ءار نىساننىڭ وزىندىك ماڭىزى مەن ەرەكشەلىگى بار. دەگەنمەن, اۋدان تۇرعىندارى ەكى گەكتاردان استام جەردى الىپ جاتقان تاۋەلسىزدىك ساياباعى شولاققورعاننىڭ اجارىن اشا تۇسكەنىن ايتۋدا. ساياباقتا تاۋەلسىزدىكتى ايشىقتايتىن مونۋمەنت پەن 30 مەترلىك تۇعىردا كوك بايراق ورناتىلعان. سونداي-اق, سۋ بۇرقاقتار مەن جول ايرىقتار سالىنعان, وتباسىمەن سەرۋەندەپ, دەمالۋعا جاعداي جاسالعان. ساياباقتىڭ قۇرىلىس جۇمىستارىن «اممار پروەكت» جشس-ءى جۇرگىزىپتى. دەمالىس ورنىنىڭ اشىلۋىنا قاتىسقان اۋدان اكىمى سالىحان پولاتوۆ بارشا تۇرعىنداردى تاۋەلسىزدىك مەرەكەسىمەن قۇتتىقتاپ, اۋدانعا كورىك بەرەتىن ساياباق سوزاقتىقتار مەن قوناقتار ءۇشىن سايالى مەكەن بولاتىنىن اتاپ ءوتتى.
ايتۋلى مەرەكەگە وراي اشىلعان ەكى بىردەي بالاباقشا مەملەكەتتىك-جەكەمەنشىك ارىپتەستىك اياسىندا ەل يگىلىگىنە بەرىلدى. اۋدان ورتالىعىنداعى جالپى الاڭى 254 شارشى مەتردى قۇرايتىن «اسىل-اي» بوبەكجاي-بالاباقشاسى 75 بالاعا ارنالعان. ال, سوزاق اۋىلدىق وكرۋگىندەگى قوس قاباتتى «ايدىن» بالاباقشاسى 100 ورىندىق. بالالار ءۇشىن بارلىق جاعداي جاسالعان باقشادا مەديتسينالىق كابينەت, ءتورت ويىن, ءتورت جاتىن بولمەسى مەن اكت زالى بار. بالالار تاماقتاناتىن اسحانا مەن شارۋاشىلىق بولمەسى جەكە ورنالاسقان. سونداي- اق, بۇل كۇنى, بۇقارالىق سپورتتى دامىتۋ ماقساتىندا, ۋران وندىرەتىن «ينكاي» جشس-ءنىڭ دەمەۋشىلىگىمەن سالىنعان, شولاققورعان, تاستى, قۇمكەنت اۋىلدارىندا سپورت الاڭشالارى ەل يگىلىگىنە بەرىلدى.
عالىمجان ەلشىباي,
«ەگەمەن قازاقستان»
