- ءبىزدىڭ كوماندا تاعى دا قازاق فۋتبولىنىڭ تاريحىنا تۇزەتۋ ەنگىزدى. مەنىڭ شاكىرتتەرىم بۇگىن قاھارمان دەگەن اتاققا لايىق. ەكىنشى تايمدا كىشىگىرىم ماسەلەلەر بولعانىمەن, سەنىمىمدى اقتاپ بەردى. بارلىقتارىڭىزدى قۇتتىقتايمىن.
- ەكىنشى تايمدا ءبىزدىڭ كوماندا كوبىنەسە باياۋ شابۋىلدادى. ءسىز ءۇزىلىس كەزىندە جىگىتتەرگە وسىنداي نۇسقاۋ بەرىپ پە ەدىڭىز؟
- ءيا ارينە, ەكىنشى تايمدا فۋتبولشىلار كوپ ۋاقىت سوزىپ, قاپتال ارقىلى شابۋىلداي ءتۇستى. كوبىرەك ستاندارتتىق جاعدايلار جاسادىق. بارلىعىن باياۋ جاساۋعا تىرىستىق. بىزگە ۋاقىتتى سوزۋ ماڭىزدى بولدى. مۇنداي دەڭگەيگە جەتۋ ءۇشىن وسىلاي ويناۋعا ءماجبۇر ەدىك. ءتۇبى ناتيجەگە جەتكەنىمىزگە قۋانىشتىمىز. مەن قازاقستانعا كەلگەلى بەرى كوماندا اجەپتەۋىر كوتەرىلدى دەپ ايتا الامىن. بىرنەشە فۋتبولشىنىڭ دەڭگەيى اناعۇرلىم وسكەنىن بايقادىم. ەندى قازاقستاننىڭ فۋتبول كلۋبىن بارلىعى دا بىلەتىن بولادى دەپ ويلايمىن.
- «سلاۆيا» باپكەرى وسى ويىننان كەيىن ورنىن بوساتادى دەيدى. ورنىنا ءسىزدى شاقىرسا كەلەسىز بە؟
- «سلاۆيانىڭ» باپكەرى ادەيى ۇتىلعان جوق. ماسەلە باپكەردە ەمەس. شيلگاۆىنى الىپ تاستاسا بۇل ۇلكەن قاتەلىك بولار ەدى. ءبىر جەڭىلىستەن تراگەديا جاساۋدىڭ كەرەگى شامالى. «سلاۆيا» كەرەمەت ستاديونى, جاقسى جانكۇيەرى بار, بولاشاعى زور ۇجىم. سوندىقتان دا, ساتتىلىك تىلەيمىن.
- اپتا بۇرىن چەحياعا كەلىپ جاتتىققاندارىڭىز كومەگىن تيگىزدى مە؟
- اپتا بۇرىن كەلگەندەگى جاتتىعۋلارىمىز جاقسى اسەرىن بەردى. ساعات بەلدەۋىنە ۇيرەندىك, ءبىر اپتا بويى وسى الاڭدا جاتتىقتىق. فۋتبولشىلارعا وسى جاعى كومەكتەستى. مەن فۋتبولشىلارمەن دوستىق كوڭىلدە اڭگىمەلەستىم. "سەندەر ودان ارى قاراي وتكىلەرىڭ كەلە مە؟" دەپ سۇرادىم. ولار بىردەن ء"يا" دەگەن جاۋاپ بەردى. سودان بەرى ءبىز قولدان كەلگەن جاتتىعۋلاردىڭ بارلىعىن جاساپ كوردىك. مىنە, سونىڭ ناتيجەسىن وزدەرىڭىز كورىپ وتىرسىزدار. بۇل ۇزاق جاسالعان ەڭبەكتىڭ جەمىسى.
- كەلەسى جىلعى ويىنعا دەيىن «استانانىڭ» قاي پوزيتسياسىن كۇشەيتۋ كەرەك دەپ ەسەپتەيسىز. سونىمەن قاتار, ۇلتتىق قۇراماعا شاقىرسا كەلەسىز بە؟
- بۇل كوماندانى جاساقتاۋ وڭاي بولعان جوق. ۋەفا بىزگە ترانسفەر جاعىنان شەكتەۋ قويدى. فۋتبولشىلاردى تەك جالعا عانا الۋعا مۇمكىندىگىمىز بولدى. ءبىر-ەكى شەپتەگى جىگىتتەردى اۋىستىرۋ كەرەك تە شىعار. ونى قارجىلىق جاعدايعا بايلانىستى شەشەمىز. ال ۇلتتىق قۇرامانىڭ قانداي ويى بار ەكەنىن مەن بىلمەيمىن. ەگەر شاقىرسا مەن ويلانىپ كورەمىن. سەبەبى, مەندە ودان وزگە دە ۇسىنىستار بار. مەن كوڭىلىمە قايسىسى جاعادى سونى تاڭدايمىن.
- پلەي-وفف ساتىسىندا قانداي قارسىلاستى قالايسىز؟
- ازىرگە مەن پلەي-وففتا قانداي كوماندالار بار ەكەنىن دە بىلمەيمىن عوي. جەرەبەدە ارقاشان وتۋگە بولاتىن كوماندالاردىڭ تۇسكەنىن قالايمىن. ءدال قازىر مەن دەمالىستى جانە فۋتبولشىلاردىڭ جاعدايىن ويلايمىن. قالعانىن كورە جاتارمىز. قانشا جەردەن مىنا قارسىلاس تۇسسە ەكەن دەگەنىمەن ول تۇسە قويمايدى.
ەرمۇحامەد ماۋلەن
