بىردەن جولىعۋدىڭ ءساتى تۇسپەدى. بىراق وزىمەن جۇزدەسكەنشە جولاي كەزدەسكەن ادامدار ارقىلى اتىمتاي جومارت جىگىت اعاسىنىڭ اۋىل يگىلىگى جولىندا اتقارعان جۇمىستارىنا قانىعىپ, ء بىرشاما تاني, بىلە تۇسكەندەي بولعانبىز.
«ول كىسى وسىنداعى 1996 جىلى قۇرىلعان «يۋبيلەينىي» جشس-ءىن بىرنەشە جىلدان بەرى باسقارىپ كەلەدى. مەكتەپتى وسى اۋىلدان بىتىرگەن. سودان بەرى وسى جەردە. تۋعان اۋىلىنان كىندىگىن ۇزگەن ەمەس. 2008 جىلى اۋىلعا مەشىت سالىپ بەردى, كەلەسى جىلى قاتىمحانا اشتى. 2010 جىلى ءوز قارجىسىنا سپورت ءمودۋلىن تۇرعىزىپ, اۋىلداستارىنا سىيعا تارتتى. اۋىلدا كوپ جىلدان بەرى قاراۋسىز قالىپ, قاڭىراپ تۇرعان مادەنيەت ءۇيىن 24 ميلليون تەڭگەگە كۇردەلى جوندەۋدەن وتكىزىپ, 2014 جىلى قايتارىمسىز تۇردە مەملەكەتتىڭ قاراماعىنا بەردى. وسىنىڭ ارقاسىندا ەلدى مەكەندەگى 10-عا جۋىق ادام جۇمىسپەن قامتىلدى. كاسىپكەر اۋىلداعى ءولىم-ءجىتىم, توي-تومالاق كەزىندە دە كومەكتەسىپ تۇرادى. باسقا جاقتان كوشىپ كەلگەن, جاعدايى تومەن جۇمىسشىلارعا, جاس ماماندارعا ءۇي ساتىپ الىپ بەرەدى. كەلەسى جىلى جۇمىسشىلارىنا ارناپ 2 پاتەرلى ءۇي سالۋدى جوسپارلاپ وتىر. قازىر ءسۇت فەرماسىن سالىپ جاتىر. جاقىندا اشىلسا, تالاي كىسىگە جۇمىس تابىلادى», دەگەن ءبىزدى ەلدى مەكەن سىرتىندا قارسى العان كولدەنەڭ اۋىلدىق وكرۋگىنىڭ اكىمى سايلاۋحان يستەمەسوۆ.
ەكەۋارا اڭگىمەدەن اڭعارعانىمىز, بۇگىندە اۋىلداستارىنىڭ ارقاسۇيەرىنە اينالعان مامىربەك قاراشەۆ بارلىق باسپالداقتان ءوتىپ, ءومىردىڭ ىستىق-سۋىعىن از تاتپاعان سەكىلدى. سەگىز جىل كومبايننىڭ قۇلاعىن ۇستاپتى, 10 جىل مال باعىپتى, ۇزىن ىرعاسى 31 جىل قاراپايىم جۇمىسشى بولىپ تەر توگىپتى. 1994 جىلى كومباين جۇرگىزۋدەن قازاقستاننىڭ چەمپيونى اتانىپتى. سودان دا بولار اۋىلداستارىنىڭ ەشقايسىسى قۋلىعىن اسىرا المايدى ەكەن. بۇل كىسى سىرتىنان ءبىر قاراپ كەتىپ بارا جاتقان مالدىڭ ىشىندە قايسىسى اۋىرىپ تۇرعانىن, قايسىسى اقساق, قايسىسى توقساق ەكەنىن, ءجۇرىپ بارا جاتقان كولىكتىڭ قانداي اقاۋى بارىنا دەيىن ءبىلىپ قوياتىن كورىنەدى. بىردە مىناداي قىزىق بولىپتى. ارباعا ءشۇمشيتىپ ءشوپ تيەپ العان اۋىلدىڭ ءبىر جىگىتى ويىندا ەشتەڭە جوق, اعامىزدىڭ الدىنان شىقپاي ما؟ اربانى توقتاتقان كەيىپكەرىمىز «باياعىدا جاس شاعىمىزدا وسىلاي ءشوپ تيەپ, استىنا جەم سالىپ الۋشى ەدىك» دەپ ازىلدەپ, سول جەردە اۋىلداسىنىڭ «قىلمىسىن» اشكەرەلەپ تاستاپتى.
ىزدەگەن ادامىمىزدى جۇمىس باسىنان كەزىكتىردىك. قاراپايىم ەكەن, ىسكە مىعىم بولعانىمەن, سوزگە ساراڭ سەكىلدى كورىندى. «اۋىلىڭىزعا وسىنداي ءىس جاساپسىز, ءايتىپسىز, ءبۇيتىپسىز» دەپ باستاپ كەلە جاتىر ەك: «مۇنىڭ ءبارى حالىققا, ەلگە قاجەت دۇنيە عوي. اۋىلعا كومەكتەسپەگەندە قايدا كومەكتەسەمىز؟ بۇگىنگى جەتكەنىمىز, اسىپ-تاسىپ جۇرگەنىمىز – وسى اۋىلدىڭ ارقاسى. وسىندا العان ءبىلىمنىڭ ارقاسى. پەرزەنتتىك پارىز دەگەن بولادى. سونى ەشقايسىمىز ۇمىتپاۋعا ءتيىسپىز. وسى اۋىلدا تۋىپ-وستىك. ەر جەتتىك. بوق دۇنيەنى وزىمىزبەن بىرگە ارقالاپ كەتپەيمىز عوي. جاساپ جاتقان ىستەرىمىز ەرتەڭگى ۇرپاققا ۇلگى-ونەگە بولسا, كەيىنگى بۋىن وسىنى جالعاستىرسا دەيمىز», دەپ قىسقا قايىردى.
