2014 جىلى «استانانى» ەكى ويىننىڭ ناتيجەسىندە 7:0 قىلعان «ۆيلياررەال» «استانا ارەناعا» تاعى كەلدى. بۇل جولى يسپانيالىقتار نەگىزگى قۇرامدا ونەر كورسەتەتىن بىرنەشە فۋتبولشىلارىن الاڭعا شىعارمادى. سەبەبى, «سۇڭگۋىر قايىقتىلار» ەۋروپا ليگاسىنىڭ پلەي-وفف كەزەڭىنە شىعاتىندارىن ءبىلىپ كەلدى. ءتىپتى, وسى ويىندا تەڭ ناتيجە تىركەلسە, يسپانيالىقتارعا سونىڭ ءوزى دە ماقساتتى ورىنداعانمەن تەڭ ەدى.
نەگىزگى شابۋىلشى سەدريك باكامبيۋ قوسالقى قۇرامدا قالدى. فرانتسيالىق شابۋىلشى بيىلعى ماۋسىمنىڭ وزىندە 8 گول سوعىپ قويعان. قورعاۋشى جاۋمە كوستا, جارتىلاي قورعاۋشى سەمۋ كاستيلەحو دا نەگىزگى قۇرامنان ورىن الا المادى. مۇنىڭ بارلىعى باس باپكەر كالەحانىڭ جاساعان وزگەرىستەرى. ءۇش شەپتەگى ءۇش مىقتىسىن ساقتاپ قالدى. سەبەبى, 26 قاراشا كۇنى «ۆيليا» «سەۆيليامەن» كەزدەسەدى. وسى ويىن ولارعا ماڭىزدىراق بولدى.
ماتچ باستالىسىمەن يۆان ماەۆسكي ارىپتەستەرىنىڭ قاتەلىكتەرىن جۋىپ-شايامىن دەپ ءجيى ويىن ءتارتىبىن بۇزا بەردى. ماتچتىڭ ءبىرىنشى تايمى جالپى ايتقاندا فيزيكالىق تۇرعىدا ويىنشىلاردىڭ شامالاس ەكەندىكتەرىن كورسەتتى. بايقاۋسىزدا كەلىپ قالعان دوپتى شيىرە تەپكەن كابانانگا ەسەپ اشتى. بۇل گول ونسىزدا شابىتتانىپ جۇرگەن شابۋىلشىنى ودان ءارى ارقالاندىردى. ول وسى ماتچتا قاپتال ارقىلى وينادى. چەمپيوندار ليگاسىندا ول يسپانيالىق «اتلەتيكو», تۇركيالىق «گالاتاسارايعا» قارسى ويىنداردا ءدال وسىلاي قاپتالداعى ۆينگەردىڭ ءرولىن ورىندادى. ستانيمير ستويلوۆتىڭ دجۋنيوردى وسىنداي مىقتى قارسىلاستارعا قارسى ويىندا دا قاپتالعا تاستايتىنى بار. سەبەبى, ورتالىق شابۋىلشى شىعاراتىنداي كەڭىنەن كوسىلە المايتىنىن بىلەدى. بولگار باپكەرىنە مەيلىنشە ءبىر ادامنىڭ ارتىقتىعىن جاساۋ قاجەت بولدى. ويتكەنى, باككا مەن سانسونەنىڭ قيمىلدارىنا قارسى تۇراتىن ءبىر-ءبىر قورعاۋشىدان قاجەت. قورعانىسقا قاراي ءبىر ادام قاجەت بولعاندىقتان كابانانگا شەتكە ىسىرىلدى. ءبىرىنشى تايم اياقتالعانشا جەڭىستى ەسەپتى جىگىتتەر ۇستاپ تۇرا المادى. بۇرىشتاما كوتەرگەن ءتۆۋماسيدىڭ دوبى «ۆيلياررەال» قاقپاشىسىنىڭ قولىنان تابىلدى. ول بىردەن باككاعا لاقتىردى. كولۋمبيالىق سۇرمەرگەن ادەمى پاسپەن رابانى ەريچپەن بەتپە بەت شىعاردى. ەسەپ 1:1. بۇل گولدىڭ سوعىلۋىنا نەبارى ءۇش قانا اياقتىڭ جاناسۋى جەتكىلىكتى بولدى.
ەكىنشى تايمنىڭ 60-مينۋتىندا الاڭعا سەدريك باكامبيۋ شىقتى. وتكەن جولعى ءبىر اپتا بۇرىنعا ماتچتا «استانا» ەسەپتى تەڭەستىرگەن كەزدە دە باپكەر امالسىز سەدريكتى شىعارۋعا ءماجبۇر بولعان. بۇل جولى دا سولاي. فرانتسۋز كانىگى تىسقاققان شابۋىلشى ەكەندىگىن دالەلدەپ, 5 مينۋتتان كەيىن يسپانيالىقتاردى العا شىعاردى. ال 83-مينۋتتا ول دۋبل جاساپ, ماتچتىڭ تاعدىرىن شەشكەندەي بولدى. وسى كەزدە «شانشارداعى» الگى شولپاننىڭ ءسوزى ەسكە تۇسەدى - «ول پروفەسيونال عوي, اقشاسىن الادى دا كەتەدى».
قورعانىستاعى قاتەلىكتى جاقسى پايدالانعان تۆۋماسي بيىلعى ەۋروپا ليگاسىنداعى 4-گولىن سوعىپ, ءبىر جەلپىندى. قورىتىندى ەسەپ 2:3, «ۆيلياررەالدىڭ» جەڭىسى.
«استانا» (استانا, قازاقستان) — «ۆيلياررەال» (ۆيلياررەال, يسپانيا) 2:3 (1:1)
گولدار: كابانانگا 22 (1:0), رابا 40 (1:1), باكامبيۋ 65 (1:2), باكامبيۋ 83 (1:3), تۆۋماسي 88 (2:3)
ارينە دەڭگەيدىڭ اتى دەڭگەي. دەگەنمەن, ءبىرشاما ۋاقىت تەرەزەسى تەڭ ويناعان «استاناعا» راحمەت, سونداي مۇمكىندىكتى بەرگەن «ۆيلياررەالعا» دا راحمەت. ال ءبىر وكىنىشتىسى ەلوردالىق «استانا» ءوز ۇيىندەگى ويىندارداعى جەڭىلىسسىز سەرياسىن ءۇزىپ الدى. «ۆيلياررەالدان» كەيىن باستالىپ ەدى, وزدەرى كەلىپ اياقتاپ بەردى. قىزىقتى ويىننىڭ اسەرى وسى. ەندى ەلوردالىق ۇجىم «سلاۆيا» پراگا كومانداسىنىڭ اياق الىسىنا قارايدى.
ەرمۇحامەد ماۋلەن,
«ەگەمەن قازاقستان».
