كورەي جاستارىنىڭ قوزعالىسى قوعامدىق ۇيىمى جيىرما جىلدان بەرى ىلكىمدى دە بەلسەندى جۇمىستار جۇرگىزىپ كەلەدى. ولار قاۋىمداستىق جوسپارلاعان شارالاردىڭ بارلىعىنا قاتىسىپ, باستاما كوتەرىپ, ءتۇرلى جوبالاردى جۇزەگە اسىرىپ وتىرادى. سونىمەن قاتار كورەي جاستارى قوزعالىسى كوپ ۇلتتى, ينتەرناتسيونالدىق ۇيىم بولىپ تابىلادى. ولار تەك اقىلدى, كرەاتيۆتى, تالانتتى جاستاردىڭ باسىن قوسىپ, ءبىر ماقساتقا جۇمىلدىرادى. قوستاناي مەملەكەتتىك پەداگوگيكالىق ينستيتۋتى شەت تىلدەر فاكۋلتەتىنىڭ ءى كۋرس ستۋدەنتى كارينا ولجاباەۆا وسى جاستار ۇيىمىنىڭ بەلسەندى مۇشەسى ەكەن.
ء–بىزدىڭ ۇيىمدا بارلىق ۇلتتىڭ وكىلدەرى بار. ءبىزدىڭ ماقساتىمىز ءتيىمدى, ناقتى ىستەر تىندىرىپ, وتانىمىزدىڭ گۇلدەنۋىنە ۇلەس قوسۋ, دوستىقتى, بىرلىكتى, ءپاتريوتيزمدى ناسيحاتتاۋ بولىپ تابىلادى. مىسالى, ماعان كورەي ءتىلى, مۋزىكاسى ۇنادى, كورەي ۇلتىنان دوستارىم بار. مەن سالمۋنوري اسپابىندا ويناۋدى ۇيرەنىپ العانمىن, قازىر توپتا وينايمىن. ءبىز ءتۇرلى جوبالاردى جۇزەگە اسىرامىز, قازاقستاننىڭ مەملەكەتتىك مەرەكەلەرىندە ءتۇرلى شارا وتكىزەمىز, وزگە ۇلىستاردىڭ ۇلتتىق مەرەكەلەرىنەن دە تىس قالمايمىز, قايىرىمدىلىقپەن اينالىسامىز. مىسالى, بيىل جازدا «ۇلكەن ەل – ۇلكەن وتباسى» جوباسى اياسىندا تورعاي وڭىرىندە, وبلىستىڭ باسقا اۋداندارىندا بولىپ, قايىرىمدىلىق كونتسەرتىن بەردىك, – دەيدى كارينا.
فورۋمدا قوستاناي وبلىستىق قازاقستان حالقى اسسامبلەياسى توراعاسىنىڭ ورىنباسارى – حاتشىسى ءماجيت شۇلەنوۆ, وڭتۇستىك كورەيانىڭ قازاقستانداعى توتەنشە جانە وكىلەتتى ەلشىسىنىڭ ورىنباسارى حان مان چۋن, قازاقستان كورەيلەرى قاۋىمداستىعىنىڭ توراعاسى سەرگەي وگاي, قوستاناي وبلىستىق كورەي ەتنو-مادەني قوعامدىق بىرلەستىگىنىڭ توراعاسى يگور كيم جاستاردى قۇتتىقتاپ ءسوز سويلەدى.
– ەكى ەل اراسىنداعى ىنتىماقتاستىق قازاقستان تاۋەلسىزدىگىن العان جىلداردان باستاپ دامىپ وتىر. جاستارسىز قاي ۇلتتىڭ دا بولاشاعى جوق. ەكى ەل اراسىنداعى ەكونوميكالىق, ساياسي, مادەني جانە سپورتتىق قاتىناستاردى ورىستەتەتىن سىزدەرسىزدەر, – دەدى حان مان چۋن.
