– روزا باعلانوۆا اپامىز 90 جاسىنا 10 اي عانا جەتپەي ومىردەن ءوتتى. قازاق جۇرتىنا عانا ەمەس, كسرو اتالعان الىپ مەملەكەتكە تانىمال بولعان ايگىلى ءانشى باقىتتى عۇمىر ءسۇردى دەپ ايتا الامىن. روزا اپامىزدىڭ جانىندا 24 جىل بىرگە ءجۇرىپ, كومەكشى بولدىم. بارماعان جەرىم, باسپاعان تاۋىم بولمادى, اپامنىڭ ارقاسىندا تالاي-تالاي ازاماتپەن ەتەنە بولىپ كەتتىم. «باقىت دەگەن نە؟» دەسە, باقىتتى ادامداردىڭ قاسىندا ءجۇرىپ, قىزمەت ەتۋ دەر ەدىم, – دەيدى وسى كەشتى ۇيىمداستىرۋشى, قازاقستان رەسپۋبليكاسىنىڭ مادەنيەت قىزمەتكەرى قۋانىش ابدىقالىموۆ اعىنان جارىلىپ.
ەسكە الۋ كەشىندە كورەرمەندەر ايگىلى ءانشى تۋرالى دەرەكتى ءفيلمدى تاماشالاپ, ەستەلىكتەر تىڭدادى. عاريفوللا قۇرمانعاليەۆ اتىنداعى باتىس قازاقستان وبلىستىق فيلارمونياسىنىڭ جانىنان قۇرىلعان «ورال سازى» فولكلورلىق ءانسامبلى ساحناعا شىعىپ, ونەر كورسەتتى.
– بيىل روزا باعلانوۆانىڭ تۋعانىنا 95 جىل تولىپ وتىر. وسىعان وراي ەلىمىزدىڭ بىرقاتار وبلىسىندا وسىنداي ەسكە الۋ كەشتەرىن ۇيىمداستىردىق. قورىتىندى شارانى كەلەر جىلدىڭ باسىندا استانادا وتكىزبەكپىز. قۇدايعا شۇكىر, اپامىز كوزى تىرىسىندە ءوزى قۇرعان «التىن ساقا» قايىرىمدىلىق قورى ءالى قىزمەت ەتىپ جاتىر. جەتىم, مۇگەدەك بالالارعا, سوعىس ارداگەرلەرىنە كومەك كورسەتەمىز. الماتى قالاسىندا روزا باعلانوۆانىڭ اتىنا كوشە بەرىلدى. مۇنداي قۇرمەت استانا قالاسىندا دا كورسەتىلەدى دەپ كۇتىپ وتىرمىز. وسى كەشتى ۇيىمداستىرۋعا دەمەۋشىلىك كورسەتكەن «ەير استانا» اۋە كومپانياسىنا العىسىم شەكسىز, – دەيدى ءانشىنىڭ پروديۋسەرى قۋانىش وتەش ۇلى.
قازبەك قۇتتىمۇرات ۇلى,
«ەگەمەن قازاقستان»
ورال
سۋرەتتى تۇسىرگەن
ايباتىر نۇراش
