جيىنعا ءبىلىم جانە عىلىم مينيسترلىگىنىڭ مەكتەپكە دەيىنگى جانە ورتا ءبىلىم بەرۋ دەپارتامەنتىنىڭ ينكليۋزيۆتى جانە ارنايى ءبىلىم بەرۋ ءبولىمىنىڭ باسشىسى ايكەرىم كۇدەرينوۆا, «اشىق الەم» جاستار ەرىكتىلەر ءۇيى» قق ديرەكتورى ليۋدميلا كايگورودتسەۆا, استانا قالاسى اكىمدىگىنىڭ №2 پسيحولوگيالىق-پەداگوگيكالىق تۇزەتۋ كابينەتىنىڭ پەداگوگ-دەفەكتولوگ, ادىسكەرى ساۋلە ساعىمباەۆا قاتىستى.
كورۋ قابىلەتى تومەن بالالارعا ارنالعان ارنايى تاكتيلدى كىتاپتار «اشىق الەم» جاستار ەرىكتىلەر ءۇيى» قق مەن «Samruk-KazynaTrust» الەۋمەتتىك جوبالاردى دامىتۋ قورىنىڭ بىرىگىپ جۇزەگە اسىرىپ جاتقان «ەرەكشە بالالارعا ارنالعان ەرەكشە كىتاپتار» جوباسىنىڭ اياسىندا باسىپ شىعارىلعان.
«بۇگىنگى تاڭدا ءبىلىم جانە عىلىم مينيسترلىگى زاعيپ بالالارعا ارنالعان برايل قارىپىمەن تەرىلگەن وقۋلىقتار جانە كورۋ قابىلەتى تومەن بالالارعا ارنالعان ءىرى قارىپتى وقۋلىقتار مەن واك قامتاماسىز ەتۋ بويىنشا بەلسەندى جۇمىس جۇرگىزىپ جاتىر. «Samruk-Kazyna Trust» قورىمەن بىرلەسە وتىرىپ جۇزەگە اسىرىلىپ جاتقان «ەرەكشە بالالارعا ارنالعان ەرەكشە كىتاپتار» جوباسىنىڭ اياسىندا قازىر كورۋ قابىلەتى تومەن جانە زاعيپ بالالارعا ارنالعان تاكتيلدى وقۋلىقتار دايىندالدى», دەدى ءبىلىم جانە عىلىم مينيسترلىگىنىڭ وكىلى ايگەرىم كۇدەرينوۆا.
ونىڭ ايتۋىنشا, 2016-2019 جىلدارعا ارنالعان قازاقستان رەسپۋبليكاسىندا ءبىلىم جانە عىلىمدى دامىتۋدىڭ مەملەكەتتىك باعدارلاماسىنا سايكەس, كورۋ قابىلەتى تومەن بالالارعا جانە اقىل-ويىندا اۋىتقۋشىلىعى بار بالالارعا ارنالعان وقۋلىقتار ازىرلەۋ قاراستىرىلعان.
«وسى جىلى قازاقستاندا العاش رەت جاڭارتىلعان باعدارلاماعا سايكەس برايل جۇيەسى بويىنشا «ساۋات اشۋ» جانە «ساۋاتتىلىقتى دامىتۋ» 1-سىنىپ وقۋشىلارىنا ارنالعان وقۋلىقتار مەن واك دايىندالدى. جوبا اياسىندا 250 تاكتيلدى كىتاپ دايىندالدى. ولار قازاقستان بويىنشا كوزى ناشار كورەتىن بالالارعا ارنالعان 29 مامانداندىرىلعان مەكتەپكە دەيىنگى مەكەمەلەرگە جانە مەكتەپتەرگە تاراتىلادى. بۇل كىتاپتاردىڭ باستى ماقساتى – كوزى ناشار كورەتىن بالالارعا قورشاعان ورتانى تانىپ, بىلۋىندە كومەك كورسەتۋ», دەدى ول.
راۋان قايدار,
«ەگەمەن قازاقستان»
