گااگالىق سوت پرالياكتان وزگە بەس بوسنيالىق حورۆاتتىڭ اپپەلياتسياسىن قاراعان. 2013 جىلى پرالياكقا بوسنيالىق مۇسىلماندارعا قارسى اسكەري قىلمىس جاسادى دەگەن ايىپ تاعىلىپ, 20 جىلعا باس بوستاندىعىنان ايىرعان.
ۇكىم وزگەرىسسىز قالاتىنى بەلگىلى بولعاننان كەيىن پرالياك باسىن شالقايتىپ, قۇتىداعى سۇيىقتىقتى جۇتىپ جىبەرەدى. وسىدان كەيىن ول سۋدياعا قاراپ: «قازىر عانا ۋ ءىشتىم. مەن بۇل شەشىمگە نارازىمىن», دەيدى. ونىڭ ارەكەتىن ادۆوكاتى دا راستايدى. ءوز كەزەگىندە سۋديا بىردەن سوت وتىرىسىن توقتاتىپ, دارىگەر شاقىرادى. ارادا ءۇش ساعات وتكەننەن كەيىن جەرگىلىكتى تەلەارنالاردىڭ ءبىرى ونىڭ قايتىس بولعانىن حابارلادى.
ءتورت جىل بۇرىن تريبۋنال بوسنيالىق حورۆاتتاردىڭ كوشباسشىسى يادرانكو پرليچۋدى 25 جىلعا بوستاندىعىنان ايىرعان بولاتىن.
پرليچ پەن پرالياك 1991 جىلى يۋگوسلاۆيا مەن بوسنيا سوعىستارىنىڭ ىدىراۋى ناتيجەسىندە قالىپتاسقان, ياعني مويىندالماعان گەرتسەگ-بوسنا رەسپۋبليكاسى باسشىلىعىنىڭ قۇرامىنا ەنگەن. 2004 جىلى پرالياك پەن وزگە بەس گەنەرالعا 1993 جىلى بوسنيادا مۇسىلمانداردى اياۋسىز قىردى دەگەن ايىپ تاعىلدى. مۇنداي حاباردى ەستىگەننەن كەيىن ولار گااگاداعى حالىقارالىق قىلمىستىق تريبۋنالعا ەش قارسىلىقسىز بەرىلگەن.
وتكەن اپتادا گااگالىق تريبۋنال بوسنيالىق سەرب اسكەرىنىڭ بۇرىنعى گەنەرالى راتكو ءملاديچتى ءومىر بويىنا باس بوستاندىعىنان ايىرعان بولاتىن. تريبۋنالدىڭ پىكىرى بويىنشا ملاديچ بوسنيالىق سوعىس كەزىندە مىڭداعان بەيبىت تۇرعىندى اياۋسىز ولتىرگەن. ال ەڭ باستى تاعىلعان ايىپ – 1995 جىلى ونىڭ بۇيرىعى بويىنشا جەتى مىڭ مۇسىلمان ءولىم جازاسىنا كەسىلگەن. ونىڭ اياۋسىز ارەكەتى ءۇش جىلعا جالعاسقان. وسى ۋاقىت ارالىعىندا 10 مىڭنان استام ادام مەرت بولدى. ملاديچ بۇل ايىپتاردىڭ ەشقايسىسىمەن كەلىسپەيتىنىن, تەك ازاماتتىق سوعىس كەزىندە ءوز حالقىن قورعاعانىن ايتىپ اقتالدى.
دايىنداعان ايان ءابدۋالي, «ەگەمەن قازاقستان»
