«ەگەمەن قازاقستان» گازەتىنىڭ الماتىداعى ءبولىمىن ەشكىمنىڭ نۇسقاۋىنسىز وزدەرى ىزدەپ كەلگەن ءبىر توپ مەكتەپ وقۋشىلارىن كورگەندە قازاق ءباسپاسوزىنىڭ جارقىن بولاشاعىن كورگەندەي كوڭىلىمىز كوكجيەككە كوتەرىلدى. ءجون سۇراي كەلە, جاقىندا عانا الپىس جىلدىعى تويلانعان الماتىداعى اباي اتىنداعى قازاق ءتىلى مەن ادەبيەتىن تەرەڭدەتىپ وقىتاتىن №2 مەكتەپ ينتەرناتىنىڭ شاكىرتتەرى ەكەنىن بىلدىك. ارالارىندا باعلان ەسىمدى تاربيەشىلەرى بار. بولاشاقتا قازاق جۋرناليستيكاسىنىڭ قازانىندا قايناساق دەگەن ارماننىڭ جەتەگىنە ەرگەن جەتكىنشەكتەر عاسىرلىق تاريحى بار اعا باسىلىمنىڭ ايتۋلى تىلشىلەرىمەن كەزدەسىپ اڭگىمە-دۇكەن قۇرساق دەگەن نيەتپەن كەلىپتى. باسىلىمنىڭ الماتىداعى ءبولىمىنىڭ مەڭگەرۋشىسى نۇرعالي وراز بەن گازەتتىڭ شولۋشىسى بەلگىلى قالامگەر جۇماباي شاشتاي ۇلى ارنايى ىزدەپ كەلگەن شاكىرتتەردىڭ كوڭىلىن جىقپاي قازاق ءباسپاسوزىنىڭ ارعى بەرگى تاريحىنان سىر شەرتىپ اسەرلى اڭگىمە ءوربىتتى.
كەزدەسۋ بارىسىندا وقۋشىلار اعالارىنا ويلارىنداعى سۇراقتارىن قويىپ, ءوز ارماندارىمەن ءبولىستى. ءسوز اراسىندا ەل گازەتىن باسقارعان ۋاقىتىندا باسىلىمعا جاڭاشا سۇرلەۋ سالعان حالىق جازۋشىسى شەرحان مۇرتازانىڭ ءومىرى مەن شىعارماشىلىعى, قازاق رۋحانياتىنا سىڭىرگەن قاجىرلى ەڭبەگى جايلى ورامدى ويلار ايتىلدى.
– مۇندا كەلگەن نەگىزگى ماقساتىمىز گازەت ومىرىمەن جاقىنىراق تانىسۋ. بولاشاقتا جۋرناليست بولۋدى ارماندايتىن ءبىر توپ وقۋشىلار وسىندا كەلىپ «ەگەمەن قازاقستان» ۇجىمىمەن تانىسىپ شىعارماشىلىق بايلانىس جاساساق دەگەن نيەت بىلدىرگەن ەدى. اعالارىمىزدىڭ تاعىلىمدى اڭگىمەسى جاستارعا ۇلكەن شابىت پەن جىگەر سىيلادى. الداعى ۋاقىتتا گازەت ارداگەرلەرىمەن مەكتەبىمىزدە ۇلكەن رۋحاني كەزدەسۋ وتكىزسەك دەگەن جوسپارىمىز بار. باسىلىمدى باسقارىپ وتىرعان دارحان قىدىرالى, ايبىن شاعالاقوۆ سياقتى اعالارىمىز, سونداي-اق بەلگىلى جۋرناليست ايناش ەسالي اپايىمىزدىڭ ءبىزدىڭ مەكتەپتەن تۇلەپ ۇشقان شاكىرتتەر ەكەنىن ارقاشان ماقتان تۇتامىز – دەيدى مەكتەپ مۇعالىمى باعلان سالقىموۆ.
ارمان وكتيابر,
«ەگەمەن قازاقستان»
الماتى