بۇگىندە قازاقستاندا كورەي ۇلتىنىڭ ءتورتىنشى ۇرپاعى تۇرىپ جاتىر. بيىل كورەيلەردىڭ قازاقستانعا زورلىقپەن قونىس اۋدارىلعانىنا 80 جىل تولادى. قازاقستان كورەيلەرى قاۋىمداستىعىنىڭ توراعاسى سەرگەي وگاي جاستار قوزعالىسىنىڭ تاماشا باستامالارىن كورگىسى كەلەتىنىن ايتتى. قاۋىمداستىق بيىل الەۋمەتتىك روليكتەرگە بايقاۋ جاريالاعان بولاتىن. التى ايدىڭ ىشىندە وعان 200-دەن اسا جۇمىس تۇسكەن, سونىڭ اراسىنان 30 روليك ىرىكتەلىپ الىنىپ, بايقاۋعا قاتىستىرىلدى. وندا ءبىرىنشى جانە ەكىنشى ورىندى قوستانايلىق جاستار جەڭىپ الدى. فورۋمدا ولاردىڭ جۇمىسى كورسەتىلىپ, باتىر وسپانوۆ پەن كيريلل كوگايعا جۇلدەلەرى تاپسىرىلدى.
– مەن روليكتە جاسوسپىرىمدەردى سۋيتسيدكە باستايتىن پسيحولوگيالىق تىعىرىقتان الىپ شىعۋ, باقىتسىز جاعدايدىڭ الدىن الۋ ونىڭ ورتاسىنىڭ, ەرەسەكتەردىڭ مىندەت-پارىزى ەكەنىن ايتقىم كەلدى, – دەيدى «اگروماشحولدينگ» ماشينا قۇراستىرۋ زاۋىتىندا قىزمەت ىستەيتىن باتىر وسپانوۆ. قازاقستان كورەيلەرى قاۋىمداستىعىنىڭ توراعاسى سەرگەي وگاي بيىل بۇل الەۋمەتتىك روليك بايقاۋىن تاجىريبە رەتىندە باستاعانىن, الداعى ۋاقىتتا جىل سايىن وتكىزىلەتىنىن ايتتى. ول فورۋمعا قاتىسۋشى جاستارمەن ەمەن-جارقىن اڭگىمەلەستى, ولاردىڭ ساۋال, ۇسىنىستارىن, پىكىرلەرىن تىڭدادى.
– قازىر الەم وزگەرىپ وتىر. ءبىز, بيزنەستەگى, باسقا دا سالالارداعى اعا بۋىن وكىلدەرى, توپ مەنەدجەرلەر بىرىگىپ, جاستارمەن جۇمىس جۇرگىزەمىز. ءبىزدىڭ ارامىزدان جاڭا ليدەرلەر ءوسىپ شىعۋى ءتيىس. ولار الدىڭعى بۋىننىڭ سوڭىنان ەرىپ, قازاقستاننىڭ يگىلىگىنە جۇمىس ىستەۋى كەرەك. ەلباسى الدىمەن ەلۋ ەلدىڭ قاتارىنا كىرۋ تۋرالى ماقسات قويعاندا ول بىزگە ەرتەگىدەي كورىنگەن ەدى. ال قازىر سول ەلۋ ەلدىڭ قاتارىندامىز, ەندى قازاقستان وزىق وتىز ەلدىڭ اراسىنان كورىنۋى ءۇشىن العا ۇمتىلامىز. قازاقستاننىڭ قالاي دامىپ وتىرعانىن بىلەسىزدەر. دامۋ بارلىق سالاداعى وزىق ىستەردەن تۇرادى, ال ونى جۇزەگە اسىراتىن تاعى دا جاستار. «بۇگىنگى جاستاردىڭ ماقسات-مۇددەسى قانداي؟» دەگەن ويدى وتىرىستىڭ تاقىرىبىنا اينالدىرعىم كەلەدى, – دەدى سەرگەي وتاي.
فورۋمعا قاتىسۋشىلار جەرگىلىكتى جەرلەردە جاستاردىڭ وزىمەن ءوزى توماعا-تۇيىق قالاتىنىن, ورتالىقپەن بايلانىستىڭ ناشارلىعى تۋرالى, تاعى باسقا كوپتەگەن وتكىر ماسەلەلەر مەن ويلارىن ورتاعا سالدى. سەرگەي وگاي جاستاردى ءتۇرلى باستاما كوتەرىپ, قىزىقتى جوبالار جاساۋعا شاقىردى. بۇل ورايدا ولارعا بارلىق كومەك كورسەتىلەتىنىن دە جەتكىزدى.
فورۋم اياسىندا ترەنينگ, تاجىريبەلىك جۇمىستار ۇيىمداستىرىلدى. جاستار شاراسى ادەتتەگىدەي كوڭىلدى كونتسەرتپەن اياقتالدى.
ءنازيرا جارىمبەت,
«ەگەمەن قازاقستان»
قوستاناي
