– استاناعا قالاي جەتتىڭىزدەر؟ ۇزاق جول كەرى اسەرىن تيگىزبەدى مە؟
– ءبارى جاقسى. قازىر تىنىعىپ, دەمالىپ الدىق. ىشكى بىرىنشىلىكتە «اتلەتيككە» (بيلباو) قارسى ويىننان كەيىن «استانا» تۋرالى كوپ ويلاندىق. ەرتەڭگى ويىندا ءۇش ۇپاي جيناعىمىز كەلەدى.
– لا ليگادا «سەۆيلياعا» قارسى ماڭىزدى ويىن كۇتىپ تۇر. وتكەن تۋردا «اتلەتيككە» قارسى وينادىڭىزدار...
– ءبىز ءۇشىن ءار ماتچ ماڭىزدى ەكەنىن بىلەمىز. قيىندىقتارعا توتەپ بەرۋگە دايىنبىز. «سەۆيليا» مىقتى كوماندا. «استانانىڭ» دا وسال ەمەستىگىن ۇمىتپاعانىمىز ءجون. سونداي-اق, ەۋروپا ليگاسىندا ماڭىزدى ەمەس ماتچتار بولمايدى.
– «استانادان» قانداي ويىن كۇتەسىز؟
– «استانا» دا ءبىز سياقتى جەڭىسكە جەتۋ ءۇشىن بارىن سالارى انىق. وزدەرىنىڭ ۇزدىك ويىندارىن كورسەتەتىنىنە سەنىمدىمىن. الاڭنىڭ بارلىق تۇسىنا يەلىك ەتۋگە تىرىسادى. ءۇش ۇپاي جيناۋ ءۇشىن ايانىپ قالماس. بىراق ءبىز دە ءوز ويىنىمىزدى كورسەتىپ, قاجەت ناتيجەگە قول جەتكىزۋىمىز كەرەك.
– ءۇش جىل بۇرىن «استاناعا» قارسى ويناعان ەدىڭىز. الاڭ جاساندى بولسا دا ساپاسى جاقسى. بۇل تۋرالى نە ويلايسىز؟
– ونىڭ ەشقانداي ماڭىزى جوق. ءبىز قاي جەردە ويناساق تا ماڭىزدى ەمەس. تەك ءوز ويىنىمىزدى كورسەتۋىمىز كەرەك. ەرتەڭ ءبارىن الاڭدا كورەمىز.
– ۇلتتىق قۇراماداعى ويىننان كەيىن ءوز كۇشىڭىزدى قالاي ساقتادىڭىز؟
– ماعان ەرتەڭگى ويىن ماڭىزدى. باپكەرىم ماعان سەنىم ارتىپ وتىر. ەڭ باستىسى سول.
– «استانا» ەۋروكۋبوكتىق ويىنداردا ءوز الاڭىندا سوڭعى رەت «ۆيلياررەالدان» ۇتىلعان بولاتىن. ودان بەرى 17 ويىن ءوتتى, ەشكىمگە ەسە بەرمەي كەلەدى. بۇل تۋرالى قانداي ويداسىز؟
– «استانا» جىل سايىن دامىپ كەلەدى. جىل سايىن ەۋروپادا ونەر كورسەتىپ, تاجىريبە جينادى. تالانتتى ويىنشىلارى دا از ەمەس. «استانامەن» قازىر كىم بولسا دا ساناسادى.
– جاساندى الاڭ تۋرالى نە ويلايسىز؟ بۇل سىزدەردى الاڭداتا ما؟
– الاڭعا تەزىرەك بەيىمدەلۋىمىز كەرەك. ءوز ويىنىمىزدى كورسەتىپ, جەڭۋىمىز كەرەك.
– العاشقى ويىننان كەيىن «استانادان» قاي ويىنشىنى ەرەكشە اتاپ وتەر ەدىڭىز؟
– ماعان پاتريك ءتۆۋماسيدىڭ ويىنى ۇنادى. ونىڭ جىلدامدىعى, تەز ويلاپ, تەز شەشىم قابىلدايتىنى تاڭ قالدىردى. ەرتەڭ دە ءوزىن جاقسى قىرىنان كورسەتەدى دەپ ويلايمىن.
ايتا كەتەيىك, «استانا» مەن «ۆيلياررەال» اراسىنداعى كەزدەسۋ ەرتەڭ, ياعني 23 قازان كۇنى «استانا-ارەنا» ستاديونىندا 22:00-دە باستالادى.
ايان ءابدۋالي,
«ەگەمەن قازاقستان»
