جيىندا ۇيىم جەتەكشىلىگىندە ورىن العان وزگەرىستەر بەلگىلى بولدى. قازاقستان كاسىپوداقتارى فەدەراتسياسىنىڭ توراعاسى بولىپ باقىتجان ءابدىرايىموۆ سايلاندى. باقىتجان جارىلقاسىن ۇلى – قازاقستان رەسپۋبليكاسى پارلامەنتى ءماجىلىسىنىڭ دەپۋتاتى, زاڭ جانە سوت-قۇقىق رەفورمالارى جونىندەگى كوميتەتىنىڭ مۇشەسى. سونداي-اق حالىقارالىق تۇركى الەمى زاڭگەرلەرى قاۋىمداستىعىنىڭ پرەزيدەنتى جانە حالىقارالىق زاڭگەرلەر وداعى ۇيلەستىرۋ كەڭەسىنىڭ مۇشەسى.
وتىرىستا فەدەراتسيانىڭ بۇرىنعى باسشىسى ابىلعازى قۇسايىنوۆ سوڭعى جىلدارى ءتۇرلى سالاداعى ەكى ميلليوننان استام قىزمەتكەرلەردىڭ باسىن قوسقان بىرلەستىكتىڭ ەڭبەك ۇجىمدارىنداعى تۇراقتىلىقتى ساقتاۋدا, جۇمىسشىلاردى الەۋمەتتىك كەپىلدىك پەن ەڭبەكاقى تولەمىمەن قامتاماسىز ەتۋدە جوعارى ناتيجەلەرگە قول جەتكىزگەنىن جانە 2015 جىلى قازاقستان كاسىپوداقتارى فەدەراتسياسى حالىقارالىق كاسىپوداقتار فەدەراتسياسىنىڭ تولىق مۇشەسى اتانعانىن ايتتى.
– اتالعان بىرلەستىك 162 ەلدىڭ 176 ميلليون قىزمەتكەرىنىڭ باسىن بىرىكتىرىپ وتىرعان الەمدىك ءىرى ۇيىمداردىڭ ءبىرى. بۇل ەلىمىزدە «مەملەكەت – جۇمىس بەرۋشى – جۇمىسشى» تىزبەگى بويىنشا ەڭبەك ماسەلەلەرىنە ارنالعان ءتيىمدى سۇحبات الاڭىنىڭ قالىپتاسقانىن كورسەتەدى, دەدى ول. ءسوزىنىڭ سوڭىندا ءا.قۇسايىنوۆ قولداۋ كورسەتىپ, سەنىم تانىتقان مەملەكەت باسشىسىنا جانە بىرگە قىزمەت ەتكەن ۇجىمداعى ارىپتەستەرىنە ريزاشىلىعىن جەتكىزدى. ءوز كەزەگىندە فەدەراتسيا قۇرامىنا ەنەتىن سالالىق جانە اۋماقتىق بىرلەستىكتەردىڭ وكىلدەرىنەن قۇرالعان وتىرىسقا قاتىسۋشىلار دا ءا.قۇسايىنوۆقا جەمىستى جۇمىسى ءۇشىن العىس ايتتى.
دۋمان اناش,
«ەگەمەن قازاقستان»
