فورۋمعا قحر مەملەكەتتىك تۋريزم باسقارماسى توراعاسىنىڭ ورىنباسارى دۋ تسزيان, مادەنيەت جانە سپورت مينيسترلىگىنىڭ تۋريزم يندۋسترياسى كوميتەتىنىڭ ءتورايىمى م.مۋرزاماديەۆا, وڭتۇستىك قازاقستان وبلىسىنىڭ اكىمى ج.تۇيمەباەۆ, «Kazakh tourism» ۇلتتىق كومپانياسىنىڭ توراعاسى ر.كۇزەمباەۆ, «اتامەكەن» ۇكپ وكىلدەرى, حالىقارالىق جانە قازاقستاندىق تۋروپەراتورلار, ينۆەستيتسيالىق كومپانيالار, تۋريستىك قاۋىمداستىقتار مەن شەتەلدىك جانە قازاقستاندىق باق وكىلدەرى قاتىستى. اشىلۋ سالتاناتىندا وبلىس اكىمى جانسەيىت تۇيمەباەۆ وڭتۇستىك تۋريزمىنە قاتىستى جايتتاردى بايانداپ بەردى.
– وڭتۇستىك قازاقستان وبلىسى – ورتالىق ازيا, تاياۋ شىعىس پەن ەۋروپا ەلدەرىن بايلانىستىراتىن جولداردىڭ قيىلىسىندا ورنالاسقان, – دەدى وبلىس اكىمى. – سونىڭ ناتيجەسىندە شەكارالىق ساۋدا-ساتتىق پەن ەكسپورتتىق ءوندىرىس وركەندەپ, وبلىسىمىزدىڭ تۋريستىك تارتىمدىلىعى ارتىپ, تاماشالاۋعا كەلۋشى تۋريستەر سانى جىل سايىن ءوسىپ كەلەدى. ماسەلەن, وتكەن جىلمەن سالىستىرعاندا تۋريستىك نىساندار سانى وبلىستا 31 پايىزعا ءوسىپ, 195-كە جەتتى. ولاردا كورسەتىلگەن قىزمەتتەر كولەمى 43 پايىزعا كوبەيىپ, 1,7 ملرد تەڭگەگە ۇلعايدى. وسىنىڭ ناتيجەسىندە بيىل وڭتۇستىك قازاقستان وبلىسىنا 128 مىڭ تۋريست كەلسە, بۇل وتكەن جىلمەن سالىستىرعاندا 55 پايىزعا ارتقانىن كورسەتەدى.
وبلىس باسشىسى قىتاي حالىق رەسپۋبليكاسىمەن تۋريزم سالاسىندا بايلانىستى نىعايتۋعا مۇمكىندىكتەرى مول ەكەندىگىن جەتكىزدى.
– ەكى ەل اراسىندا ءتۋريزمدى دامىتۋعا بارلىق مۇمكىندىكتەر بار. ءبىزدىڭ وڭىردە ءتۋريزمنىڭ بارلىق سالاسى دامىعان. قىس مەزگىلىندە تاۋعا بارىپ شاڭعى تەبۋگە بولادى. كەلگەن مەيمانداردى قارسى الاتىن 50-دەن استام قوناق ءۇي قىزمەت كورسەتەدى. سونىمەن قاتار تاريحي تۋريزم دە وڭ جولعا قويىلعان. 6 عاسىر بۇرىن سوعىلعان تاريحي نىساندارىمىز بار.
سونىمەن قاتار وبلىس اكىمى وڭتۇستىككە كەلۋشى تۋريستەرگە قولايلى جاعداي جاساۋ ماقساتىندا 1, 2 جانە 3 كۇندىك تۋريستىك مارشرۋتتار ازىرلەنىپ, اتالعان مارشرۋتقا 84 تاريحي-مادەني نىسان مەن تابيعي ورىندار ەنگىزىلگەنىن ايتتى. ماسەلەن, « ۇلى جىبەك جولى ەسكەرتكىشتەرى» اتالىمى بويىنشا 8 ەسكەرتكىش, ياعني ساۋران, تۇركىستان, سيداق, قاراسپان, جۋانتوبە, كۇلتوبە, وتىرار, ءبورجار ەسكەرتكىشتەرى وڭتۇستىك وڭىرىندە ورنالاسقانىن جەتكىزدى.
فورۋم بارسىندا بەيجىڭ حالىقارالىق تۋريستىك قىزمەت كورسەتۋ ورتالىعىنىڭ باس مەنەدجەرى يان يان:
– ءبىز بۇل جەردە قىتاي تۋريستەرىنە مالىمەتتەر جيناقتاۋعا كەلدىك. ءبىزدى ءبىرىنشى كەزەكتە جىبەك جولى بويىندا ورنالاسقان نىساندار قىزىقتىرادى. سونىمەن قاتار قازاق ەلىنىڭ ەجەلدەن كەلە جاتقان تاريحى, مادەنيەتى وتە باي. مەنى سىزدەردىڭ ەلدەرىڭىزدىڭ قوناقجايلىلىعى تاڭداندىرىپ وتىر. ەكى ەل اراسىنداعى بەيبىت قارىم-قاتىناس ءتۋريزمدى دامىتۋعا زور مۇمكىندىك بەرەدى, – دەدى.
