تاياۋدا بۇكىلرەسەيلىك قوعامدىق پىكىردى زەرتتەۋ ورتالىعى ەلدەگى تۇرعىنداردىڭ تمد-عا مۇشە مەملەكەتتەر مەن ولاردىڭ باسشىلارى جونىندەگى كوزقاراسىنا ساراپتاما جاساعان ەكەن. ورتالىق تاراتقان دەرەكتەرگە سۇيەنسەك, كەيىنگى كەزدەرى مۇشە مەملەكەتتەرگە حالىقتىڭ وڭ پىكىرى قالىپتاسقان. اسىرەسە ساۋالناماعا قاتىسقان رەسەيلىكتەر بەلارۋس پەن قازاقستاندى باسقالارعا قاراعاندا سەنىمدى سەرىكتەس رەتىندە ەسەپتەيتىنىن جەتكىزگەن.
ورتالىقتىڭ وكىلى ەلەنا ميحايلوۆانىڭ ايتۋىنشا, بەلارۋس پەن قازاقستان جونىندەگى جىلى پىكىر قالىپتاسۋىنا ەكى ەلدىڭ كەدەندىك وداق پەن ەۋرازيالىق ەكونوميكالىق وداقتىڭ نەگىزىن قۇراۋى سەبەپ بولعان. ساۋالناماعا قاتىسقانداردىڭ 60 پايىزى بەلارۋستى, 41 پايىزى قازاقستاندى «ەڭ تۇراقتى ءارى تابىستى» مەملەكەت ساناتىنا قوسقان. ە.ميحايلوۆا رەسەي تۇرعىندارى حالىقارالىق ارەنادا دا قازاقستان مەن بەلارۋستى رەسەيدىڭ سەنىمدى سەرىكتەسى دەپ سانايتىنىن ايتادى. سونداي-اق ساۋالنامادا تمد-عا مۇشە مەملەكەتتەردىڭ باسشىلارى تۋرالى دا سۇراق قويىلعان ەكەن. وعان قاتىسقانداردىڭ باسىم بولىگى ەلباسى نۇرسۇلتان نازارباەۆتىڭ حالىقتىڭ سەنىمىنە يە ەكەنىن اتاعان.
حالىقارالىق قاتىناستار جونىندەگى ماسكەۋ مەملەكەتتىك ينستيتۋتىنىڭ ورتالىق ازيا مەن اۋعانستانداعى ماسەلەلەردى زەرتتەۋ ورتالىعىنىڭ ديرەكتورى اندرەي كازانتسەۆ ساۋالنامانىڭ ناتيجەسى رەسەيلىكتەردىڭ تمد-عا مۇشە مەملەكەتتەرگە جالپى كوزقاراسىن بىلدىرگەنىمەن, كەيبىر جاعدايلاردا كەلىسپەيتىن ماسەلەلەر بار ەكەنىن ايتادى.
«رەسەيلىكتەردىڭ كورشى ەلدەرگە قانداي تۇرعىدان قارايتىنىن ەسكەرۋ كەرەك. بۇعان الەۋمەتتىك-مادەني جاعداي مەن سلاۆيان بىرەگەيلىگى سەكىلدى فاكتورلار اسەر ەتەدى. سونىڭ ناتيجەسىندە, ساۋالنامادا بەلارۋس قازاقستانعا قاراعاندا تابىستى مەملەكەت بولىپ كورىنگەن. الايدا بۇل شىندىقتان الشاق جاتىر. ءىجو-ءنىڭ تيىمدىلىگى جونىنەن قازاقستان عانا رەسەيمەن باسەكەلەسە الادى. قازاقستان تمد بويىنشا رەسەيدىڭ قارجىلىق قولداۋىن قاجەت ەتپەيتىن بىردەن-ءبىر مەملەكەت», دەيدى ا.كازانتسەۆ.
مۇنداي پىكىردى جەرگىلىكتى ماسەلەلەر جونىندەگى ورتالىقتىڭ ديرەكتورى دميتري جۋراۆلەۆ تە ءبىلدىردى. ونىڭ ايتۋىنشا, حالىقتىڭ سەنىمى بويىنشا ا.لۋكاشەنكونىڭ توپ باستاۋىنا رەسەيلىكتەردىڭ بەلارۋس تاريحىن جاقسى ءبىلۋى نەگىز بولعان. «الايدا ومبى مەن چەليابى سەكىلدى تۇرمىسى قازاقستانمەن تىعىز بايلانىستى وبلىستاردا ساۋالناما جۇرگىزگەندە, ساۋالنامانىڭ ناتيجەسى باسقاشا بولاتىنى ءسوزسىز. وسى ورايدا, قازاقستان مەن رەسەي اراسىنداعى ءبىلىم بەرۋ بايلانىسىنىڭ ماڭىزدىلىعىن اتاپ وتكىم كەلەدى», دەدى د.جۋراۆلەۆ.
رەسەيلىك ساراپشىلار مەن حالىقتىڭ قازاقستان تۋرالى وڭ پىكىر ءبىلدىرۋى بەكەر ەمەس. رەسەي – قازاقستاننىڭ ەڭ ۇلكەن ساۋدا سەرىكتەسى. ماسەلەن, 2015 جىلى ەكى ەل اراسىنداعى ساۋدا اينالىمى 14,6 ميلليارد دوللارعا جەتكەن.
اباي اسانكەلدى ۇلى,
«ەگەمەن قازاقستان»
