فرانتسيالىق ورتالىق قاۋىپتى قالدىقتىڭ رەسەي نەمەسە قازاقستان تاراپىنان كەلگەنىن بولجاعان-دى. «روسگيدرومەت» رادياتسيالىق لاستانۋدىڭ ورال تاۋىنان, ياعني رەسەي تەرريتورياسىنان تارالعانىن مالىمدەدى.
The Guardian باسىلىمى راديواكتيۆتى يزوتوپتىڭ جوعارعى دەڭگەيى 25 قىركۇيەك پەن 1 قازان ارالىعىندا چەليابىدەگى ارگاياش اۋىلىنىڭ ماڭىندا تىركەلگەنىن حابارلادى. گازەتتىڭ دەرەكتەرىنە سۇيەنسەك, اۋاعا تاراعان رۋتەني-106 يزوتوبى قالىپتى جاعدايدان 986 ەسە ارتىپ كەتكەن.
«مالىمدەمەدە لاستانۋدىڭ تارالۋ ايماعى ناقتى كورسەتىلمەگەن. الايدا ارگاياش ستانساسى «ماياك» يادرولىق سىناق ايماعىنان 30 شاقىرىم قاشىقتا ورنالاسقان. اتالعان اۋماقتا تاريحتاعى ەڭ زۇلمات يادرولىق اپاتتاردىڭ ءبىرى بولعان-دى. قازىرگى تاڭدا «ماياك» يادرولىق وتىندى قايتا جاڭعىرتۋعا ارنالعان», دەيدى The Guardian باسىلىمى.
رەسەي «گرينپيس» وكىلدەرى وقيعانىڭ ءمان-جايىن انىقتاۋ ءۇشىن «روساتومعا» ءوتىنىش بىلدىرگەن. وسىعان وراي جۇرگىزىلگەن زەرتتەۋدىڭ ناتيجەسىندە راديواكتيۆتى يزوتوپ ەلدىڭ وڭتۇستىگىنەن تارالىپ, باتىس ەۋروپاعا دەيىن جەتكەنى ايتىلادى.
اباي اسانكەلدى ۇلى,
«ەگەمەن قازاقستان»
