سالاماتتى ءومىر سالتىن ۇستاناتىن قالا جۇرتشىلىعى مەن قوناقتارى وندا قالاعان ۋاقىتىندا تەگىن سىرعاناق تەۋىپ سەرگي الادى.
شاعىن مۇز الاڭقايى جەلتوقسان ايىنىڭ العاشقى كۇنىنەن باستاپ ىسكە قوسىلادى. سىرعاناۋ الاڭدارىنىڭ بارلىعى زاماناۋي ستاندارتتارعا ساي جاڭا تەحنولوگيالاردىڭ كومەگىمەن جاسالىپ جاتىر. قالا جۇرتشىلىعىنا قۋانىش سىيلاعان الەۋمەتتىك جوبانى جۇزەگە اسىرۋعا قالا اكىمدىگى مۇرىندىق بولعان. ماماندار جاڭا سىرعاناۋ الاڭقايلارى الماتىنىڭ مىڭ قۇبىلعان اۋا-رايىنا ورايلاستىرىلىپ جاسالعانىن ايتادى.
– بۇل مۇز الاڭدارى كۇن رايى قالاي بولعانىنا قاراماستان, ءتىپتى 10 گرادۋس جىلى بولسا دا ەرىمەي قاتىپ تۇرا بەرەدى. ياعني, الاڭداردىڭ ارناۋلى توڭازىتقىش قۇرالى مۇزدى ەرىتپەۋگە قولايلى تەمپەراتۋرانى قامتاماسىز ەتە الادى. اۋا رايىنا قاراي تەمپەراتۋرالىق رەجيم جۇيەسىن ورناتامىز. دەمالۋشىلارعا كەز-كەلگەن ۋاقىتتا كەلۋگە ىڭعايلى بولۋ ءۇشىن بارلىق جاعداي جاسالادى – دەيدى قۇرىلىس كومپانياسىنىڭ باسشىسى مۇحاممەدجان وسەر.
قالانىڭ بىرنەشە اۋماعىندا اشىق مۇز الاڭدارىن قۇرۋ جۇمىستارى قارقىندى ءجۇرىپ جاتىر. جوعارىدا ايتقانىمىزداي تاۋلىك بويى جۇمىس ىستەيتىن سىرعاناۋ الاڭدارى بارلىق كەلۋشىلەر ءۇشىن اقىسىز. تەك, دەمالۋشىلار وزىمەن بىرگە كونكيلەرىن الا كەلۋى ءتيىس. سونداي-اق سىرعاناۋ الاڭدارىنىڭ ماڭىندا تاماقتانۋعا ارنالعان ارناۋلى ورىندار مەن كونكيلەردى جالعا بەرۋ ورتالىقتارى جۇمىس ىستەيتىن بولادى. ۇيىمداستىرۋشىلار ولاردىڭ باعالارى بۇقارا حالىققا قول جەتىمدى بولۋى ءاردايىم قاداعالانىپ وتىراتىنىن ايتادى.
سپورت باسقارماسىنىڭ ماماندارى بەرگەن مالىمەتكە سۇيەنسەك اۋماعى 850 شارشى مەتردى قۇرايتىن سۋ جاڭا سىرعاناۋ الاڭى قالاداعى تۇڭعىش پرەزيدەنت ساياباعىندا, سونىمەن قاتار شاھارداعى جىبەك جولى-ابىلاي حان, جاندوسوۆ-شايمەردەنوۆا, ءال فارابي-رەميزوۆكا كوشەلەرىنىڭ قيىلىسىندا جانە جەتىسۋ اۋدانى اكىمدىگىنىڭ ماڭىندا سونداي-اق, «مارت» ساۋدا ورتالىعىنىڭ جانىندا سالىنىپ جاتىر. «سپورتتىق الماتى» باعدارلاماسىنىڭ اياسىندا قولعا الىنىپ وتىرعان يگى باستاما سپورت سۇيەر الماتىلىقتار ءۇشىن بيىلعى قىستىڭ باستى جاڭالىقتارىنىڭ ءبىرى بولماق.
ارمان وكتيابر,
«ەگەمەن قازاقستان»
الماتى
