر تۋرالى» زاڭعا قول قويىلدى. بۇل ىشكى اسكەرلەردىڭ ماقسات-مىندەتتەرىن ايقىنداپ بەرگەن تۇڭعىش قۇقىقتىق قۇجات ەدى.
تاۋەلسىزدىكتىڭ باستاپقى جىلدارى قىلمىس كوبەيىپ, مەملەكەت پەن قۇقىق قورعاۋ ورگاندارى قاۋىپ-قاتەردىڭ جاڭا تۇرلەرىمەن بەتپە-بەت كەلدى. مىنە, وسىنداي كەزدە ىشكى اسكەرلەر الدىندا قوعامدىق ءتارتىپتى قامتاماسىز ەتىپ, تۇرعىنداردى قىلمىستان قورعاۋ مىندەتى تۇردى. اسكەري قىزمەتكەرلەر وسى مىندەتتى بارىنشا ادال اتقارىپ كەلەدى.
اسكەرلەردىڭ قازىرگى زامانعى تالاپتارعا ساي بولۋى ەلباسىنىڭ ۇنەمى نازارىندا. پرەزيدەنتتىڭ 2014 جىلعى 21 ساۋىردەگى جارلىعىمەن ىشكى ىستەر مينيسترلىگىنىڭ ىشكى اسكەرلەرى ۇلتتىق ۇلانى بولىپ قايتا قۇرىلدى. بۇل بىزگە بۇرىنعىدان دا ايرىقشا جاۋاپكەرشىلىك جۇكتەيدى.
وسى ۋاقىت ىشىندە جوعارعى باس قولباسشى نۇرسۇلتان نازارباەۆتىڭ ساليقالى ساياساتىنىڭ ارقاسىندا قۇقىقتى اسكەرىمىز اياعىن نىق باسىپ, تىك تۇردى دەۋگە نەگىز بار. جىل سايىن بۋىنى بەكىپ, قۋاتى ارتىپ كەلەدى. ەلىمىزدىڭ قۇقىقتىق اسكەرى مەملەكەتىمىزدىڭ تاۋەلسىزدىگى مەن تىنىشتىعىنىڭ كەپىلى.
بۇگىنگى تاڭدا ۇلتتىق ۇلان اسكەرلەرى وزدەرىنىڭ كاسىبي شەبەرلىگىمەن, جاۋىنگەرلىك دايارلىعىنىڭ بەلسەندىلىك دەڭگەيىمەن جانە ماتەريالدىق-تەحنيكالىق قامتاماسىز ەتىلۋىمەن ەرەكشەلەنەدى.
حالىقتىڭ قاۋىپسىزدىگىن, ازاماتتاردىڭ بولاشاققا سەنىمدىلىگىن ارتتىراتىن, ەلىمىزدىڭ بەيبىت ءومىر ءسۇرىپ, دامۋىنا جاعداي جاسايتىن ارميانىڭ الار ورنى ەرەكشە.
ەر ازاماتپىن دەپ سانايتىن ءاربىر جان ءۇشىن ەڭ باستى مىندەت – وتان قورعاۋ. ەلباسىمىز ايتقانداي, پاتريوتتىق رۋح بىزگە اۋاداي قاجەت.
ءدال وسىنداي ءىس-شارالاردىڭ پاتريوتتى ۇرپاق تاربيەلەۋدە ماڭىزدىلىعى زور ەكەندىگى ءسوزسىز. بۇگىندە ەلىمىزدىڭ اسكەرىن ءبىز تاۋەلسىزدىگىمىزدىڭ قورعانى دەپ ماقتانىشپەن ايتا الامىز.
ەلباسىنا دەگەن حالىق سەنىمى تۇڭعىش پرەزيدەنت كۇنىن كەڭ كولەمدە اتاپ وتۋگە سەرپىلىس بەرۋدە. وسىعان وراي «باتىس» وڭىرلىك قولباسشىلىعىنا قاراستى اسكەري بولىمدەردە دە سالتاناتتى جيىندار ءوتىپ, كونتسەرتتەر مەن كورمەلەر ۇيىمداستىرىلۋدا.
