سۋرەتتەر پرەزيدەنتتىڭ ءباسپاسوز قىزمەتىنەن الىندى
قىرعىزستان تاراپىنان جاسالعان ءوتىنىش بويىنشا وتكەن كەزدەسۋ بارىسىندا پرەزيدەنتتەر ەكىجاقتى قارىم-قاتىناستى دامىتۋ مۇمكىندىكتەرىن تالقىلاپ, قازاق-قىرعىز شەكاراسىنداعى جاعداي تۋرالى سويلەستى.
نۇرسۇلتان نازارباەۆ سوورونباي جەەنبەكوۆتى قىرعىزستاننىڭ پرەزيدەنتى بولىپ سايلانۋىمەن قۇتتىقتادى. ء"بىز باۋىرلاس حالىق رەتىندە, كورشى مەملەكەتتەر رەتىندە رەسپۋبليكالارىمىز اراسىنداعى تىعىز قارىم-قاتىناستى دامىتا بەرەمىز دەپ ويلايمىن", دەي كەلە نۇرسۇلتان نازارباەۆ ەكى مەملەكەت شەكاراسىنداعى جاعدايدىڭ سەبەبىن كوپشىلىك بىلەتىنىن اتاپ ءوتتى.
مەملەكەت باسشىسى ەكى ەلدىڭ ۇكىمەتتەرى ءبىر-ەكى كۇندە جول كارتاسىن قاراستىراتىنىن, ول ءۇشىن قىرعىز ۇكىمەتىنىڭ دەلەگاتسياسى قازاقستانعا كەلەتىندىگىن ايتتى. ء"بىز قازاقستان مەن قىرعىزستان ۇكىمەتتەرى جاساعان جول كارتاسىن قاراستىردىق. ەكى مەملەكەتتىڭ جۇمىس توپتارى ونى جان-جاقتى تالقىلاپ, جول كارتاسىنا قول قويادى", دەدى مەملەكەت باسشىسى. ونىڭ ايتۋىنشا, قازاقستان تاراپىنان دا, قىرعىزستان تاراپىنان دا شەكاراعا باقىلاۋ قويۋ تۋرالى شەشىم قابىلداندى. سونىمەن قاتار ەۋرازيالىق ەكونوميكالىق وداق جۇكتەردى تەكسەرىپ, شەكارادان وتكىزەتىن بولادى.
نۇرسۇلتان نازارباەۆ سوورونباي جەەەنبەكوۆپەن كەزدەسۋ بارىسىندا ەكى ەلدىڭ اراسىنداعى تۋىستىق-باۋىرلاستىق قاتىناستىڭ بارلىعىن قايتا ورنىنا كەلتىرۋگە كەلىسكەنىن اتاپ ءوتتى. "بۇل - ەكى حالىقتىڭ مۇددەسى. مەن سوورونباي ءشارىپ ۇلىن قازاقستانعا رەسمي ساپارمەن شاقىرامىن. سول كەزدە بارلىق شارۋانى ارتقا تاستاپ, قازاق پەن قىرعىز اراسىنداعى جاعدايدى تۇزەتەتىن بولامىز", دەدى ەلباسى.
كەزدەسۋ بارىسىندا پرەزيدەنتتەر ءباسپاسوز وكىلدەرىنە بريفينگ وتكىزدى. «بارلىق پروبلەمالار بويىنشا سويلەسىپ, شەشىمگە كەلدىك. ەكى ەلدىڭ ۇكىمەتتەرى جول كارتاسىن جاسايدى. سودان كەيىن كوپ ماسەلە شەشىلەدى. شەشىلمەيتىن پروبلەما بولمايدى. كوپ ماسەلە بار, ولاردى ەكى تاراپ بىرىگىپ شەشەمىز دەپ ويلايمىن. جەلتوقسان ايىندا جول كارتاسى بويىنشا جۇمىستار اياقتالۋى كەرەك», - دەدى سوورونباي جەەنبەكوۆ. سونىمەن قاتار قىرعىزستان پرەزيدەنتى نۇرسۇلتان نازارباەۆقا العىسىن ءبىلدىردىپ, ەلباسىنا زور دەنساۋلىق, قازاقستان حالقىنا اماندىق تىلەدى.
ەستەرىڭىزگە سالا كەتسەك, كەشە ەلباسى نۇرسۇلتان نازارباەۆ رەسمي ساپارمەن بەلارۋس رەسپۋبليكاسىنىڭ استاناسى مينسك قالاسىنا باردى. جۇمىس ساپارى اياسىندا ول بەلارۋس پرەزيدەنتى الەكساندر لۋكاشەنكومەن كەزدەستى. ودان كەيىن نۇرسۇلتان نازارباەۆ بەلارۋس پرەزيدەنتىمەن كەڭەيتىلگەن قۇرامدا كەلىسسوز جۇرگىزدى. كەلىسسوزدەردەن كەيىن نۇرسۇلتان نازارباەۆ الەكساندر لۋكاشەنكومەن بۇقارالىق اقپارات قۇرالدارى وكىلدەرىنە بريفينگ وتكىزدى. سونىمەن قاتار ەلباسىنىڭ بەلارۋس مەملەكەتىنە رەسمي ساپارى اياسىندا مينسك قالاسىندا قازاقستان-بەلارۋس بيزنەس-فورۋمى ءوتىپ, ارنايى كورمە ۇيىمداستىرىلدى. ال بۇگىن نۇرسۇلتان نازارباەۆ ۇجىمدىق قاۋىپسىزدىك تۋرالى شارت ۇيىمى ۇجىمدىق قاۋىپسىزدىك كەڭەسىنىڭ مەرەيتويلىق سەسسياسىنا قاتىسادى دەپ كۇتىلۋدە.
گۇلنۇر قۋانىشبەكقىزى,
"ەگەمەن قازاقستان"
مينسك (بەلارۋس)