قازىر الەمدە تۋريزمنەن كۇرەپ پايدا تاۋىپ وتىرعان مەملەكەتتەر كوپ. دۇنيە ءجۇزىنىڭ عاجايىپتارىن كورسەم, بىلسەم, ساياحات جاساسام دەيتىن ادامدار كوپ. تۋريستەردى قاي مەملەكەت بولسا دا قۇشاق جايىپ قارسى الادى. ويتكەنى ول مەملەكەتتىڭ ەكونوميكاسىن كوتەرەتىن, ادامداردىڭ ءال-اۋقاتىن جاقسارتاتىن قىپ-قىزىل اقشا. قازاقستاننىڭ كوپ مەملەكەتتەردەن وزگەشەلىگى جىلدىڭ ءتورت مەزگىلى دە بار. ومىرىندە قولىنا قار ۋىستاپ كورمەگەندەرگە باسىندا سىرە قارى ءبىر جىبىمەيتىن اسقاق الاتاۋ, ارىندى تاۋ وزەندەرى بۇرقىراعان, تابيعاتى جۇماقتىڭ وزىندەي ەر تۇرىكتىڭ بەسىگى – التاي بار.
فورۋمدا سويلەگەن سوزىندە وبلىس اكىمى ج.تۇيمەباەۆ:
– ەلباسىنىڭ «100 ناقتى قادام» ۇلت جوسپارىنا سايكەس «قازاقستان رەسپۋبليكاسىنىڭ تۋريستىك سالاسىن 2023 جىلعا دەيىن دامىتۋ تۇجىرىمداماسى» بەكىتىلدى. وڭتۇستىك قازاقستان وبلىسى « ۇلى جىبەك جولىن قايتا جاڭعىرتۋ كلاستەرىنە» ەنگىزىلىپ, كلاستەر « ۇلى جىبەك جولىنىڭ جۇرەگى» رەتىندە سيپاتتالىپ وتىر. 1200-دەن استام تاريحي-ارحەولوگيالىق, مادەني-ارحيتەكتۋرالىق ەسكەرتكىشتەرى, ۇلى جىبەك جولى اۋماعىنداعى ەڭ تانىمال جانە تاريحي قۇندىلىعى جوعارى, يۋنەسكو-نىڭ دۇنيەجۇزىلىك مادەني مۇرالار تىزىمىنە ەنگەن قوجا احمەت ياساۋي كەسەنەسى ورنالاسقان وڭتۇستىك قازاقستان وبلىسى اتالعان مارتەبەنى الۋى – ءبىز ءۇشىن ۇلكەن ابىروي جانە جاۋاپكەرشىلىك, – دەدى.
ياعني الەمدىك تۋريزمگە سۇرانىپ تۇرعان تاريحي-مادەني ەسكەرتكىشتەر كوپ. ونىڭ ۇستىنە وڭتۇستىك قازاقستان وبلىسى « ۇلى جىبەك جولىنىڭ» بويىندا تۇر. بۇل دەگەنىڭىز قازاقستاننىڭ تۋريزمنەن پايدا كورەرلىك مۇمكىندىكتەرىنىڭ مولدىعىن اڭعارتادى.
فورۋم اياسىندا وڭتۇستىك قازاقستان وبلىسىنداعى تۋريزم سالاسى وكىلدەرى مەن قىتاي, وزبەكستان جانە قازاقستاننىڭ باسقا قالالارى اراسىندا 4 مەموراندۋمعا قول قويىلدى.
وندا ەكىجاقتى ارىپتەستىكتى نىعايتۋ ماقساتىندا «Ontustik Tourism Center» تۋريستىك اقپاراتتىق ورتالىعى قىتايدىڭ «Salem China» كومپانياسىمەن جانە «Sky Way» تۋريستىك كومپانياسىمەن مەموراندۋم ءتۇزىلدى. بۇدان وزگە, وڭتۇستىك قازاقستان وبلىستىق كاسىپكەرلىك, يندۋستريالىق-يننوۆاتسيالىق دامۋ جانە تۋريزم باسقارماسى مەن حاتاي پروۆينتسياسى اراسىندا مەموراندۋمعا قول قويىلدى. سونداي-اق «Ontustik Tourism Center» تۋريستىك اقپاراتتىق ورتالىعى مەن وزبەكستاننىڭ تۋريستىك ءونىمىن ناسيحاتتاۋ ورتالىعى اراسىندا ەكىجاقتى مەموراندۋم ءتۇزىلدى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
