ياعني, بىلتىرعى جىلمەن سالىستىرعاندا 20,9 پايىزعا ارتىپ وتىر. ال وبلىس ورتالىعى شىمكەنت قالاسىندا بيىل جالپى اۋماعى 302 مىڭ شارشى مەترلىك 5 مىڭنان استام پاتەر ەل يگىلىگىنە بەرىلەدى.
وقو وڭىرلىك كوممۋنيكاتسيالار قىزمەتى ۇيىمداستىرعان كوشپەلى بريفينگتە شىمكەنت قالالىق قۇرىلىس ءبولىمىنىڭ باسشىسى ابىلسەيىت راباەۆ «نۇرلى جەر» تۇرعىن ءۇي باعدارلاماسى اياسىندا وبلىستا قۇرىلىسى جوسپارلانعان 231 نىساننىڭ جىل سوڭىنا دەيىن 115-ءىن پايدالانۋعا تاپسىرۋ مەجەلەنگەنىن ءمالىم ەتتى. ال اعىمداعى جىلدىڭ باسىنان 1-قاراشاعا دەيىن 61 نىسان پايدالانۋعا تاپسىرىلعان. قالعان 54 نىسان جىل سوڭىنا دەيىن پايدالانۋعا بەرىلمەك. سونداي-اق, شىمكەنت قالاسىندا بيىل 201 تۇرعىن ءۇيدىڭ قۇرىلىسى جۇرگىزىلۋدە. «شىمكەنتتە جالپى قۇنى 22,5 ملرد. تەڭگەگە 46 تۇرعىن ءۇيدىڭ قۇرىلىسى جۇرگىزىلۋدە. ونىڭ ىشىندە اكىمشىلىك-ىسكەرلىك ورتالىعىندا - 32, ارەندالىق -16, ءدال سونداي نەسيەلىك 16 تۇرعىن ءۇي سالىنۋدا. بۇدان بولەك «شىمكەنت سيتي» شاعىن اۋدانىندا جالپى 14 تۇرعىن ءۇيدىڭ قۇرىلىسى جۇرگىزىلىپ كەلەدى», - دەدى ابىلسەيىت راباەۆ.
ال «تۇرعىن ءۇي قۇرىلىس جيناق بانكى» اق وبلىستىق فيليالى ديرەكتورىنىڭ ورىنباسارى اقىلبەك قوسپانوۆتىڭ ايتۋىنشا, اتالعان بانك جۇيەسى بويىنشا بيىل وڭىردە 982 پاتەر پايدالانۋعا بەرىلەدى. كەلەسى جىلى «نۇرلى جەر» باعدارلاماسى اياسىندا وبلىس ورتالىعى شىمكەنت قالاسىندا 2500-گە جۋىق پاتەر سالۋ جوسپارلانعان.
عالىمجان ەلشىباي,
«ەگەمەن قازاقستان»
