شارا قازاقستان رەسپۋبليكاسىنىڭ اقش-تاعى ەلشىلىگى, قازاقستان رەسپۋبليكاسى مادەنيەت جانە سپورت مينيسترلىگى جانە قازاقستان كينەماتوگرافيالىق ونەرى مەن عىلىمدارى اكادەمياسىمەن بىرلەسىپ وتكىزىلمەك. «Spirit of the Great Steppe» اتالاتىن بۇل شارانىڭ باستى ماقساتى – امەريكالىق كورەرمەندەردى قازاقستاننىڭ باي ۇلتتىق - مادەني مۇراسىمەن تانىستىرۋ.
اتالعان شاراعا قازاقستاننىڭ اقش-تاعى ەلشىسى - ەرجان قازىحانوۆ, قازاقستان رەسپۋبليكاسى مادەنيەت جانە سپورت ءمينيسترى - ارىستانبەك مۇحامەدي ۇلى, قازاقستان كينەماتوگرافيالىق ونەرى مەن عىلىمدارى اكادەمياسىنىڭ پرەزيدەنتى – ايمان مۇساقوجاەۆا جانە مادەنيەت پەن كينەماتوگرافتىڭ وزگە دە بەلدى قايراتكەرلەرى قاتىسادى.
– قازاقستان رەسپۋبليكاسىنىڭ مادەنيەتى مەن كينوسىنىڭ كۇندەرىن اقش-تا وتكىزۋ امەريكالىقتاردىڭ قازاق مادەنيەتىنە دەگەن قىزىعۋشىلىعىن تۋدىراتىنى ءسوزسىز. سونىمەن قوسا, قازاقستان مەن امەريكانىڭ مادەني بايلانىسىنىڭ جاڭا كەزەڭى بولماق, - دەپ اتاپ ءوتتى قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەدي ۇلى. – «قازاقستان رەسپۋبليكاسىنىڭ مادەنيەتى مەن كينوسىنىڭ كۇندەرى اقش - تا ءبىرىنشى رەت وتىكىزىلىپ جاتقان جوق. دەسە دە, بۇل ءىس-شارا ەكى ەل اراسىنداعى مادەني قارىم-قاتىناس تاريحىندا قالاتىنى ء سوزسىز! «Spirit of the Great Steppe» – « ۇلى دالا رۋحى » اتتى شارامىزدىڭ كوزدەگەن ماقساتى – امەريكالىق كورەرمەندەرىن قازاقستاننىڭ باي ۇلتتىق - مادەني مۇراسىمەن تانىستىرۋ بولىپ تابىلادى. وسى شارا اياسىندا سىزدەر, ون التىنشى عاسىرداعى قوس عاشىقتىڭ ومىرىنەن سىر شەرتەتىن «قىز جىبەك» كينوفيلمىن تاماشالاي وتىرىپ, قازاقتىڭ مادەني مۇراسىنىڭ ءبىر بولىگىمەن تانىساسىزدار. سونىمەن قاتار, «قازاق حاندىعى. الماس قىلىش» فيلمىندە ون بەسىنشى عاسىردىڭ ورتاسىنداعى قازاق تاريحى بايان ەتىلەدى. ۇزاق جىلدار بويى باستارى بىرىكپەي, شاشىراپ جۇرگەن حالىقتىڭ ءبىر تۋ استىنا جينالىپ, ءوز ىشىنەن حان سايلاپ ەل بولعانى سۋرەتتەلەدى.
اقش-تا قازاقستان رەسپۋبليكاسىنىڭ مادەنيەتى مەن كينوسىنىڭ كۇندەرى 20 قاراشا كۇنى, سابان تەاترىندا رەجيسسەر اقان ساتاەۆتىڭ «اناعا اپارار جول» اتتى كوركەم فيلمىمەن سالتاناتتى تۇردە اشىلادى. كورسەتىلىم اياقتالعاننان كەيىن, حالىق ءارتيسى ايمان مۇساقوجاەۆانىڭ, حالىقارالىق بايقاۋلاردىڭ لاۋرەاتى ەدىل قۇسايىنوۆتىڭ, قازاق ۇلتتىق ونەر ۋنيۆەرسيتەتىنىڭ ەۋرازيالىق سيمفونيالىق وركەسترىنىڭ, «شابىت» جانە «ايگولەك» اتتى انسامبلدەردىڭ قاتىسۋىمەن ۇلكەن كونتسەرت وتەدى.
– قازاقستان كينوسىنىڭ شەتەلدەگى كورسەتىلىمى – بۇل قازاقستاندى ساياسي حالىقارالىق ارەنادا قارقىنى جوعارى مەملەكەت قانا ەمەس, زامانعا ساي, ساپالى, كاسىبي كينوكونتەنت ءوندىرۋشى رەتىندە تانىتۋ. مۇنى ەلىمىزدىڭ مەملەكەتتەر اراسىنداعى كينەماتوگراف سالاسىندا ىنتىماقتاستىق ورناتۋعا ارنالعان جارناماسى دەسە دە بولادى. سونىمەن قوسا, قازاقستانعا تۋريستەر لەگىن تارتۋ ءۇشىن شەتەلدىكتەردىڭ ءبىزدىڭ ەلمەن تانىسۋلارىنا مۇمكىندىك بەرەدى. ەلىمىز, مادەنيەتىمىز, تاريحىمىز بەن قول جەتكىزگەن جەتىستىكتەرىمىز, سالت-ءداستۇرىمىز جايىندا قوعامدا وڭ پىكىرلەردىڭ قالىپتاسۋىنا, مەملەكەتىمىزدىڭ حالىقارالىق ورنىنىڭ نىعايۋىنا ىقپال ەتپەك, - دەدى قازاقستان كينەماتوگرافيالىق ونەرى مەن عىلىمدارى اكادەمياسىنىڭ پرەزيدەنتى ايمان مۇساقوجاەۆا.
سونداي-اق, وسى شارا اياسىندا, رەجيسسەر سۇلتان-احمەت قوجىقوۆتىڭ «قىز جىبەك», «بالالىق شاعىمنىڭ اسپانى» جانە رەجيسسەر رۇستەم ابدىراشەۆتىڭ «قازاق حاندىعى. الماس قىلىش» كارتينالارى ۇسىنىلاتىنىن اتاپ ءوتۋ كەرەك. اتالعان فيلمدەر قازاق تىلىندە اعىلشىن سۋبتيترلارىمەن كورسەتىلەدى.
