سەگىزىنشى رەت ۇيىمداستىرىلعان مۋزىكا مايتالماندارىنىڭ جارىسىندا ءبىرىنشى ورىندى سەرگەي كيم (قازاقستان) مەن رۋستام مۋرادوۆ (رەسەي) ءبولىستى. ەكىنشى ورىن جىبەك قوجاحمەتوۆا (قازاقستان) مەن رۋبەن كوزينگە (رەسەي) بۇيىردى. قازىلار القاسى ءۇشىنشى دارەجەلى جۇلدەنى تاپسىرماۋعا شەشىم قابىلدادى. ءتورتىنشى جۇلدە يەگەرى اسقار قۇلشاريپوۆ (قازاقستان) بولدى. بەسىنشى دارەجەلى لاۋرەاتتىق ديپلومدى – ەرنۇر ەلامان يەلەندى. ايدوس بايبوسىن (قازاقستان), ماكسيم ماكسيموۆ (قازاقستان) جانە تەمىرلان بەيسەنباي (قازاقستان) بايقاۋدىڭ ىنتالاندىرۋ سىيلىقتارىنا لايىق دەپ تابىلدى. سونداي-اق اقشالاي سىيلىقتار بايقاۋدىڭ ەكىنشى كەزەڭىنە قاتىسۋ ءۇشىن اننا انتيپينا (قازاقستان) مەن اننا ستەكولششيكوۆاعا (رەسەي) تابىستالدى.
ءبىرىنشى ورىندى جەڭىپ العان رۋستام مۋرادوۆ: «الماتىداعى پيانيستەر بايقاۋى – بۇل ءوزىڭدى تانىتۋدىڭ كەرەمەت مۇمكىندىگى. مۇنداي بايقاۋلار مۋزىكانتتى شابىتتاندىرادى. بايقاۋدا باسەكەلەستىك رۋحتى, جۇلدە ءۇشىن جانتالاستى سەزىنبەدىم. ەڭ الدىمەن, اۋديتوريا ءۇشىن وينادىم. مۋزىكانت ءۇشىن تىڭدارمانىمەن ءدال وسىلاي تىلدەسۋ عاجاپ اسەر سىيلايدى», دەدى.
الماتىدا وتكەن VIII حالىقارالىق پيانيستەر بايقاۋى تەك تىڭداۋشىلار ءۇشىن عانا ەمەس, قازىلار القاسى ءۇشىن ۇلكەن مەرەكە بولدى. قازىلار القاسىنىڭ ايتۋىنشا, بايقاۋعا مۋزىكانت رەتىندە بولىپ-تولىسقان ورىنداۋشىلار قاتىستى. ولار رەپەرتۋاردى ۇيىمداستىرۋشىلار ۇسىنعان اۋقىمدى باعدارلاما اياسىندا ءوز تاڭداۋلارىنا سالدى. ناتيجەسىندە, حالىقارالىق مۋزىكالىق بايقاۋ بايقاۋ-فەستيۆالگە اينالدى.
ال قازىلار القاسىنىڭ قۇرامىندا حالىق ءارتىسى, قۇرمانعازى اتىنداعى قۇك رەكتورى, پروفەسسور ءجانيا اۋباكىروۆا (قازاقستان), پ.ي.چايكوۆسكي اتىنداعى ممك مەن بوستون ۋنيۆەرسيتەتىنىڭ پروفەسسورى پول نەرسەسيان (رەسەي), حالىقارالىق بايقاۋلاردىڭ لاۋرەاتى مومو كوداما (جاپونيا), حالىقارالىق بايقاۋلاردىڭ لاۋرەاتى الەكساندر كورسانتيا (گرۋزيا-اقش), كەميۋنگ ۋنيۆەرسيتەتىنىڭ پروفەسسورى نان حي كيم (كورەيا), ۇلى ۆيتاۋتاس اتىنداعى ۋنيۆەرسيتەتى مۋزىكا اكادەمياسىنىڭ دوتسەنتى يۋستاس دۆاريوناس (ليتۆا) سىندى تانىمال دا تالانتتى مۋزىكانتتار بولدى. ولار بايقاۋدىڭ بارلىق كەزەڭىندە ءوز تاڭدانىستارىن جاسىرماي, سەزىمدەرىنە دە ەرىك بەردى. كەيدە ۋايىمدارىن اشىق تۇردە ءبىلدىرىپ, تىڭدارماندارمەن بىرگە قاتىسۋشىلاردى قولداۋمەن بولدى. قازىلار القاسى مەن كوپشىلىكتىڭ بۇل بىرلىگىن قاتىسۋشىلار سەزىنىپ وتىردى. جانە تىڭدارمانعا مۋزىكا سالتاناتىن سىيلاۋعا وڭ سەپتىگىن تيگىزدى.
بايقاۋعا قازاقستان, رەسەي جانە پولشادان بارلىعى 19 جاس ورىنداۋشى قاتىستى. بايقاۋ ءۇش كەزەڭنەن تۇردى. ءۇشىنشى كەزەڭدە – قاتىسۋشىلاردىڭ ونەرى دوريان ۋيلسوننىڭ باسشىلىعىمەن (اقش) قازاقستان رەسپۋبليكاسىنىڭ مەملەكەتتىك اكادەميالىق سيمفونيالىق وركەسترىمەن سۇيەمەلدەندى.
ايناش ەسالي,
«ەگەمەن قازاقستان»
الماتى