كىتاپحانالاردا ەلباسىنىڭ ءومىر جولى تۋرالى فوتوكورمەلەر مەن ستەندىلەر جاساقتالسا, كلۋبتاردا دەرەكتى فيلمدەر كورسەتىلۋدە. وسىنداي شارالار كەزىندە اسكەري قىزمەتكەرلەر ەلباسىنىڭ كوشباسشى رەتىندەگى ءرولىن ودان سايىن تەرەڭ سەزىنە تۇسۋدە.
سوندىقتان دا وسى مەرەكەنى حالىق تاۋەلسىز مەملەكەتىمىزدىڭ نەگىزىن قالاعان ەلباسىنا دەگەن شەكسىز قۇرمەت, ەرەن دامۋدىڭ داڭعىل جولىنا سالىپ وتىرعان تاريحي تۇلعاعا دەگەن ءىلتيپات رەتىندە قابىلدادى.
شىندىعىنا كەلگەندە, ەلىمىزدىڭ تۇڭعىش پرەزيدەنتىنە ەلباسى اتاعىن حالىق الدەقاشان بەرىپ قويعان ەدى. ەلىمىزدىڭ پارلامەنتى ونى تەك زاڭدى تۇرعىدان عانا بەكىتتى.
ەلباسىنىڭ الەمدىك دەڭگەيدەگى قابىلەت-قارىمىنا, ساياسي ءىس-قيمىلىنا, ەكونوميكانى العا جىلجىتۋ جولىنداعى ءتيىمدى ساياساتىنا, ۋاقىت تالابىنا ساي ويلاستىرىلعان ستراتەگيالىق ۇستانىمدارىنا قالتقىسىز سەنگەن قازاقستاندىقتار ءوزىنىڭ تۇڭعىش پرەزيدەنتىنە, ەكى تىزگىن ءبىر شىلبىردى تەڭ ۇستاعان ەلباسىنا ارقاشان قولداۋ ءبىلدىردى, ءبىلدىرىپ تە كەلە جاتىر. تىزگىننىڭ بەرىك قولدا ەكەندىگى قازىرگى داعدارىستان دا داعدارماي شىعاتىنىمىزعا, ەلىمىزدىڭ ەڭسەسى بيىكتەي تۇسەتىنىنە نىق سەنىم ۇيالاتادى.
ءوز كەزەگىندە قازاقستان رەسپۋبليكاسى ۇلتتىق ۇلانىنىڭ اسكەرلەرى قۇقىقتىق تۇراقتىلىقتى ساقتاۋعا, ارنايى مەملەكەتتىك وبەكتىلەردى قورعاۋعا جانە باسقا دا قىزمەتتىك, اسكەري مىندەتتەردى ورىنداۋعا ارنالعان. وزدەرىنىڭ اسكەري مىندەتتەرىن ورىنداۋدا ۇلاندىقتار اسكەري جوعارى سانالىلىق پەن جانكەشتىلىك كورسەتۋدە.
ءوزىنىڭ جيىرما بەس جىلدىق مەرەكەسى اياسىندا ۇلتتىق ۇلان اسكەرلەرىنىڭ اتقارعان يگى شارالارى جەتەرلىك. ەڭ باستىسى, ولار جاستارعا وتاندى قورعاۋ, پرەزيدەنت پەن حالىققا جان اياماي ەڭبەك ەتۋ, ەلدى ءسۇيۋ, انت پەن پارىزعا ادال بولۋدىڭ جارقىن ۇلگىسىن كورسەتىپ ءجۇر.
ءسوز سوڭىندا ايتارىمىز, قازاقتا ءار زاماندا ەپتى, باتىل, ەرجۇرەك ساربازدار بولعان. ولار بارلىق قيىندىقتار مەن جورىق كەزىندەگى تۇرمىس مۇقتاجدىعىن كوتەرۋدە قابىلەت-قارىمىن كورسەتە بىلگەن. بۇگىنگى قازاقستان اسكەرلەرى, پرەزيدەنت ن.نازارباەۆ ايتقانداي, «داڭقتى وتكەنىمىزدەن كۇش الا وتىرىپ», وتكەنىمىزدى رۋحاني جالعاستىرۋشى جاڭا كۇش ەكەنىنە كامىل سەنەمىز.
الىبەك سەراليەۆ,
گەنەرال-مايور, ۇلتتىق ۇلان «باتىس» وڭىرلىك قولباسشىلىعىنىڭ قولباسشىسى
ورال
