قۇس سالىپ, اڭ اۋلاۋعا قىزىعۋشىلىق تانىتقاندار استانا جانە كوكشەتاۋ قالالارىنان ارنايى اۆتوبۋستارمەن تەكەكول جاعاسىنا جەتكىزىلگەن سوڭ, سالتاناتتى اشىلۋ ءراسىمى بولىپ ءوتتى. وعان كوپپەن بىرگە موڭعوليانىڭ قازاقستانداعى توتەنشە جانە وكىلەتتى ەلشىسى لۋۆسان باتتۋلگا, ۆەنگريانىڭ قازاقستانداعى توتەنشە جانە وكىلەتتى ەلشىسىنىڭ ورىنباسارى شاندو دوروگي, اقمولا وبلىسى اكىمىنىڭ ورىنباسارى اينا ءمۇسىرالىموۆا جانە دە ۇلتتىق سپورت تۇرلەرى بويىنشا رەسپۋبليكالىق اسسوتسياتسياسىنىڭ وكىلدەرى قاتىستى. سونداي-اق ايتۋلى حالىقارالىق تۋرينيرگە قازاقستاننىڭ ءار ءوڭىرىنىڭ, رەسەي, قىتاي, قىرعىزستان, موڭعوليا جانە ۆەنگريانىڭ 50-گە تارتا قۇسبەگىلەرى كەلىپتى.
رەتى كەلگەندە بۇركىتشى ءماسىپ باتىرحان ۇلى تۋرالى بىرەر ءسوز ايتا كەتكەن ورىندى شىعار. ەكىنشى دۇنيەجۇزىلىك سوعىسى جىلدارىندا بارلىعى دا قان مايدانعا جونەلتىلىپ, حالىق اش-جالاڭاش كۇي كەشكەنى ءمالىم. مىنە, وسىنداي قيىنشىلىق زاماندا ايتۋلى بۇركىتشى زەرەندى اۋدانىندا قۇس پەن اڭ اۋلاپ, بالالار مەن قاريالارعا تاراتىپ بەرگەن كورىنەدى. ءوزى دە ءبىراز جاسقا كەلگەنىنە قاراماستان, اڭشىلىقپەن اينالىسا ءجۇرىپ اڭ تەرىسىن رەسەيگە جونەلتىپ, ودان تۇسكەن قارجىعا وق ءدارى ساتىپ الىپ, مايدانعا جونەلتىپ وتىرعان. سوندىقتان دا ءبىر كەزدەرى وزدەرىن اشتىقتان قۇتقارعان, اتى اڭىزعا اينالعان اڭشىعا ارناپ ۇرپاقتارى ونىڭ قۇرمەتىنە جىل سايىن وسىلايشا قۇسپەن اڭ اۋلاۋ سايىسىن وتكىزىپ كەلەدى.
ءۇش كەزەڭنەن تۇرعان تۋرنير بارىسىندا بۇركىتشى مەن قۇستىڭ سىرتقى كەلبەتى, ولاردىڭ كوكتە ەركىن قالىقتاۋى جانە اڭ اۋلاۋى بويىنشا باعالاندى. قۇسبەگىلەردىڭ قۇستاردى باپتاۋى مەن ولاردىڭ كوكتە ەركىن قۇيعىتۋى, اڭ مەن قۇسقا قۇيىلا كەلىپ باس سالۋى ەستە قالارلىقتاي اسەر ەتكەنى كورىنىپ تۇردى. تابيعات اياسىندا عانا بولاتىن مۇنداي اسەرلى كورىنىس كورەرمەندەردىڭ كوكەيىندە ۇزاق ساقتالارى ءسوزسىز. وسى تۇرعىدان كەلگەندە ۇيىمداستىرۋشىلار كورەرمەندەرگە ۇلكەن مەرەكە سىيلادى دەپ تۇيىندەۋگە بولادى. ونىڭ ۇستىنە اتالعان شارانى بارىنشا تارتىمدى ەتۋ ماقساتىندا اقمولا وبلىسىنىڭ اكىمدىگى «قانسونار-2017» حالىقارالىق ءتۋرنيرى جەڭىمپازىنا جەڭىل اۆتوكولىك تىكتى. بۇدان باسقا, ۇلتتىق سپورت تۇرلەرى بويىنشا رەسپۋبليكالىق قاۋىمداستىق تاراپىنان 2 ميلليون تەڭگە سىياقى تاعايىندالعاندىعىن ايتا كەتۋ كەرەك. تارتىستى وتكەن تۋرنير بارىسىندا اقمولا وبلىسى, ەڭبەكشىلدەر اۋدانىنىڭ وكىلى قانات شۇلەنباەۆ جەڭىمپاز دەپ تانىلىپ, باس جۇلدە اۆتوكولىككە يە بولدى. بۇل ورايدا قاتىسۋشىلار دا, كورەرمەندەر دە «قانسونار» ءتۋرنيرىنىڭ ەلىمىزدە عانا ەمەس, سونىمەن قاتار شەتەلدەردە دە جالعاسىن تاباتىنىنا سەنىم ءبىلدىردى.
اسقار تۇراپباي ۇلى,
«ەگەمەن قازاقستان»
اقمولا وبلىسى
