«بارشاعا ءمالىم, ادام ورگانيزمىنىڭ ءتۇرلى ورگاندارى مەن جۇيەلەرىنىڭ زەڭ ساڭىراۋقۇلاعىمەن زاقىمدانۋىن ميكوز دەپ اتايدى. قازىرگى تاڭدا ميكوز ينفەكتسيالارىنىڭ دەڭگەيى جىلدان-جىلعا ۇلعايىپ جانە ونىڭ 400-دەن استام ميكروسكوپيالىق ءتۇرى بار ەكەندىگى بۇرىننان بەلگىلى. بۇگىندە الەمدەگى حالىقتىڭ شامامەن بەسىنشى بولىگى تەرىنىڭ وسى ميكوز اۋرۋىنان زارداپ شەگىپ وتىر. بۇل ينفەكتسيالاردىڭ قارقىندى ءوسۋىنىڭ سەبەبى – پاتوگەندى ساڭىراۋقۇلاقتاردىڭ بەلسەندىلىگىنىڭ ارتۋىنا, ەمدەۋ بارىسىندا وسى كۇنگە دەيىن قولدانىلىپ كەلگەن شەتەلدىك انتيبيوتيكتەرگە داعدىلانۋىنا بايلانىستى. سونداي-اق ادام يممۋنيتەتىنىڭ ينفەكتسياعا قارسى تۇرا الماۋىنىڭ سالدارىنان بۇل اتالعان اۋرۋمەن كۇرەسۋ وڭايعا سوقپاي وتىر», دەيدى ميكروبيولوگيا جانە ۆيرۋسولوگيا ينستيتۋتىنىڭ باس ديرەكتورى, قازاقستاننىڭ ەڭبەك سىڭىرگەن قايراتكەرى, «قۇرمەت» وردەنىنىڭ يەگەرى, اكادەميك امانگەلدى قۇربان ۇلى.
بۇل پرەپاراتتىڭ نەگىزى قازاقستاننىڭ توپىراقتارىنان ءبولىنىپ الىنعان ميكروورگانيزمدەردىڭ شتامدارىنان جاسالعان انتيبيوتيك. ونىڭ كوپتەگەن تۇماۋ, پاراميكسوۆيرۋستار, وسپوۆاكتسينا مەن راۋس ساركوماسى ۆيرۋستارىنىڭ كوبەيۋىن دەر كەزىندە تەجەي الاتىن قابىلەتكە يە ەكەندىگى, ياعني ۆيرۋستارعا دا ەمدىك قاسيەتتەرىنىڭ جوعارى ەكەندىگى انىقتالدى.
انتيبيوتيكتى ونەركاسىپتىك دەڭگەيدە شىعارۋ ءۇشىن جەرگىلىكتى شتامنان سەلەكتسيا جاساۋ ارقىلى بەلسەندىلىگى جوعارى شتامم-پرودۋتسەنتتى ءبولىپ الدىق. بۇل پرودۋتسەنتتى ءوسىرۋدى كوبەيتۋ ءۇشىن كوپ قارجى تالاپ ەتپەيتىن قولايلى قورەكتىك ورتا قۇرامى جانە انتيبيوتيكتى تازارتۋدىڭ قاراپايىم ءارى ىڭعايلى تەحنولوگياسى تاڭداپ الىندى. اتاپ ايتقاندا, بۇل انتيبيوتيكتى ۇلكەن كولەمدە ءوندىرۋ ءۇشىن تيىمدىلىگى وتە جوعارى جانە دە كوپ شىعىندى قاجەت ەتپەيتىن جاڭا تەحنولوگيا ازىرلەندى. ناتيجەسىندە, پرەپاراتتىڭ جاڭا وتاندىق دارىلىك ۇلگىسى جاسالىندى, دەيدى ماماندار.
«روزەوفۋنگين-اس» – قازاقستان رەسپۋبليكاسىنداعى مەديتسينالىق ماقساتتا قولدانىلاتىن العاشقى ءارى ازىرشە جالعىز وتاندىق تازا انتيبيوتيك.
وسىعان وراي, ميكروبيولوگيا جانە ۆيرۋسولوگيا ينستيتۋتىنىڭ بازاسىندا ادامنىڭ ينفەكتسيالىق زەڭ اۋرۋلارىمەن كۇرەسۋى ءۇشىن كەلەشەكتە تيىمدىلىگى جوعارى جاڭا دارىلىك پرەپاراتتاردىڭ باسقا دا تۇرلەرىن جاساۋعا باعىتتالعان جۇمىستاردى ءارى قاراي دا جالعاستىرۋ جوسپارلانىپ وتىر.
ساپارباي پارمانقۇل,
«ەگەمەن قازاقستان»
الماتى