تەمەكى تارتار مەزەتتەگى اڭگىمە بارىسىنان تۇيگەنىمىز, كاسىپكەر باسقاراتىن «يۋبيلەينىي» جشس مال جانە ەگىن شارۋاشىلىعىمەن شۇعىلدانادى. وزدەرىنىڭ ناۋبايحاناسى دا بار. حالىق ناندى وسى جەردەن سەنەسىز بە, سەنبەيسىز بە, 50 تەڭگەگە ساتىپ الادى. كولدەنەڭ اۋىلىنىڭ 114 تۇرعىنى ەڭبەك ەتەتىن مەكەمەگە اگرونوم, زووتەحنيك, ينجەنەر, مال دارىگەرى سەكىلدى ماماندار قاجەت ەكەن. م.قاراشەۆ جاقىندا اۋىلداعى مەكتەپكە بارىپ, وسى ماماندىقتاردى يگەرگىسى كەلەتىن وقۋشىلاردى ۋنيۆەرسيتەتتە تەگىن وقىتىپ, كەيىن جۇمىسقا الىپ, باسپانامەن قامتۋعا ءازىر ەكەنىن ايتىپتى.
اۋىلعا ادەيىلەپ كەلىپ تۇرعاننان كەيىن كاسىپكەر سالدىرعان سپورت ءمودۋلىن دە تاماشالادىق. ءىشى قىز-قىز قايناپ تۇر. ءبىر بۇرىشتا بالعىن بوكسشىلار, ءبىر شەتتە جاس بالۋاندار, ورتادا ۆولەيبول ويناعان بويجەتكەندەر. كەيىپكەرىمىز ارنايى شاقىرىپ, باسپانا الىپ بەرگەن قاناتجان دۇيسەنباەۆ بەس جىلدان بەرى وسىندا بوكستان باپكەرلىك قىزمەت اتقارىپ جاتىر ەكەن. شاكىرتتەرىنىڭ الدى اۋدان, وبلىستى قويىپ, رەسپۋبليكانى باعىندىرىپ ۇلگەرىپتى. قازىر وسكەمەندەگى دارىندى بالالارعا ارنالعان مەكتەپ-ينتەرناتىندا وقيتىن شاكىرتى ەرنۇر سىماشەۆ جاقىندا كوكشەتاۋدا وتكەن رەسپۋبليكالىق تۋرنيردە توپ جارىپتى. «التى بالامىز قازىر سپورت مەكتەبىندە وقىپ جاتىر. تورتەۋى – وسكەمەندە, ەكەۋى تالدىقورعاندا. بۇل جەردەن ءالى تالاي چەمپيوندار شىعادى دەپ ويلايمىن», دەيدى باپكەر.
كولدەنەڭدە بوكستان بولەك شاڭعى, ۆولەيبول, قازاقشا كۇرەس پەن جەڭىل اتلەتيكا دا جاقسى دامىعان. اۋىلدىڭ ۆولەيبولشى قىزدارى اۋداندا قارسىلاس شاق كەلتىرمەي, وبلىستا جۇلدەگەر اتانىپ ءجۇر. وسى مودۋلدە جاتتىققان ءمولدىر بيسەنوۆا ۆولەيبولدان جاسوسپىرىمدەر اراسىندا وتكەن ەل چەمپيوناتىندا ءۇشىنشى ورىندى يەلەنىپتى. قارى قالىڭ بولسا دا, قىسى جايلى اۋىلدىڭ تاعى ءبىر تۇلەگى جانىبەك سادىقوۆ قازىر پولتورانين سەكىلدى ايگىلى شاڭعىشىلاردىڭ قالاسى ريددەردە شەبەرلىگىن شىڭداپ جاتقان كورىنەدى.
مودۋلدەن شىعا بەرىستەگى اۋلادا ەلدى مەكەننىڭ 76 جاستاعى تۇرعىنى قاينىش مالشىباەۆامەن از سويلەسىپ, اۋىل تۋرالى سۇرادىق. «بۇل جەردىڭ ءبارى بۇرىن قالىڭ توعاي بولاتىن. كەلىپ وتىن الاتىنبىز. قازىر مىنە, قانداي عاجاپ! جايناپ تۇر. اۋىلىمىز جاقسى دامىپ جاتىر, تاۋبە. ازاماتتار امان بولسىن», دەدى كوپتى كورگەن قاريا.
ازامات قاسىم,
«ەگەمەن قازاقستان»
شىعىس قازاقستان وبلىسى,
ءۇرجار اۋدانى
